Read Thado Chin 1 Samuel 8 Bible Online

1 Samuel 8 - Thado Chin bible

1 Samuel 8

¹Chuin ahitin ahi, Samuel ateh phatnin achapa teni chu Israelte chunga thutandin apansah tan ahi.

²Tun achapa lenpenpa minchu Joel ahin; aninapa minchu Abiah ahi: amanichu Beersheba-a thutan ahilhone.

³Chule achapa teni chu ama lampia achelhonpon; ahin alam louva sum muding agolhonin, nehguh akilah lhonin, chule thudih chu aheikon lhonin ahi.

⁴Hichun Israel upaho jouse chu akikhom khomun, Samuel henga Ramah'a ahungun,

⁵ Chule ajah-a, Ven, nangla natehtan, nachapa tenila nang lampiho-a achelhon poi; tun namdangho jouse bangin kathu-u tanding leng khat neisem peh-un, atiuve.

⁶Ahinla amahon, Kathu-u tanding lengkhat neipeuvin, tia aseiju chun Samuel alung phatmo sah-in ahi. Chuin Samuel Pakai henga ataotan ahi.

⁷Chuin Pakaiyin Samuel henga, Mihon nahenga aseijouse chu ngaipehtan, ajehchu amahon nangma napaiju ahipon; amavang achunguva vai kahom louna dinga keimajoh eipaiju ahibouve.

⁸Egypt gama kona kahinpuidoh-a pat tuni geija athilbol jouseu dungjuija keima eidalhah uva, pathen dang ajenjiu banga chu, nangma henga jong abolu ahi.

⁹Hijeh chun tun amaho thuchu ngaipeh-in: ahijeng vangin amahochu gihsalin lang, achunguva leng changdingpa thutan dingdan chu musah-in, ati.

¹⁰Chuin Samuel'in Pakai thuho jouse chu leng neipeuvin tia ngeh-a mipi ho henga chun ahiltan ahi.

¹¹Chuin aman, Hichehi nachung uva lengchang dingpa thutan dingdan chu hiding ahi: aman nachapateo chu ama-a dinga alah-a, akangtalaiho-a ding le asakol sepai dinga apansah ding, chule abang asakol kangtalai masanga lhaiding ahiuve.

¹²Chule aman asang chunga gallamkai, somnga chunga gallamkai dinga apansah ding; chule amaho chu alou lhouding, achang atding, agalmanchah semding, chule asakol kangtalai ho manchah sema apansah ding ahi.

¹³Aman nachanuteu chu gimnamtui semding, anhon ding, chule changlhah semdinga akilahding ahi.

¹⁴Chule aman nalouhou, nalengpi leihou, chule na-olive honhou chu aphapenho kisana alah-a, asohte apehding ahi.

¹⁵Chule aman namuchi houle nalengpigao somakhat alah-a, avaipoho le asohte apehding ahi.

¹⁶Chule aman nasoh pasal hou le nasoh numei hou, chule nagollhang phapenhou le nasangan hou chu alah-a, ama na atohsah ding ahi.

¹⁷Aman nakelngoi honhou somakhat alahding: chule nangho ama soh-a napan dingu ahi.

¹⁸Chule hiche nikho chule nanakilhenu lengpa jeh-a chu nahung ka diu; chule hiche nikho chule Pakaiyin nanangai peh loudingu ahi, ati.

¹⁹Ahijeng vangin mipichu Samuel thusei chu ngaiding anompouvin; amahon, Ahipoi, kachunguva leng khat kaneitei dingu ahi.

²⁰Chutia chu keiho jong namdangho jouse tobang kahidiu; chule kalengpaovin kathu-u eitan pehdiu, chule kamasanguva lamkaija kagalu eisatpeh dingu ahi, atiuve.

²¹Chuin Samuel'in mipi ho thujouse chu angaijin, chuin abonchan Pakai nakhang sunga akhumsoh kitnin ahi.

²²Chuin Pakaiyin Samuel henga, athuseiju ngaipeh inlang leng khat tundoh pehtan, ati. Chuin Samuel'in Israel miho henga chun, Amitakip nakhopi cheh uva chetaovin, ati.