Read Thado Chin 1 Samuel 31 Bible Online

1 Samuel 31 - Thado Chin bible

1 Samuel 31

¹Tun Philistine ten Israelte dounan gal ahinbolun: chule Israel mitechu Philistine te masanga konin ajamun, Gilboa molsanga chun akithat chap jengun ahi.

²Chule Philistine ten Saul le achapate hatah-in ajuijun; chule Philistine te chun Saul chapate Jonathan, Abinadab, chule Melchishua chu athat taovin ahi.

³Chuin Saul douna gal kisat chu anasa lheh jengin; thalthem ho-a konin nasatah-in amachangtan ahi.

⁴Chuphatnin Saul'in agalvon popa jah-a, Nachemjam satdoh inlang neisunpai jengin; achutiloule hiche cheptan louho khu hunguntin eisununtin, eijumso getnunte, ati. Ahinla agalvon popa anompoi; ajehchu kicha behseh jenga ahi. Hijeh chun Saul'in chemjam alan, achung chu abotan ahi.

⁵Chuin agalvon popan Saul athi amuphatnin, aman jong achemjam chu abokhumin amatoh athi thatai.

⁶Chuti chun Saul le achapate thum, agalvon popa le amiho jouse chu chuche nichun athigam taove.

⁷Chuin Israel mipi phaicham pang langkhatna umhole, Jordan pang langkhat lama umhon Israel mite ajama Saul le achapate athiu chu amuphatnun, khopiho adalhaovin ajamtaovin ahi. Chuin Philistine te ahungun, asunga acheng taove.

⁸Chuin ajingin ahitin ahi, Philistine te akithatho von sutdinga ahung phatnun, Saul le achapa thumho chu Gilboa molsanga alhuh chapmu amutaovin ahi.

⁹Chuin amaho alu atanun, agalvon asutlhaovin, amilim hounao inho le mipi ho lah-a phonjal dingin Philistine te gamsunga athot kimvel taovin ahi.

¹⁰Chuin agalvon chu Astaroth insunga akoijun: along chu Beth-shan banga akanbeh-un ahi.

¹¹Chuin Philistine ten Saul abolnau chu Jabesh-gilead'a chenghon ajah phatnun;

¹²Mihangsan jouse akipatnun, jankhon acheuvin, Saul le achapate longchu Beth-shan kulbanga konin alauvin, Jabesh'a ahungun, hikoma chun ahaltaove.

¹³Chuin aguho chu alauvin, Jabesh kho-a thingphung noi khatna avuijun, nisagi an angolun ahi.