Read Thangal Naga MATHAI 12 Bible Online

MATHAI 12 - Thangal Naga bible

MATHAI 12

¹Tuahun in, Jesu khawlni in buhleilai kan in apai a, tualeh a nungjuite agil uh akial a, buhvuite asiktan ua aneta uhi.

²Hinanleh Pharisaite`n hua amuhtak un a kiangah, “En in, na nungjuite`n khawlni a bawl ding a sianglou abawl uh!” achi ua.

³Hinanleh aman a kiang uah, “David in agilkiallai ua alawite tawh abawl uh simkhalou nahi uhiam?

⁴Tuachia Pasian inn a lut a, amah leh alawite`n nek sianglou, siampute guak neksiang tanghou koih anek thu uh.

⁵Ahihkeileh, khawlni in tempul sung a siampu omten khawlni azahlouh ua zong siamtan in a omjel uh chih da`nthu ah simkhalou nahi uhiam?

⁶Hinanleh hihsan ah Pasian tempul sang a thupijaw khat aom chih na kiang uah kung hilh ahi.

⁷Ahihhang in nou, kithoihna deihlou in zahngaihna ka deih chih a omdan na theikhinta hile uchin, mawhna neiloute mawhpaihlou ding hi uchin a;

⁸Mihing Tapa jaw khawlni Toupa ahi,” achi hi.

⁹Tualeh huasan a pan apaikhiat khit takin, a kikhopna inn uah ava lut a,

¹⁰ngaiin, huasan ah khutjeng mi khat ana om a. Amah amohmat theihna ding un, “khawlni a sukdam asiang diam?” chi`n adong ua.

¹¹Tuachi`n aman a kiang uah, “Noute lak ah kuahiam in belam khat nei unla, khawlni in kuakhuk ah kiataleh, kua ahia tu a kaikhialou ding?

¹²Belam khat sang in mihing khat bangzahta a manphajaw ahiam! Tuajiakin, khawlni a silhoih bawl asiang hi,” achi hi.

¹³Tuachi`n aman hua mipa kiangah, “Na khut jankhia in,” achi a. Tuachi`n ajan a, akhut langkhat bangin a damsiangta hi.

¹⁴Tuachi`n Pharisaite apawt khia ua amah a thahtheih nang dan ding uh ngaihsun in a kihou ua.

¹⁵Hinanleh Jesu`n hih atheihtak in, hua a kipan in aki hemmangta a; tualeh mi tampi`n amah ajui ua, ana damsak siang a,

¹⁶aman a tanchin athansak louhna ding un ataihilh hi.

¹⁷Tuapen Jawlnei Isaiah in:

¹⁸“En in, ka sila, katel, ka ittak, ka lungsim in apahtat mahmah, ka kha a tungah ka koih ding a, tualeh aman Jentelte kiangah thudik a vaihawmna thu a phuangkhia ding.

¹⁹A selkei ding a, a kikou kei ding, khualai kongjing lak ah kuaman a aw ajakei ding.

²⁰Thudik a vaihawmna a gualzoh sak mateng, pumpeng gaw ahihtan kei ding. Meivak kuang leplep ahihmit kei ding,

²¹tualeh amah ah Jentelte`n kinepna anei ding uh, chia anagente ahung tangtun theihna ding in.”

²²Tuachi`n dawimat mittaw leh hamtheilou khat a kiangah ahung paipih ua, aman ana damsak a, tuachi`n mittaw leh hamtheilou mipa`n hung mutheiin ahung hamtheita hi.

²³Tuachi`n mipi tengteng in lamdang asa mahmah ua; “Hihpa David tapa hilou amaw?” achi ua.

²⁴Hinanleh Pharisaite`n ajaktak un, “Hihpa dawite vaihawmpa Beelzebul jiak louin dawite a hawlkhiathei kei ding,” achi uhi.

²⁵Hinanleh Jesu`n a ngaihsut uh athei a akiang uah, “Gam khatpeuh kikhen a kidou pen a kisiagawp ding a, tualeh khuapi ahihkeileh innkuan khat kikhen a kidou pen a khuasuak kei ding.

²⁶Tualeh setan in setanmah a hawlkhiat leh amah leh amah kidou asuak ding a, agam bangchi`n ading tadiai!

²⁷Tualeh Kei Beelzebul jiak a dawite hawlkhia kahihleh na tate un kuajiak a ahawlkhiat ata diai le? Tuajiakin amauhte noute tung a thukhenmite ahi ding uhi!

²⁸Hinanleh Kei Pasian kha jiak a dawite hawlkhia kahihleh, Pasian gam na kiang uah hungtung ahita hi.

²⁹“Ahihkeileh, min mihatpa ka`n masa loupi`n bangchi`n mihatpa inn a lut in avante alathei dia? Ka`n masa in tuazoh chiangin a inn asuksiat sak pan ding hi.

³⁰“Kuapeuh kei lam a pangloute, kei hungdou ahi ua, kuapeuh ahung lakkhawmpih loute athehjak ahi uhi.

³¹Tuajiakin na kiang uah kung hilh ahi: mi akhialhna jousiah uh leh Pasian a gensiatna jousiah uh ngaihdam ahi ding a; hinanleh kha hilhial gensiatna pen ngaihdam ahikei ding.

³²Kuapeuh Mihing Tapa kalh a thu gen pen, ngaihdam ahi ding a; hinanleh khasiangthou kalha thu gen pen, tuin zong, hun hungtung ding ah zong ngaihdam ahikei ding hi.

³³“Singkung ahoih agah zong ahoih; nachih kei ding uleh, singkung asia, agah zong asia, chivanglak un, singkung agah a kithei ahihjiak in.

³⁴Nou gulsuante aw! Gilou napi`n nou bangchi`n thuhoih na genthei ding ua? Lungsim a dimlet kam in agen jel hi.

³⁵Mihoih in agoubawm hoih sung a kipan silhoihte ahung lakhia a; migilou in a goubawm hoihlou sung a kipan silhoihloute ahung lakhia jel hi.

³⁶“Hinanleh na kiang uah kung hilh ahi, mi`n akam ua thuginalou agen jousiah uh, tuathu pen vaihawmni chiangin agen ding.

³⁷Na thuin siam ahung tangsak ding a, na thu mah in siamlouh ahung tangsak ding hi.”

³⁸Tuachi`n Pharisaite leh Laigelhmite`n akiang ah adong ua, “Siapa, na kiang a pan chiamtehna kamu ut uh,” achi ua.

³⁹Hinanleh aman adawng a akiang uah, “Khangthak giloutak leh angkawm hatte`n chiamtehna azong ua, hinanleh Jawlnei Jona chiamtehna chihlouh akiang uah chiamtehna dang mawng mawng piak ahikei ding,” achi hi.

⁴⁰Jona nithum leh ja`nthum ngapi gilsung a aom bangin; Mihing Tapa zong nithum leh ja`nthum leigil sungah aom ding hi.

⁴¹Ninevi khua mite thukhenni chiangin tulai khangthakte tawh ahung ding ding ua, siamlouh atangsak ding uh; Jona thugenna a akisiktak jiak un. Ataktak in Jona sang a lianjaw hihsan ah a om hi!

⁴²Simlam kumpinu thukhenni chiangin tulai khangthakte toh ahung thoukhawm ding ua, siamlouh atangsak ding, Solomon pilna ngaikhia dingin bawn leitawp a kipan a a hungpai jiakin. Ataktak in Solomon sang a lianjaw hihsan ah a om hi!

⁴³“Tuachi`n kha nin mihing a kipan ahung pawtdok a, omna ding zong in mun-gaw lak ah avak a, amukei hi,

⁴⁴Tuachi`n aman, ‘Ka pawtkhiatna ka inn mah ah ka nungkik mai ding achi a.’ Tuachia a hungpai leh ahawm, phiatsiang leh zepsa a om in amu a.

⁴⁵Tuachi`n apai a amah sang a hoihloujaw kha nin adang sagih avapui a, huasan ah lut in, atengta ua, tuachi`n hua mipa omdan nunung pen amasapen sang in ahung siajawta hi. Tuamah bangin tulai khangthak giloute tungah ahung om ding,” chi`n adawng hi.

⁴⁶Mipite lak a thu agen laiin, ngaiin, anu leh a sanggamte amah houpih sawm in inn pualam ah ading uhi.

⁴⁷Tuachi`n mi khat in a kiangah, “En in, nanu leh na sanggamte nang hung houpih nuam in inn pualam ah ading ding uhi,” achi hi.

⁴⁸Hinanleh aman akiang a vahilhpa kiangah, “Ka nu kua ahia? Ka sanggamte zong kua ahi ua?” achi a, adawng a.

⁴⁹Tuachi`n aman a nungjuite lam nga in akhut azankhia a, “Hihsan ah ka nu leh ka sanggamte a om uh! achi a, adawng a.

⁵⁰Van a om ka Pa deihlam bawlte ka sanggampa, ka sanggamnu leh ka nu ahi,” achi hi.