Read Thado Chin 1 Samuel 9 Bible Online

1 Samuel 9 - Thado Chin bible

1 Samuel 9

¹Tun hichelai chun Benjamin mikhat amin Kish kiti Abiel chapa, Zeror chapa, Bechorath chapa, Aphiah chapa, Benjamin mi, mihat thuneitah khat aumin ahi.

²Chule aman gollhang dei umtah le hoitah amin Saul kiti chapa khat aneijin: chule Israel chate lah-a chun ama sanga hoija mi aumpoi. Alengkouva pat chunglamse chu midangho vuma sangdoh ahi.

³Chuin Saul pa Kish sanganho chu amangin ahile Kish'in achapa Saul jah-a, Tun kipat in, nasoh ho lah-a khat kipuijin lang, sanganho holin chen, ati.

⁴Chuin aman Ephraim molsang ajotpeh-in, Shalisha gamsung ajotnin, ahinla amanin amujou lhonpon ahi. Chuin Shalim gamsung ajotpeh lhonin, chua jong chun anaum pouvin ahi. Chuin Benjamin gamsung ajotpeh lhonin, ahinla amudeh lhonpoi.

⁵Chuin amani Zuph gam ahunglhung lhon phatnin, Saul'in ahin kilhonpi asohpa jah-a, Hungin, kileta hite, achuti loule kapa sanganho chung sangin eini chunga lungkham jogetninte, ati.

⁶Chuin aman ahenga, Ven, tuhin hiche khopi sungahin Pathen mi khat aume, chule amachu ja umtah mi ahin; aman asei jouse guilhung jengji ahi. Tun hilama chun chehite; ijem atile ichena lhonding lampi eihil theilhon khattou vinte, ati.

⁷Hichun Saul'in asohpa jah-a, Ahinla ven, eini chelehen mipa chu ipi ichoipeh dingham? Ajehchu ibelsung lhona changlhah la abeisohtan, Pathen mipa choipehding thilpeh dingla aumpon: ipi ineijem, ati.

⁸Chuin sohpa chun Saul adonbut kitnin, Ven, keiman kakhutna dangka shekel khat hoplia hopkhat aume; ilampi lhonding eihil lhon nadingin, hichehi Pathen mipa chu petange, ati.

⁹(Masanglaijin Israel gama Pathen thudoh neidinga mi achetengle, Hungin, mitvah neipa henga chehite, ana tijiuve. Ajehchu tu-a themgao kitihi masanga chu mitvah neipa kitiji ahi).

¹⁰Chuin Sual'in asohpa henga, Naseidih-e; hungin, chehite, ati. Chuti chun Pathen mipa umna khopi-a chun achelhon tai.

¹¹Chuin khopi jotna lhanga chu akaltou lhona ahile, soh nungah ho twithal dinga hungpot dohho amulhonin, ahenguva chun, Mitvah neipa chu umam? atilhone.

¹²Chuin amahon amani chu adonbutnun, Aumnai, ven, ama namasang lhona ache-e; tun kikinsah lhonin, ajehchu ama tunia hi khopi-a hunga ahi; ajehchu tunia hi munsanga mipi ganlhaina umding ahi:

¹³Khopisung nalut lhonlhonle munsanga an ne-a ache masanga namupai jeng lhonding ahi: ajehchu ama ahunglhun masanga mipihon an anehlou dingu ahi, ajehchu aman ganlhaina chu phatthei aboh-a, chujou teng akikouho chun anehdiu ahi. Hijeh chun tun chetou lhonin, tuphat donnahi ama namu lhonding ahi, atiuve.

¹⁴Chuin khopi sunga chun achetou lhontai: amani khopisung ahunglut lhon phatnin, veuvin, munsanga cheding chun Samuel chu amani henglam jonin ahunge.

¹⁵Saul hunglhun masanga nikho-a chu Pakaiyin Samuel nabenga hitia anasei ahitai,

¹⁶Jing nikho tuphat don hileh Benjamin gama kon mikhat kahinsol ding ahin, amachun Philistine te khutna kona kamite ahuhdoh theina dinga, kami Israelte chunga gallamkai dinga amachu thao nananu ding ahi: ajehchu akanao kaheng ahunglhun tahjeh-in, kamite chu kakhohsah tan ahi, ati.

¹⁷Chuin Samuel'in Saul amuphatnin, Pakaiyin ahenga, Ven! keiman nahenga kanasei mipa chu, hiche mipa hin kamite chunga vai apohding ahi, ati.

¹⁸Chuin Sual'in kotpi phunga chun Samuel chu agah naijin, Katao ahi, mitvah neipa in chu hoilaiham neihilin, ati.

¹⁹Chuin Samuel'in Saul adonbutnin, Keima mitvah neipa chu kahi: munsang lama chun kamasanga chetouvin; ajehchu nangman tunia hi keima toh an ineh khomding, chule jingtengle kasol bepding; nalungsunga um jouse chu kahil ding nahi.

²⁰Chule nithum masanga anamanga nasangan hou thudola vang, amaho chunga chun lungkham hih-in; ajehchu amahochu amutaove. Chule Israelte ngaichat ho jouse chu koichunga umam? Nangmale napa insung pumpi chunga uma hilouham? ati.

²¹Chuin Saul'in adonbutnin, Keima Israel phung jouse lah-a aneopen Benjamin mi kahi louham? chule ka-insung jong Benjamin phunga alhumpen hilouham? achutile ipijeh-a kahenga hitobang chu naseiham? ati.

²²Chuin Samuel'in Saul le asohpa chu kikhopna in'a ahin puilutnin, akikouho lah-a mun loupi pena atousah-in ahi: amaho chu somthum tobang ahiuve.

²³Chuin Samuel'in anhonpa jah-a, Nahenga, Atum beh-in koijin, tia kapeh sachan chu hinchoitan, ati.

²⁴Chuin anhonpan adah le achunga umhochu adomdoh-in, Saul anga aluitai. Chuin Samuel'in, Ven, anakikhen khenna chu hiche hi ahi, na-anga akiluije; ne-in; ajehchu, Keiman mipi ho kakouve kati-a pat tuchana hi nangma dinga anakikoi ahi, ati. Chutichun hiche nikho chun Saul'in Samuel to anekhomin ahi.

²⁵Chuin munsanga kona khopi sunga ahungsuh phatnun, Samuel'in indan chunga chun Saul akihoulimpin ahi.

²⁶Chuin matah-in athouvun; nisa sophat donin ahitin ahi, Samuel'in Saul chu indan chunga chun akou touvin, ajah-a chun, Kasoldoh theina dingin thouvin, ati. Chuin Saul athouvin, amale Samuel chu achedoh gel lhontai.

²⁷Chuin khopi pam geija achesuh lhon laijin, Samuel'in Saul jah, Sohpa hi imasang lam lhona ache nadingin solin, (ama achetai,) ahin nangma vang Pathen thu kamusah theinadin chomkhat dingdenin, ati.