Read Thado Chin 1 Samuel 5 Bible Online

1 Samuel 5 - Thado Chin bible

1 Samuel 5

¹Chuin Philistine ten Pathen thingkhong chu alauvin, Ebenezer'a konin Ashdod'a ahinpouvin ahi.

²Philistine ten Pathen thingkhong ahinlah phatnun, Dagon in'a ahinpouvin, Dagon koma akoi taovin ahi.

³Chule ajing jingkah matah-a Ashdod miho atho phatnun, veuvin, Dagon chu Pakai thingkhong masanga chun amai tollam ngan analhutan ahi. Chuin amahon Dagon chu adomdoh-un akitunna mama-a chun atung kitnun ahi.

⁴Chuin ajing jingkah matah-a atho phatnun, veuvin, Dagon chu Pakai thingkhong masanga chun amai tollam ngan analhun; chule Dagon luchang le akhutphang teni chu tanbohsan kotbula chun anaumin, Dagon tahsa chubou ana kidalhan ahi.

⁵Hijeh chun Dagon thempupa hihen lang, Dagon insunga hung koi hijongle, Ashdod'a Dagon kotphung chu tuni geijin achon pouvin ahi.

⁶Ahinla Pakai khutchu Ashdod mite chunga gihsatah-in achun, chule amaho chu asumangin, Ashdod le agam kimvela chengho chu uilutnin [2] ajepmin ahi.

⁷Chuin Ashdod miten hichu amuphatnun, Israel Pathen thingkhong hi eihotoh umthei ponte: ajehchu ama khut chu eiho chungle i-pathen'u Dagon chunga anasa behseh jengin ahi, atiuve.

⁸Hijeh chun amahon Philistine te milen milal jouse ahenguva akou khomun, Israel Pathen thingkhong hi i-ilo diuham? atiuve. Chuin amahon adonbutnun, Israel Pathen thingkhong chu Gath lama kipotahen, atiuve. Chuin Israel Pathen thingkhong chu chulama chun apotaove.

⁹Chuin ahitin ahi, hichu chulama apoh nungun, Pakai khutchu suhgamna nasatah-in khopi dounan achun; khopi sunga mite chu alen aneo abonun ajepmin, achunguva uilut achutan ahi.

¹⁰Hijeh chun amahon Pathen thingkhong chu Ekron'a asoltaove. Chuin ahitin ahi, Ekron'a Pathen thingkhong ahunglhun phatnin, Ekron mite chu apeng jah-un, Amahon eiho le imiteu thatgam dingin Pathen thingkhong chu eiho henga ahinpouve, atiuvin ahi.

¹¹Hijeh chun Philistine milen milal ho jouse chu agakoukhom sah-un, ahenguva, Israel Pathen thingkhong hi solmangun, chule eiho imiteu eitha louna dingin aum namun mama-a chekit tahen, atiuve. Ajehchu hiche khopi jouse sunga chu suhgamna nasatah uma ahitan; Pathen khut chu gihsatah-a chua ahitai.

¹²Chule mihem athilouho chunga chun uilut achun; chule khopi-a kana awgin chu van alhung touvin ahi.