Read Thado Chin 1 Samuel 7 Bible Online

1 Samuel 7 - Thado Chin bible

1 Samuel 7

¹ Chuin Kirjath-jearim miho chu ahungun, Pakai thingkhong chu apotouvun, thinglhanga Abinadab insunga apolutnun, achapa Eleazar chu Pakai thingkhong chingtup dingin athenso taove.

²Chuin ahitin ahi, Kirjath-jearim'a thingkhong chu phat sottah aumin ahi; ajehchu kum somni jen uma ahi. Hitichun Israel insung pumpi chun Pakai lhangaijin akachamun ahi.

³Chuin Samuel'in Israel insung jouse jah-a, Nangho nalung pumpiuva Pakai henga hungkile nahiuva ahile, nalah uva konin gamchom pathenho le Ashtaroth chu koimangun; chule Pakaiya din nalungu gongtup unlang, amabou jenun: chutile aman Philistine te khutna kona nahuhdoh dingu ahi, ati.

⁴Hichun Israel ten Baalim le Ashtaroth chu akoimangun, Pakai bou ajentaove.

⁵Chuin Samuel'in, Israelte chu abonchauvin Mizpeh'a khom khomun, chule keiman Pakai henga nataopeh uvinge, ati.

⁶Chuin Mizpeh'a akikhom khomun, twi athalun, Pakai angsunga asunglhaovin, hiche nikho chun an angolun, Keiho Pakai dounan kachonse taove, atiuve. Chuti chun Samuel'in Israelte chu Mizpeh'a athu-u atanin ahi.

⁷Chuin Philistine ten Israelte Mizpeh'a akikhom khomuve ti ajah phatnun, Philistine milal ho chu Israelte doudingin akontouvin ahi. Chuin Israel chaten hichu ajah phatnun, Philistine te chu akicha taovin ahi.

⁸Chuin Israel chaten Samuel henga, Philistine te khutna kona eihuhdoh nadingun Pakai ka-Pathen'u hengu keiho dingin tanglouvin neitao peh-un, atiuve.

⁹Chuin Samuel'in kelngoinou noicheplai khat alan, apumin Pakai henga govam thilto-in atohdoh-in: Israelte din Pakai henga ataovin; Pakaiyin asanpehtan ahi.

¹⁰Chuin Samuel'in govam thilto ato laijin, Philistine te chu Israel satdin ahung naijun ahi. Ahinla Pakaiyin hiche nikho chun Philistine te chunga vangin nasatah aginsah-in, alungboi sah-in, Israelte masanga agal lel taovin ahi.

¹¹Chuin Israel mite chu Mizpeh'a konin apotdoh-un, Philistine te chu anungdelun, Beth-car aphah kahseovin athatpeh-un ahi.

¹²Chujouvin Samuel'in song khat alan, Mizpeh le Shen kah-a atungin, chuin Hichan geijahi Pakaiyin eipanpiu ahi atin, aminchu Ebenezer asahtai.

¹³Chutichun Philistine te chu suhnemin aumun, chule amaho Israelte gamsunga ahungkit tapouve. Samuel nikho laisen Pakai khutchun Philistine te adou jingin ahi.

¹⁴Chule Philistine ten Israel te-a kona analah khopiho chu Ekron'a pat Gath geijin Israelte alepeh kit tan; chule agam kimvelho jouse jongchu Philistine te khutna konin Israel ten alelah kit taovin ahi. Chule Israelte le Amor mite kah-a chun chamna aumin ahi.

¹⁵Chule Samuel'in ahinlai sungin Israelte thu anatanin ahi.

¹⁶Chule akumseh'in Bethel le Gilgal, chule Mizpeh'a achekol lejingin, hiche munho-a chun Israelte thu atanjin ahi

¹⁷Chule Ramah'a chun a-in aumjeh'in ahungkile kitjin; chule hia chun Israelte thu anatanjin; hia chun Pakai dingin maicham khat asemin ahi.