Read Thado Chin 1 Samuel 6 Bible Online

1 Samuel 6 - Thado Chin bible

1 Samuel 6

¹Pakai thingkhong chu Philistine gama lhasagi aga umin ahi.

²Chuin Philistine ten thempuho le doithemho akouvun, ahenguva, Pakai thingkhong chu ikalodiuham? Aumna ngaija chu iti kasol diuham? neisei peh-un, atiuve.

³Chuin amahon, Israelte Pathen thingkhong chu nasol ule agoh-in solhih-un, ahinla suhkhel thilto khattoh nalesoltha teidiu ahi; chuteng nadam uva, ipijeh-a nangho-a kona akhut achondoh louham ti nahet dingu ahi, atiuve.

⁴Hichun amahon, Amatoh kalesol tha dingu suhkhel thilpeh dingchu ipi hiding ham? atiuve. Amahon adonbutnun, Philistine te milal ho jat dungjuija uilut lim sanatum ngale sana jucha lim nga; ajehchu nabon chaova chungle namilen milal hou chunga chu natna kibang chua ahi.

⁵Hijeh chun gamsung suse na-uilutnu limle najucha limu chu nasem uva; chule Israel Pathen chu loupina napeh dingu ahi. Chuti henlang hile nanghole na-pathen hou, chule nagam uva konin akhut ajangkhaisah domding ahi.

⁶Chuti ahile ibola Egypt mite leh Pharaoh banga nalungu natahsah uham? Aman alah uva kidangtah-a na atoh phatna chu amahon mipi achedohsah uva, chule amaho potdoh-u hilouham?

⁷Hijeh chun tun kangtalai thah khat semun lang, namkoljon pokhalou bongpi noi kilhohlai ni kaijun, chule bong kang chuto sutouvin lang, anouteni chu amani-a konin inlama hinkaijun.

⁸Chule Pakai thingkhong chu domun lang bongkang chunga koijun; chule suhkhel thilpeh ding sana tum amato nung soltha dinga nasemhou chu thingkhong khatna khumun lang apanga koijun; chule achemang nadingin solmangun.

⁹Chule Beth-shemesh lampia ama gamkaija chu chetoupeh-am veuvin; achetou peh-a ahile hiche thilse khohtahhi amabol hija ahi; amavang achetoupeh louva ahile, eisugimuva chu ama khut ahipon, achama ichunguva hungsoh ahi ti ihetdiu ahi, atiuve.

¹⁰Chuin mihon achuti bolun, bongpi noi kilhohlai ni akaijun, chule bongkang chuto asutouvin, chule anouteni chu in'a ahentup taove.

¹¹Chuin Pakai thingkhong le sana jucha lim le uilut lim umna thingkhong chu bongkang chunga chun akhangdoh taove.

¹²Chuin bongpi tenichun Beth-shemesh jotna lamchu ajonjang lhonin, kun pumin lamlhongpi chu ajotpeh lhonin, jetle veija apetdoh lhonpoi; chule Philistine milal hochun Beth-shemesh gamgi geijin ajuipeh-un ahi.

¹³Chule Beth-shemesh mihochun phaichama chu asuhlou changu ana-atnu ahin: amaho akhoda uva ahile thingkhong chu amutaovin, hiche amujeh-u chun akipah lheh-un ahi.

¹⁴Chuin bongkang chu Beth-shemesh khomi Joshua lou ahung lutnin, chua songpi lentah khat umna-a chun adingtai. Chuin amahon bongkang thingchu a-eh un, bongpi tenichu Pakai henga govam thilto-in atoh taove.

¹⁵Chuin Levi hon Pakai thingkhong le aumpi sana manluho umna thingkhong chu alalhauvin, songpilen chunga chun akoitaove. Chule Beth-shemesh mihon hiche nikho mama chun Pakai henga govam thiltoho le ganlhainaho abol taovin ahi.

¹⁶Chuin Philistine milal ngahon hiche amuphatnun, hicheni mama chun Ekhron'a akile taove.

¹⁷Chule Philistine ten Pakai henga suhkhel thilto dinga ahin nungsolu uilut lim sanatumho chu ahile; Ashdod dinga khat, Gaza dinga khat, Ashkelon dinga khat, Gath dinga khat, chule Ekron dinga khat ahin;

¹⁸Chule sana jucha limho chu, kul kikai khum khopiho le thinglhang khoneoho puma Philistine te milen milal nga ho khopi jouse jat dungjuija ahin, Pakai thingkhong akoilhahnao Abel songpilen chung geichu ahi. Hiche songpi chu Beth-shemesh mite Joshua loulaija chu tuni geijahi umjing nalai ahi.

¹⁹Chuin amahon Pakai thingkhong sung avetjeh-un, Aman Bethshemesh mihochu athatnin; mipi ho lah-a mi sangsomnga le somsagi jen athatnin ahi. Pakaiyin mipichu tamtah atha jeh-in mipi chu alunghem taovin ahi.

²⁰Chuin Beth-shemesh miho chun, Hiche Pakai Pathen thengtah masanga hi koiham adingjou dinga? Chule eihoa kona ama koihenga chedoh dingham? atiuve.

²¹Chuin amahon Kirjath-jearim kho miho henga thupole ho asolun, ahenguva, Philistine ten Pakai thingkhong ahinpokit taove; hungsuh-un lang naheng uva potaovin, atiuve.