Read Thado Chin 1 Samuel 23 Bible Online

1 Samuel 23 - Thado Chin bible

1 Samuel 23

¹Chujouvin amahon David jah-a, Ven Philistine ten Keilah asatnun, changphol ho achomun ahi, atiuve.

²Hijeh chun David'in Pakai adongin, Kache-a Philistine te khu kagasat dingham? ati. Chuin Pakaiyin David jah-a, Chen, Philistine te gasatnin lang, Keilah gahuhdoh-in, ati.

³Chuin David loihon ajah-a, Ven, hikom Judah gama bon kikicha-a, Keilah'a ihunguva, Philistine galsat miho igadou diuchu iti kichat umjocheh ding hitam? atiuve.

⁴Hichun David'in Pakai adong kitnin ahi. Chuin Pakaiyin adonbutnin, Kipatdoh-in lang Keilah'a chesuh-in; ajehchu Philistine te chu nakhutna kapehdoh ding ahi, ati.

⁵Hitichun David le aloite Keilah-a acheuvin, Philistine te chutoh akisatnun, agancha hou ahin pui mangun, amaho chu nasatah-in athatnun ahi. Hitichun David'in Keilah miho chu ahuhdoh tan ahi.

⁶Chuin ahitin ahi, Ahimelech chapa Abiathar chu David henga Keilah lama ajam phatnin, aman akhutna thempu sangkhol khat ahinchoijin ahi.

⁷Chuin David Keilah'a ahungchu Saul henga aseipeh taovin ahi. Chuin Saul'in, Pathen'in ama kakhutna eipehdoh ahitai; ajehchu khopi kulkotpi le kotjol nei alutna chu, ama kikam khum ahitai, ati.

⁸Chuin Saul'in mijouse chu galsat ding, Keilah'a chesuh-a David le aloite umchah din akoukhom tan ahi.

⁹Chule David'in guhthima Saul'in ama chunga doha abolchu ahen; Abiathar thempu henga chun, Thempu sangkhol chu hinchoi jin, ati.

¹⁰Hichun David'in, Vo Pakai Israel Pathen, keijeh-a Keilah khopi suse dingin Saul ahung suh-e ti kichentah in kajatai.

¹¹Keilah mihon akhutna eipehdoh diu ham? nasoh-in kajah banga hi Saul hungsuh ding ham? Vo Pakai Israel Pathen, katao ahi, nasoh hi neihet sah-in, ati. Chuin Pakaiyin, Hungsuh ding ahi, ati.

¹²Hichun David'in, Keilah miten keima le kamitehi Saul khutna eipeh doh dingu ham? ati. Chuin Pakaiyin, Amahon napehdoh dingu ahi, ati.

¹³Chuphatnin David le aloiho mi jagup tobang chu akipatnun, Keilah chu adalhaovin, achetheinao lamcheh-a achetauve. Chuin David chu Keilah'a konin ajamdoh tai tichu Saul aseipeh taovin; chule aman amaho kondoh dingchu ajahda tan ahi.

¹⁴Chuin David chu gamthipma mundet tah khatna aumin, Ziph gamthip lhang khatna aumden tan ahi. Chule Saul'in aniseh-in aholin, ahivangin Pathen'in akhutna apedoh pon ahi.

¹⁵Chuin Saul chu ama that dingin ahung kondoh-e ti chu David'in amutan: chule David chu Ziph gamthip gammanga uma ahi.

¹⁶Chuin Saul chapa Jonathan akipatnin, David umna gammanga chun achen, Pathen'a akhut tha agahatsah-in ahi.

¹⁷Chuin aman ajah-a, Kicha hih-in: ajehchu kapa Saul khutnin namaidoh louhel ding ahi; nangma Israel chunga leng changding nahin, keima nabantah-a kahi ding ahi; chule hichu kapa Saul'in ahet ahi, ati.

¹⁸ Chuin amanin Pakai angsunga kitepna aneilhonin ahi: chuin David gammanga aumin, Jonathan chu a-in'a achetai.

¹⁹ Chujouvin Ziph miho chu Gibeah mun'a Saul henga ahungun, ajah-a, Jeshimon lhanglama um Hachelah lhang gammang lah mun dettah khatna David chu keiho toh kisela hilouham?

²⁰Hijeh chun, vo lengpa, nalungin hungsuh ding anangaichat dungjuijin hungsuhtan; chule keiho mopohna chu lengpa khutna pehdoh dingchu hiding ahi, atiuve.

²¹Chuin Saul'in, Nangho Pakaiya phattheiboh chang hiuvin; ajehchu nanghon keima neilainat piuvin ahi.

²²Cheovin, naheng uva katao ahi, gakhol toh-un, hilai mun'a chu kon amu ham akiselna mun gaveovin lang gahetoh-un; ajehchu ama doha thuhtah ahi ti eikisei peh-e.

²³Hijeh chun akiselguhna mun jouse chu gahetoh-un, chule adihchet chu nahet tengule kahenga hung kitnun, chutengle keima nangho toh kalhon ding ahi. Chule hung hitiding ahi, ama gamsunga um ahi pouva ahile, Judah mi asang asang lah-a chu kaholdoh ding ahi, ati.

²⁴Chuin amaho akipat doh-un, Saul angsunga konin Ziph gama ache taovin ahi: ahin David le aloiho chu Jeshimon lhanglam phaichama um Maon gamthipma aumuvin ahi.

²⁵Saul le amite jong ama holin acheuvin ahi. Chuin amahon David aseipeh-un: hijeh chun ama songpi khat sunga ahung lutnin, Maon gamthipma aumtan ahi. Saul'in hichu ajah phatnin, David chu Maon gamthipma ahin nungdel tan ahi.

²⁶Chuin Saul molpang hilam sanga achen, David le aloiho molpang khulam sanga acheuvin; chule David'in Saul ginna jammang loiding agon ahi: ajehchu Saul le aloihon David le amite chu matdinga a-umkolu ahitai.

²⁷Ahinla Saul henga thupole khat ahungin, ajah-a, Kinonlang hungin; ajehchu Philistine ten gamsunga gal ahinbol taove, tin ahungseijin ahi.

²⁸Hijeh chun David nung adelna-a konin Saul akinunglen, Philistine te satdin achetai. Hijeh chun hiche mun chu Sela-hammah-lekoth [4] asah taovin ahi.

²⁹Chuin David chua konchun achetouvin, Engedi mun dettah sunga achengtai.