Read Thangal Naga MATHAI 10 Bible Online

MATHAI 10 - Thangal Naga bible

MATHAI 10

¹Tualeh aman nungjui sawmlehnihte a sapkhit in, akiang uah kha-ni`nte tung a thuneihna apia a, amauhte hawlkhia ding leh damlouhna chiteng leh natna chiteng damsak ding in.

²Tualeh sawltak sawmlehnihte min ahihleh hihte ahi: amasa penin, Simon, Peter zong kichi leh a sanggampa Andru; Jebedi tapa Jakob leh a sanggampa Johan;

³Philip leh Bartholomai; Thoma leh siah dongpa, Mathai, Alphai tapa Jakob leh Lebbai, amin khem Thaddaite;

⁴Kananmi Simon, leh juausan a mansakpa Juda Iskariotte.

⁵Hih sawmlehnihte Jesu`n a sawlkhia a, tualeh hichi`n thu apia a: “Jentelte lampi ah paikei unla, Samaria mite khuapi ah lut kei un.

⁶Hinanleh Israel nam belam mangte kiangah paijaw un, achi hi.

⁷‘Tualeh na pailai un, van gam anaita!’ chi`n tangthupha genjel un.

⁸Damloute damsak unla, phakte bawlsiangthou unla, misite kaithou unla, dawite hawlkhia unla, athawn a na muh uh ahi a, athawn in pia un.

⁹Na dangka bawm kawnggak uah kham hiam, sumsan hiam, daan dangka hiam kengkei un;

¹⁰na khualhawhna a dingin thungpi hiam, puan-ak nih hiam, khedap hiam, chiangkhut hiam kengkei un, nasemmi pen anek mutak ahi.

¹¹“Tualeh khuapi hi`n khua khat peuhpeuh ah nalut chiang un, nou hungtungsak theiding mi zongkhia unla, na pawtkhiat masiah uh tuamun ah om kinken un.

¹²Tualeh innsung a nalut ding chiang un, ‘Chibai buk un.’

¹³Inn neite khamuanna tangtak ahih uleh, na khamuanna thu uh atung uah tung hen, ahihhang in khamuanna tangtak ahihkei uleh na khamuanna thu uh noukiang ah hung kileh kik hen.

¹⁴Tualeh kuapeuh nou hung vaitun nuam loua, nathu uh zong angaihnuam kei uleh, tua inn a kipan hiam, khuapi a kipan a na paichiang un, na kengphang ua leivui thingkhia un.

¹⁵Adiktak in na kiang uah kung hilh ahi, thukhenni chiangin tua khuapite sangin Sodom leh Gomorrah gamte thuak ding adan a omjaw ding hi.

¹⁶“Ngaiin! ngia lak a belam om bangin kung sawlkhia hi. Tuajiakin gul bangin pil unla, vakhu bangin poikhoihlou in om un.

¹⁷Hinanleh mihing lak ah pilvang un, denchiah vaihawmmite maiah a hungtun kha ding ua, a kikhopna inn lak uah ahung jep kha ding uhi.

¹⁸Tualeh keimah jiakin gam vaihawmtute leh kumpipate maiah Jentelte leh amauhte dikna lahna dingin nou ahung paipih ding ua.

¹⁹Hinanleh tuachia nou ahung piakkhiat hun chiang un bang chiding, bang gen ding ka hia chi`n lungkham kei un; na gen ding uh ahuntak in na kiang uah piak in na om ding uhi.

²⁰A genpa pen noumah na hikei ding ua, hinanleh na Pa uh kha in noumah sung pan in agen nading hi.

²¹“Tuin thah dingin a sanggampa`n a sanggampa amansak ding a, pa in a tate a mansak ding a, tate in anu leh apa a dou ding ua; a thatsak ding uhi.

²²Tualeh ka min jiakin mijousiah huat nahi ding ua, hinanleh kuapeuh atawptan a thuakjoute hundam ahi ding uhi.

²³Hinanleh hih khuapi a ahung gawt uleh khuapi dang ah taikhia un. Adiktak in na kiang uah kung hilh ahi, Mihing Tapa a hungpai masiah Israel khuapite na tuansuak kei ding uhi.

²⁴“Nungjui khat pen a siapa tung ah a omngai kei; sila khat zong apu tung ah a omngai kei.

²⁵Nungjui khat a siapa banga a om, tualeh sila khat zong apu banga aom ahun hi. Innneipa bawn Beelzebul chia asap uleh, a inn kuanpihte bangzah in ahahchih sem tading ua le!

²⁶“Tuajiakin amauhte laukei un. A kilanglou ding a phual bangmah a omkei a, tualeh theihlouh ding a im bangmah a omkei hi.

²⁷Mialnuai a nou kung thuhilh jousiah, va`k ah gen unla, tualeh na bilkawm ua na ja`kte uh inntung vum pan in phuangkhia un.

²⁸Tualeh taksa pumpi thatthei hinanleh kha thattheiloute laukei unla; hinanleh meidil a ataksa pumpi leh kha anih a hihmang theipa, amah laujaw un. [13]

²⁹Vatou nih daan dangka khat in a juakjel uh hilou maw? Ahihhangin alak ua khat zong na Pa uh theihlouh in tual ah akiakei ding hi.

³⁰Hinanleh, na lutung ua samzangte nangawn simsiang ahi.

³¹Tuajiakin lau kei un; vatou tampi sang in na manpha jaw uhi!

³²“Tuajiakin kuapeuh mite mai a kei hunggum jousiah, ken zong van a om ka Pa maiah amah ka gum ding hi.

³³Hinanleh kuapeuh mite mai a kei hung kitheihmoh bawl jousiah, ken zong van a om ka Pa maiah ka kitheihmoh bawl ding hi.

³⁴“Leitung ah lemna tunding a hungpai hungsa kei un. Lemna lengsak ding a hungpai ka hikei a, namsau lengsak ding a hungpai ka hijaw hi.

³⁵Tapa in apa, tanu in anu, mou in a inpinu dousak ding a hungpai ka hi hi;

³⁶tualeh mi agalte amah innkuanpihte lak a mi mah ahi ding.

³⁷“Kuapeuh anu hiam apa hiam kei sang a itjawte pen kami hitaklou ahi uhi. Tualeh kuapeuh atanu hiam atapa hiam kei sang a itjawte zong kami hitaklou ahi uhi.

³⁸Tualeh kuapeuh a kross pua a ka nung hungjuiloute pen kami hitaklou ahi uhi.

³⁹Kuapeuh ahinna mu in ata`n ding a, tualeh kuapeuh kei jiaka ahinna ta`n in amu ding uhi.

⁴⁰“Kuapeuh nou hung kipahpihte pen kei hung kipahpih ahi a, tualeh kuapeuh kei hung kipahpihte pen kei hung sawlpa kipahpih ahi uhi.

⁴¹Kuapeuh Jawlneite Jawlnei ahihjiak a kipahpih in Jawlnei nuamman amu ding. Tualeh kuapeuh midiktatte midiktat ahih jiak a kipahpih in midiktat nuamman amu ding.

⁴²Tualeh kuapeuh hih mineute lak a khat kiang a nungjui ahih jiaka tuivot noukhat mai piate zong, adiktak in kung hilh ahi, a nuamman muh ding ata`n kei ding uhi.”