Read Thado Chin 1 Samuel 3 Bible Online

1 Samuel 3 - Thado Chin bible

1 Samuel 3

¹Chapang Samuel chu Eli masanga Pakai kin bolin apangin ahi. Chule hichelai chun Pakai thuchu amantam lheh jengin; phongtah-a kilahna anaumpoi.

²Chuin hiche laichun ahitin ahi, Eli chu aumna-a alupma, kho muthei lou leuva amitchu ahung thima;

³Chule Pathen kitepna thingkhong umna Pakai houin'a Pathen thaomei chu amit masang, chule Samuel chu imu ding aluplhah petnin;

⁴Chutichun Pakaiyin Samuel akouvin ahile aman, Hikoma kaume, tin adonbutnin ahi.

⁵Chuin ama Eli henga alhaijelin, Hikoma kaume; ajehchu nangman neikouve, agatin ahi. Chuin aman, Kakoupoi, galumkit tan, ati. Chuin ama achen alumtai.

⁶Chuin Pakaiyin avelin akoukitnin, Samuel, ati. Chuin Samuel athouvin, Eli henga chun achekitnin, Hikoma kaume; ajehchu nangman neikou monge, ati. Chuin aman adonbutnin, Kakoupoi, kachapa; galum kittan, ati.

⁷Tun Samuel'in Pakai chu ahehih laijin, Pakai thujong chu ahenga akiphong hihlaije.

⁸Chuin athumvei channa-in Pakaiyin Samuel akoukitnin ahi. Chuin ama athouvin, Eli henga achen, ajah-a, Hikoma kaume; ajehchu nangman neikou monge, ati. Chuin Eli'n Pakaiyin chapang chu akou ahi ahedohtan ahi.

⁹Hijeh chun Eli'n Samuel henga, Chen, galum kittan; chule hitiding ahi, aman nahinkou kitna ahileh, nangman, Seijin, Pakai, nasoh in kajanai natiding ahi, ati. Chutichun Samuel aumna-a agalumtai.

¹⁰Chuin Pakai ahungin, adingin, amasa-a bangchun, Samuel, Samuel, tin akouvin ahi. Hichun Samuel'in adonbutnin, Seijin; ajehchu nasoh-in kajanai, ati.

¹¹Chuin Pakaiyin Samuel jah-a, Ven Israel sunga thilkhat kabolding ahin, hichun ajachan nakhang asutding ahi.

¹²Hiche nikho chule Eli douna-a a-insung chungchanga kanasei jousechu kaboldoh ding; kakipat tengle achaina jong kabolding ahi.

¹³Ajehchu aman ahetsa khansetna jeh-a, a-insung chu a-imatih chana athu katan ding ahi tia kahilsa ahitai. Ajehchu achapa tenin thilse abol lhonin, aman amani anaphoh tangpoi.

¹⁴Chule hichejeh-a chu keiman Eli insung chunga kana kihahsela, Eli insung khansetna chu ganlhai le anneh thilto-a jong a-itih-a suhtheng thei hilouding ahi, kanati ahi, ati.

¹⁵Chuin Samuel chu jingkah geijin alumin, Pakai in kot ho ahongin ahi. Chule Samuel'in Eli henga athilmu hetsah dingchu akichalheh-in ahi.

¹⁶Hichun Eli'n Samuel akouvin, ajah-a, Kachapa Samuel ati. Chuin Samuel'in adonbutnin, hikoma kaume, ati.

¹⁷Chuin aman, Pakaiyin nahenga aseichu ipithu ham? kangeh nahi, Keija konin imhih-in: nahenga aseijouse chu kahenga na-im auma ahile, Pathen'in nahenga chutobang chun chule akhohcheh-in jong bolhen, ati.

¹⁸Chuin Samuel'in thujouse chu ahilin, chule ahenga imacha a-im aumpoi. Chuin aman, Ama Pakai ahin, aman pha asah sah chun bolmaihen, ati.

¹⁹Chuin Samuel chu ahung khanglen jep jepmin, Pakaiyin aumpin, chule ama thuho chu khatcha jong tolla alhah sahpon ahi.

²⁰Chuin Dan'a pat Beersheba geijin Israelte jousen Samuel chu Pakai themgao khatnin akitung dohtai ti ahetauve.

²¹Chuin Shiloh'a chun Pakai ahung kilah kitnin ahi: ajehchu Pakai thu dungjuija Shiloh'a chu Pakai amatah Samuel henga kiphongdoh ahi.