Read Thado Chin 1 Samuel 28 Bible Online

1 Samuel 28 - Thado Chin bible

1 Samuel 28

¹Chuin hiche nikho laichun ahitin ahi, Philistine te chun Israelte toh kisatdin asepaiteu galsat dingin akhom khomun ahi. Chuin Achish'in David jah-a, Nangho le namite galsatdia keitoh ikon dohdiu ahi ti kichentah-in nahei, ati.

²Chuin David'in Achish henga, Thonlouva nasohpa hin ipi kabolthei nahet ding ahi, ati. Chule Achish'in David jah-a, Hijeh-a chu a-itih-a eihongbit dinga kapansah ding nahi, ati.

³ Tun Samuel chu athitan, Israelte jouse chun akauvin, ama khopitah Ramah-a chun avuitaove. Chule Saul'in lhakouhole doithemho gamsunga konin anodohtai.

⁴Chuin Philistine te akichom khomun, ahungun Shunem'a gebuh ahungsong taovin ahi: chule Saul'in Israelte jouse achom khomin Gilboa'a gebuh asongun ahi.

⁵Chuin Saul'in Philistine janelho amuphatnin, akichan, alungthim akihot hot jengtan ahi.

⁶ Chuin Saul'in Pakai adoh phatnin, Pakaiyin amangin jong, Urim'in jong, themgaohon jong adonbutpon ahi.

⁷Chuphatnin Saul'in asohte henga, Ahenga kache-a kadoh theinadin numei lhakouthei khat neigahol peh-un, ati. Chuin asohten ajah-a, Ven, Endor'a numei lhakouthei khat aume, ati.

⁸Chuin Saul'in alim akhelin, vonchom akivonin, minitoh jan-in numeinu henga chun ahungtaove. Chuin aman, Nahenga katao ahi, nalha kouthei na-a chun phun neisan peh-inlang, nahenga min kasei penpen chu neihin koudoh peh-in, ati.

⁹Chuin numei chun ajah-a, Ven, Saul'in lhakou ho le doithemho gamsunga kona iti adeldoh helham nangman nahei. Achutile ibola kathi nadinga, kahinkho hi thang neikam peh ham? ati.

¹⁰Chuin Saul amanu henga Pakaiya akihahselin, Hingjing Pakai min pana kasei ahi, hiche jeh-a hi nachunga engbolna chulou ding ahi, ati.

¹¹Chuphatnin numei nun, Nahenga koi kahin puitou diham? ati. Chuin aman, Samuel neipuitou peh-in, ati.

¹²Chuin amanun Samuel amuphatnin hatah-in apengin: chuin Saul jah-a, Ibola neilhep ham? ajehchu nangma Saul nahi, ati.

¹³Chuin lengpan amanu jah-a, Kicha hih-in: nangin ipi namu em? ati. Chuin numeinu chun Saul jah-a, pathenho leisetna kona ahung kaltouvu kamui, ati.

¹⁴Chuin aman amanu jah-a, Aman itobang mel aputnem? ati. Chuin amanun, Tehsepu khat ahungtouvin; sangkhol cholin akivone, ati. Chuin Saul'in Samuel ahi ahetan, amai tolla asulutnin akuntai.

¹⁵Chuin Samuel'in Saul jah-a, Ibola puitoudinga neisuhboi ham? ati. Chuin Saul'in adonbutnin, Kalung genthei behset jenga ahi; ajehchu Philistine ten eisatnun, Pathen keija konin achemang tan, themgao ham, mang hamin jong eidonbut tapon ahi: hijeh-a chu ipi kabolding nangin neihetsah theina dinga kakou nahi, ati.

¹⁶Hichun Samuel'in, Pakai nanga kona achemang henasa le namelma ahitai ti henasa-a ibola keima neidoh ham?

¹⁷ Pakaiyin kakoma aseibanga abol ahitai. Ajehchu Pakaiyin lenggam chu nakhutna kona alhekeh-a, naheng nakom David ngeichu apeh ahitai.

¹⁸ Ajehchu Pakai thusei nangaipon, chule Amalek mite chunga alunghana tijat umtah chu natongdohpoi; hijeh-a chu tunia hi hichehi Pakaiyin nachunga abol ahitai.

¹⁹Achungchona jong Pakaiyin Israel chu nangma toh Philistine te khutna apehdoh ding ahinalaije. Chule jing nikho le nangma le nachapate keitoh i-um khomdiu ahitan: chule Pakaiyin Israel janel jongchu Philistine te khutna apehdoh ding ahi, ati.

²⁰Chuphatnin Samuel thusei jehchun Saul chu alhun tolla akijamhel jengin, akicha behseh jengtan ahi: chule ama-a chun tha himhim aum tapon ahi; ajehchu sun nilhum jankhovah-a an nelouva um ahi.

²¹Chuin numeinu chu Saul henga ahungin, alunggim behseh chu amun, ajah-a, Ven, nasohnun nathu kanitnin, chule kahinkho kakhutna kakichoijin, kahenga nasei thuho chu kangaijin ahi.

²²Hijeh chun tun nahenga katao ahi, nangin jong nasohnu thusei ngaijin lang, na-anga changlhah kam khatbeh luipeh ingting; nachena ding lampia nache tengle tha nanei theinadin nen, ati.

²³Ahin ama anomhih-in, Kaneh louding ahi, ati. Ahinla asohte le numeinu akithouvin angeh teitei jengun ahile, athu angaitai. Chutichun tolla konin akipatdoh-in, jalkhun chunga atoutai.

²⁴Chule numeinu hin a-in'a bongnou thaochet khat aneijin; chuin gangtah-in athatnin, changbong alan ameh halin, chule hichea chun cholso louvin changlhah akangin;

²⁵Chuin Saul le asohte anga ahindomin, amahon anetaove. Chuin amaho chuche janchun akipatnun, achetauve.