Read Thado Chin 1 Samuel 4 Bible Online

1 Samuel 4 - Thado Chin bible

1 Samuel 4

¹Chuin Samuel thu chu Israelte jouse henga ahung lhungtan ahi. Tun Israelte chu Philistine te satdin akondoh taovin, Ebenezer panga ponbuh asongun: Philistine te chun Aphek mun'a ponbuh asongun ahi.

²Chuin Philistine te chu Israelte satdingin amaho le amaho akigol toh-un: chuin gal akisat phatnun Israelte chu Philistine te masanga agallel taovin; chule amahon galmuna chun galsat mi sangli tobang athat taovin ahi.

³Chuin mipi chu gebuh ahunglhun phatnun Israel upaho chun, Ipijeh-a tunia Pakaiyin Philistine te masanga eigol lel sah-u ham? Shiloh'a konin Pakai kitepna thingkhong chu eiho henga dingin gapodoh-u hitin, hichu ilah uva ahungteng, hichun igalmiteu khutna konin eihuhdoh theijunte, atiuve.

⁴ Hijeh chun mipichun Cherub teni kikah-a cheng janel Pakai kitepna thingkhong chu chua kona agapoh theina diuvin Shiloh'a mi asolun: chule Eli chapateni Hophni le Phinehas chu Pathen kitepna thingkhong chutoh chukoma chun aum lhonin ahi.

⁵Chuin Pakai thingkhong chu gebuh ahunglhun phatnin Israelte jousen ha aovin a-aovun, hitichun leiset akithong leovin ahi.

⁶Chuin Philistine ten gingleng lunga a-ao ginu ajah phatnun, Hebrew miho gebuh-a ging lenglung khu ipithu hitam, akitiuvin ahi. Chuin amahon Pakai kitepna thingkhong gebuh hunglhung ahi ti ahechen taove.

⁷Chuin Philistine ten Gebuh-a Pathen hunglut ahi atiuvin akicha taovin ahi. Chuin amahon, Ohe idau ahi! ajehchu tumasangin hitobang thil anasoh khapoi.

⁸Ohe idau ahi! hiche hat chungnung Pathenho khutna kona kon eihuhdoh diuham? Hichehohi gamthipma Egypt mite hivei jouse-a sugama Pathenho chu ahiuve.

⁹Vo nangho Philistine te, nangho soh-a ana um banguva, Hebrew mite soh-a naum louna dingun hatnunlang, kipasal sah-un: nangho kipasal sah-un lang, satnun atiuve.

¹⁰Chuin Philistine techun asatnun, Israelte chu jo-in aum taovin, chule amaho amitakip aponbuh lam cheh uva ajam taovin; chule nasatah-a kithana aumin ahi: ajehchu Israelte chu keng sepai sangsomthum athiuvin ahi.

¹¹Chule Pathen kitepna thingkhong chu alah peh-un; chule Eli chapateni Hophni le Phinehas jong athat taovin ahi.

¹²Chuin sepai lah-a konin Benjamin phunga kon mikhat alhaijelin, apon teldehduh le aluchanga leiset pumin hicheni mama chun Shiloh'a alhailutnin ahi.

¹³Chuin ama ahungphatnin, veuvin, Eli chu lampamah touna chung khatna atouvin, anaven ahi: ajehchu Pathen kitepna thingkhong jeh chun alungsung akithingin ahi. Chule mipa khopi sunga ahunglut phatchun aseijin ahile khopi pumpi mihochu hakan akaptaovin ahi.

¹⁴Chule Eli'n ka awgin chu ajah phatnin, Hiche awging lullul khu ipithu hitam? ati. Chuin mipa chun kinotah-in ahungin, Eli ahung hiltai.

¹⁵Tun Eli chu kum somko le kumget ahitan; amit athimin, kho amuthei tapon ahi.

¹⁶Chuin mipan Eli jah-a, Keima sepai lah-a kona hungdoh-a kahin, tunia hi sepaiho lah-a kona hungjam doh kahi, ati. Chuin aman, Kachapa, chukoma chu ipi soh em? ati.

¹⁷Chuin thupopan adonbutnin ajah-a, Philistine te masanga chun Israelte ajamun, mipi lah-a chun nasatah-a kithana aumin, chule nachapa teni Hophni le Phinehas jong athi lhonin, Pathen kitepna thingkhong jongchu alataove, ati.

¹⁸Chuin ahitin ahi, aman Pathen kitepna thingkhong aphahpoh phatnin, kotpi phung sih-a chun atouna-a konin anung lhuh-in, angong atat bongin, athitan ahi; ajehchu ama tehse ahin, gih-a ahi. Chule aman kum somli Israelte thu anatanin ahi.

¹⁹Chule amounu Phinehas inneipi chu naovopma soh koncha ahi: chuin aman Pathen kitepna thingkhong kilahle atehpu le a-inneipu thithu ajah phatnin, ama abungin nao aneitan ahi. Ajehchu anatchu achunga hunglhung ahitai.

²⁰Chuin ama athikon chun akoma ding numei ho chun, Kicha hih-in; ijeh inem itile chapa khat nahin ahi, atiuve. Ahinla amanun adonbut tapon, ngaijong angaisah tapoi.

²¹Hichun amanun naosen min chu Ichabod asah-in, Loupina chu Israel'a konin akitol mangtai ati: Pakai kitepna thingkhong kilahpeh jeh le, atehpu le a-inneipu jeh ahi.

²²Chuin amanun, Loupina chu Israel'a kon kitolmang ahitai: ajeh chu Pathen thingkhong kilahmanga ahitai, ati.