Read Thado Chin 1 Samuel 25 Bible Online

1 Samuel 25 - Thado Chin bible

1 Samuel 25

¹Chuin Samuel athitan; Israelte jouse akikhom khomun, alunghem piuvin, a-in mun Ramah'a avui taovin ahi. Chuin David akipatnin Paran gamthipma achesuhtai.

²Chuin Moan kho-a chun Carmel'a anei agouho uma mikhat aumin; chule mipa chu ahao lheh jengin, kelngoi sangthum le kelcha sangkhat aneijin ahi. Chuin aman Carmel'a akelngoi mul avouvin ahi.

³Tun mipa minchu Nabal ahin, a-inneipi minchu Abigail ahi. Chule amanu chu numei lungching tah le melhoitah ahin: hinla mipa vang chu umje helou le gilou tah-a natong ahi: chule ama Caleb insungmi ahi.

⁴Chuin David'in gamthipma chun Nabal'in akelngoi mul avouve ti thu ajan ahi.

⁵Chuin David'in gollhang som asolin, David'in gollhangho jah-a chun, Carmel'a chetouvun lang, Nabal henga cheovin, chule kaminin chibai gabolun:

⁶Chule haosatah-a hingpa jah-a chu hitia nagasei dingu ahi, Nachunga lungmon umhen, na-insung chunga lungmon umhen, chule nanei jouse chunga lungmon umhen.

⁷Chule tun nangman kelngoimul vouho naneije ti kajaovin ahi: tun nakelngoi chingho chu Carmel'a aum sungseuvin keihotoh kaum khomun, kasugenthei pouvin, amahoa konin jong imacha amanga aumpoi.

⁸Nagollhangho dongle chun namusah naovinte. Hijeh chun gollhangho hi namitmun lungsetna changu hen: ajehchu keiho kut nikho-a hung kahiuve. Nakhutna naphal khamkham chu nasohte le nachapa David dingin hinpen tin, gaseijun, ati.

⁹Chuin David gollhangho ahung phatnun, hiche thuho jouse dungjui chun Nabal henga David minin aseijun anga taove.

¹⁰Chuin Nabal'in David sohte chu adonbutnin, David chu koiham? chule Jesse chapa koiham? tulaijin apu thu palkeh-a jam manga soh tamtah aume.

¹¹Keiman ka-anneh le katwidon, chule ka kelngoi mul vouho dia kathapeh kasa chu kalah-a hoija kon ahiu kahetlou mihochu kapeh dingham? ati.

¹²Chutichun David gollhangho chu akinung leuvin, ahungun thujouse chu David ahiltaove.

¹³Chuin David'in aloiho jah-a, Amitakipmin nachemjam cheh kikouvin, ati. Chuin amitakip chun ama ama chemjam cheh akiko taovin; chule David'in jong achemjam akikon ahi. Chuin David nunga chun mi jali tobang le, moltum choi mi jani tobang acheuvin ahi.

¹⁴Ahin gollhang khatnin Nabal jinu Abigail aseipeh-in, ajah-a, Ven, David'in gamthipma konin kapu chibai boh dingin sottol leho ahinsolin ahile, aman amaho anajumson ahi.

¹⁵Ahinla miho chu keihodia phatah ahiuvin, eisugenthei pouvin, amahotoh kakihou theijuva, gamlah-a kaum sungseuvin imacha jong kamansah pouve:

¹⁶Amaho toh kiloija kelngoi kachin sungseuvin, amaho keihodin sun le janin kulbangin akisungun ahi

¹⁷Hijeh chun tun nangman ipi nabolding ham henlang ngaiton; ajehchu kapu chung le a-insung pumpi douna-a thilse kingaito ahitai. Ajehchu ama chutobang tah-a Belial chapa ahin, min ahenga thu asei theipon ahi, ati.

¹⁸Chuphatnin Abigail akinoloijin, changlhah lhon jani, ju haini, kelngoi semtohsa nga, changkanpoh tena nga, chule lengpithei ga gop boh jakhat, theichang changlhah jani alan, asangan ho chunga agongtai.

¹⁹Chuin amanun asohte jah-a, Kamasanga cheovin; veuvin, nanung uva kahunge, ati. Ahinla ajipa Nabal ahetsahpon ahi.

²⁰Chule anahitin ahi, amanu sangan chunga atouva, lhang dunga ahungsuh laijin, veuvin, David le aloiho amanu dontah-a ahungun; amaho chu akimaitopi tai.

²¹Tun David'in, Aneijouse imacha amanlouna dinga gamthipma kanachin tuppeh chu mohseh ahitai; aman apha chu asen eilethuh tai.

²²Pasal tapou ama-a kaiho jouse jingkah khovah geija kahinghoi ja ahile, akalvalin jong Pathen'in David melmate chunga bolhen, ati.

²³Chuin Abigail'in David amuphatnin, sangan chunga konin kintah-in akumlhan, David masanga chun alhun, tolla aboh khupmin;

²⁴Akhophang bula alhun, ajah-a, Kachunga, ka pakai, keima chunga hiche themona hi umhen; chule nahenga katao ahi, nasohnu hi nanakhanga thu neiseisah inlang, nasohnu thusei hi neingaipeh-in.

²⁵Nahenga katao ahi, ka pakai, hiche Belial mipa Nabal hi thupi tah-in lahih-in: ajehchu amin tobang banga ama jong hija ahin; amin Nabal ahin, ama-a ngolna um ahi. Ahinla kapun nahinsol gollhangho chu nasohnun kanamu lou ahi.

²⁶Hijeh chun tun, kapu, Pakai hingjing le nangma hinna panna kasei ahi, Pakaiyin thisanso dinga nahung kon le nangma khut tah-a thisan phuladinga nahung kon hi atuhtang ahitan, tun namelmate le kapu dinga thilse ngaito chanchu Nabal tobang hiuhen.

²⁷Chule tun kapu henga nasohnun kahinpoh hiche phattheina hohi, kapu nung hinjui gollhangho hi kipehen.

²⁸Nahenga katao ahi, nasohnu suhkhelna ngaidamin: ijeh inem itile Pakaiyin thonlouva kapu insung hi dettah-a atundoh ding ahi; ajehchu kapun Pakai gal nasat ahin, chule nahinkho sunga hin thilse himhim akimu pon ahi.

²⁹Ahijeng vangin nahin nungdel dingle nahinkho lamang dingin mikhat akipatdoh-in: ahinla kapu hinna hi Pakai na Pathen hinna toh kikan khom ding ahin; namelmate hinnaho vang, aman ahsongse-a kona kisepdoh banga asedoh ding ahi.

³⁰Chule hung hitiding ahi, Pakaiyin kapu-a dinga aman nangma chungchanga thilpha anaseiho jouse dungjuija ahintoh chaija, Israel chunga vaipo-a nahin pansah tengle;

³¹Ajeh beijin thisan naso hihen lang, kapu'n ama phu akilahna hijongle, hichu nangma dinga lungkhamna le, kapu dinga lungnatna hitalou ding ahi: ahinla Pakaiyin kapu-a dinga thilpha ahinbol tengle, nasohnu hi neihin geldoh-in, ati.

³²Chuin David'in, Abigail jah-a, Tunia eikimupi dinga nahinsola Israel Pakai Pathen chu nunnom hen.

³³Tunia thisanso dinga kahungna-a kon le, kakhut tah-a kaphu kakilah nadinga kona eihoidoh-a nangmale nathumop chu nunnom hen.

³⁴Ajehchu nangma eikimupi dinga kino loija nahung lou hile; nangma suhsetna dinga kona eituhtanga hingjing Israel Pakai Pathen min pana kasei ahi, thonlouva jingkhovah teng Nabal'a dinga pasal khatcha jong asohcha umlou helding ahi, ati.

³⁵Hitichun David'in amanun ahin pohpeh hochu akhutna konin akisanin, amanu jah-a, Na-in'a lung mongin chetan, ven na aw kangaija chule nangma kajabol nahitai, ati.

³⁶Chuin Abigail chu Nabal henga ahungin; veuvin, aman a-in'a lengpa golvah tobangin golvah anabolin; chule Nabal chu ju akham jeh-in, alungsung akipah lheh-in ahi. Hijeh chun amanun jingkhovah kahsen imacha ahilpoi.

³⁷Ahin jingkho ahungvah-in ahitin ahi, Nabal juhu atheu phatnin, a-inneipin thuho jouse chu aseipehtan ahile, alungsung athi helin, songtumto abangtan ahi.

³⁸Chuin nisom jouvin ahitin ahi, Pakaiyin Nabal chu adengin ahile athitan ahi.

³⁹Chuin David'in Nabal thithu ajah phatnin, Nabal khutna kona i-sah louva eikibolna phu eilah peh-a le asohpa thilse-a kona hoidoh-a Pakai chu nunnom hen; ajehchu Pakaiyin Nabal gitlouna chu ama luchanga achuhsahtai, ati. Chuin David'in Abigail chu ajidinga gahel dingin ahenga mi asolin ahi.

⁴⁰Chuin David sohte chu Carmel'a Abigail henga ahung phatnun, amanu henga, David'in ajidinga nangma puidinga nahenga eihinsolu ahi, atiuve.

⁴¹Chuin amanu akipatnin, aboh khupmin amai tolla asulutnin, ven, nasohnu hi kapupa sohte keng sildingin soh-in hungpang inge, ati.

⁴²Chuin Abigail akipatdoh paijin, sangan chung khatna atouvin, anungjui nungah nga toh ahin; David thupole ho nunga achen, ajin agapang tai.

⁴³Chuin David'in Jezreel mi Ahinoam jong akipuijin; amani jong anilhonin aji ahilhontai.

⁴⁴ Ahinla Saul'in achanu David jinu Michal chu Gallim mi Laish chapa Phalti chu apetan ahi.