Read Thado Chin 1 Samuel 30 Bible Online

1 Samuel 30 - Thado Chin bible

1 Samuel 30

¹Chuin ahitin ahi, nithum ni-a David le aloiho Ziklag ahung lhunun, Amalek miten lhanggam le Ziklag ana buluvin, Ziklag kho chu anasatnun, meijin ahalun;

²Chule asunga um numei ho chu gal hingin akaijun, alen le aneo khatcha thatlouvin akaimangun, achetauve ahi.

³Hitichun David le aloiho chu khopi ahunglhung taovin, chuin veuvin, meijin ana kihal vamin; ajiteu le achapateu, chule achanuteu gal hingin anakai taove.

⁴Chuin David le alhonpi mipi chu ka nadinga tha aneilou geijun, hakan akaptaovin ahi.

⁵ Chule David jiteni Jezreel mi Ahinoam le Carmel mi Nabal jinu Abigail chu gal hingin anakai taovin ahi.

⁶Chule David chu ahesoh lheh jengtan ahi; ajehchu amitakip achapate le achanute dinga alungkham cheh jeh-un, mipin ama songa seding agotauve. Ahinla David amatah Pakai a-Pathen'a akitil khouvin ahi.

⁷ Chuin David'in Abiathar thempu Ahimelech chapa henga, Nahenga katao ahi, thempu sangkhol chu eihin choipeh-in, ati. Chuin Abiathar'in thempu sangkhol chu David henga ahinchoi tai.

⁸Chuin David'in Pakai adongin, Hiche mihonpi chu kanungdel dingham? del leng kaphah jouding ham? atin ahi. Chuin aman adonbutnin, Delin: ajehchu nangman naphah teitei ding, thonlouva nahuhdoh sohding ahi, ati.

⁹Chutichun David le aumpi jagupho chu acheuvin, Besor vachadung ahung lhungun, ami dalhahho chu chuachun aumtaove.

¹⁰Ahinla David le mipi jali chun anungdel uvin ahi; ajehchu mi jani chu alhahsam behseh jeh uva Besor vachadung galkai joulouva umdena ahitaove.

¹¹Chuin amahon gamlah-a chun Egypt mikhat amuvin, David henga ahinpuijun, changlhah apeuvin ahile aman anen; chule donding twi jong apeuvin ahi.

¹²Chuin theichang changlhah halkhat le lengpithei gop bohni apeuvin; chuin aman aneh phatnin, atha ahungkile kittan ahi. Ajehchu nithum le janthum an nelou twi donlouhel ahitai.

¹³Chuin David'in ajah-a, Koija nahiham? chule Hoilama kon nahim? ati. Chuin aman keima Amalek mikhat soh, Egypt gollhang kahi; kadamlou jeh-in kapun nithum masang chun eidalhatan ahi.

¹⁴Chereth mite lhanglam, Judah te gamsung, chule Caleb gam lhanglam kabulu uvin, chule Ziklag chu meijin kahalun ahi, ati.

¹⁵Chuin David'in, Hiche loiho henga chu neipuisuh theiding ham? ati. Chuin aman, Neitha louding le kapu khutna neipehdoh loudingin Pathen'a kihahsel in, chule hiche loiho henga chun puisuh nange, ati.

¹⁶Chuin aman apuisuh phatnin, veuvin, amaho tollhanga anakithe jalun, Philistine gam le Judah gama kona thil tamtah achomdoh jeh-u chun, aneovin, adonnun, alamun ahi.

¹⁷Chuin David'in amaho chu khovah tila pat ajing nilhah lam geijin asatnin: sangongsang chunga touva hoidoh gollhang jali tilou mi khatcha asohchapon ahi.

¹⁸Chule David'in Amalek miten apoh mangho chu akilelah sohkeijin: David'in ajiteni jong ahuhdohtai.

¹⁹Chule amahon anachomu alen ahin, aneo ahin, achanuteu ahin, achapateu ahin khatcha lhasam umlou helin David'in alelah sohkeijin ahi.

²⁰Chuin David'in kelngoihon holeh bonghonho chu alasoh keijin, hiho chu gancha dangho masanga ahoijun, Hihohi David galthil chom ahi, atiuve.

²¹Chuin David alhahsam behseh jeh-a David juijou louva mi jani ho heng, Besor vachadunga aumsah hou henga chun ahungin; chule amaho David le ahinlhonpi mipi ho chu lamtodin apotdoh-un ahi. Chuin David'in miho heng ahinnai phatchun, amaho chu chibai aboh-in ahi.

²²Hichun David kilhonpi ho lah-a migilouho le Balial miho jouse chun adonbutnun, Amaho ilah uva ahung pantha loujeh-u chun, akipuijuva ache theina ding uva ajiteu le achateu ipeh-u tailou akichom thilho jouse chu khatcha ipeh lou dingu ahi, atiuve.

²³Chuphatnin David'in, Kasopite ho, Pakaiyin eihoidoh uva, eiho doudinga hunga mihonpi chu ikhutnuva eipedoh uva kona eipeh-u thilho hi chutichun bolhih-un.

²⁴Ajehchu hiche thua hi kon nathu-u angai dingham? galsat dinga konpa chan jatjat chu thilchinga pangpa jong changding ahi: amaho akibang banga kihom dingu ahi, ati.

²⁵Chule chuche nikho-a pat tuni geihin, Israelte din chutichun houdan thupeh le chondanin achepehtai.

²⁶Chuin David Ziklag'a ahung phatnin, agalthil chomho phabep chu Judah upaho, agolho geijin athotnin, ajah uva, Veuvin, Pakai melma te-a kon galthil kichomdoh nangho dinga thilpeh ahi, atin;

²⁷Bethel'a umho, Ramoth lhanglama umho, chule Jattir'a umho,

²⁸Aroer'a umho, Siphmoth'a umho, chule Eshtemoa'a umho,

²⁹Rachal'a umhole Jerahmeel mite khopiho-a umho, chule Ken mite khopi ho-a umho,

³⁰Hormah'a umhole, Chorashan'a umho, chule Athach'a umho,

³¹Chule Hebron'a umhole, David amatahle aloiho umna munjouse-a henga chun athot tan ahi.