Read Thangal Naga MATHAI 13 Bible Online

MATHAI 13 - Thangal Naga bible

MATHAI 13

¹Tuani mah in Jesu inn a pat a pawtkhia a tuipi geiah atou a.

²Tuachi`n mipi tampitak a kiangah ahung kikhawm ua, tuachi`n amah gunkuang sungah atuang a, mipite piaugei ah ading uhi.

³Tuachi`n aman a kiang uah gentehna tampi agen a. “Ngaiun, khaichi thehpa khaichi theh in a kuankhia hi.

⁴Tualeh athehlaiin, khaichi khenkhat lamsik ah atu a, vasate hungpaiin ane siangta uhi.

⁵Khenkhat suangsilei lak ah atu a, leitak atamlouh jiakin ahung poupai a.

⁶Hinanleh ni ahung suah in haivul in ahung om a; thagui thuklut aneihlouh jiak un a gawsiangta uhi.

⁷Tualeh akhen ling lak ah atu a, lingte hungkhang in amauhte a depmangta hi.

⁸Hinanleh adangte leihoih lak ah atu a, hungkhang in gah hungnei in: akhen in zakhat, akhen in sawmguk, akhen in sawmthum bang.”

⁹“Kuapeuh ja`kna ding bil nei jousiahin ja heh!” achi hi.

¹⁰Tualeh a nungjuite hungpaiin a kiang ah, “Bang ding a amauh kiang a gentehna a thu gen nahia?” achi ua.

¹¹“Aman adawng a akiang uah, ajiak van gam thugu`k pen noute theihding a piak nahita ua, hinanleh amauhte piak ahinai kei.

¹²Kuapeuh aneite piak behlap ahi ding a, ahau ding, hinanleh kuapeuh aneiloute, aneihsun zong amah a pan laksak ahi ding.

¹³Tuajiakin akiang uah gentehna in thu ka gen ding ahi, munapi-in a muthei kei ua, zana pi-in a zathei kei ua, a theithei kei uh.

¹⁴Tuachi`n Jawlnei Isaiah in ana genkholh atung uah ahung tangtungta hi: ‘Jak jaw naja ding ua, hinanleh na theithei kei ding uh; tualeh muhjaw na mu ding ua, hinanleh na muthei kei ding uh,

¹⁵hih mite lungtang a nguaigawpta, abilte uh abing a, tualeh amit asi`ngta uhi. Atuachih keileh amit un a mukha ding ua, abil un ajakha ding ua, alungtang un atheisiam kha ding ua, ahung kinungleh kha ding ua, amauh kana damsak kha ding achia,’ ana chih pen.

¹⁶“Hinanleh nou mit pen ahampha hi amuh jiak in! Nabil uh zong ahampha hi ajak jiak in.

¹⁷Adiktak in kung hilh ahi, Jawlnei tampi leh midik tampi in zong na silmuhte uh muh a ut ua, hinanleh amukei uh, na silzakte uh zong jak a ut ua, hinanleh azakei uhi.

¹⁸“Tuajiakin, khaichi thehpa gentehna thu ngai un.

¹⁹Kuahiam khat in kumpi gam thu ajak a, tuapen a theihsiam keileh, migilou khat hungpaia a lungtang a thehsa pen ahung laksak hi. Hihpen lamsik a khaichi tute ahi uhi.

²⁰Hinanleh kuapeuh suangsilei lak a khaichi tute ahihleh, thu aja a kipaktak in apompai hi.

²¹Hinanleh amah ah thagui thuklut aneihlouh jiakin tomnoukhat sung a om a, thu jiak a gimthuakna hiam, gawtna hiam ahung om takin apukpai hi.

²²Kuapeuh ling lak a khaichi tute ahihleh thu ja a, leitung awlmohna leh hauhsakna khemna in thu a dep a, gahlou in ahung omta hi.

²³Hinanleh kuapeuh leihoih lak a khaichi tute ahihleh thu ja a, theisiam ahi: tuachi`n gah anei takpi a, akhen zakhat bang, akhen sawmguk bang, akhen sawmthum bang a hung pungte ahi uh,” achi hi.

²⁴Gentehna dang akiang uah agen kik a: “Van gam ahihleh mi alou a khaichi hoih thehpa tawh teh ahi.

²⁵Hinanleh louneipa a ihmut kal in, agalpa hungpaiin buhtak lak ah buhkhem atheh a apaimangta hi.

²⁶Tuachi`n buh ahung pou a, ahung vuih takin buhkhem zong ahung kilang a.

²⁷Tuachi`n innneipa silate hung paiin akiang ah, ‘Pu, lou ah khaichi hoih thehlou nahi hiam; buhkhem ahung om bang chidan ahia?’ achi ua.

²⁸Aman akiang uah, ‘Melma bawl ahi,’ achi hi. A silate`n akiang ah, ‘Huate vapai a kavalak uh nungphal hiam?’ achi ua.

²⁹Hinanleh aman, ‘Phallou e, atuachih keileh buhkhem na lakna lak uah buhtak zong na bawtkhawm kha ding uh.

³⁰Buhlak hun dongin poukhawm phot uhen, buhlak hun chiangin buhlate kiangah, amasa in buhkhemte lakhawm phot masa unla, hal dingin kankhawm un, tualeh buhtakte ka buh inn ah koihkhawm un, kachi na ding achi hi.’”

³¹Gentehna dang akiang uah a genkik a: “Van gam pen ankam tang chi mi`n alak a alou a atheh tawh kibang ahi.

³²Khaichi tang lak ah neupen ahi a, hinanleh ahung pousang chiangin loupa dang sang in alianjaw a, sing ahung suak a, tuachi`n tungleng vasate a hungpai ua, aba lak ah agiak uh,” achi hi.

³³Gentehna dang akiang uah agen kik a: “Van gam ahihleh tol numei in alak a annel tehna thum lak a atheh a, athawh masiah aphum tawh kibang ahi,” achi hi.

³⁴Hihte tengteng Jesu`n gentehna in mipite kiangah agen a; gentehna louin akiang uah bangmah agen kei hi.

³⁵Jawlnei in Gentehna in, “Ka kam ka kak ding a, leitung pianchil a kipan sil kisel ka genkhia ding,” chia agen ahung tangtun theihna ding in.

³⁶Tuachi`n Jesu`n mipite khakhia in innsung ah alutta a, tualeh a nungjuite akiang ah hungpai in, “Lou a buhkhemte gentehna thu kou kiangah hung hilhchian in,” achi ua.

³⁷Aman adawng a akiang uah, “Khaichi hoih thehpa pen Mihing Tapa ahi a;

³⁸alou ahihleh leitung ahi a, khaichi hoihte ahih uleh van gam tate ahi uh a; tualeh buhkhemte pen migilou tate ahi uhi;

³⁹melma athehpa ahihleh dawi gilou ahi a, buhlak hun ahihleh huntawpni ahi a, buh atte ahihleh vantungmite ahi uhi.”

⁴⁰Tuajiakin buhkhemte a lakkhawm ua mei a ahal mah bang un, hun tawpni chiangin a om ding:

⁴¹Mihing Tapa in vantungmite asawl ding a, a kumpi gam a kipan in siatna sil bawlte leh mikhialte tengteng a khawmkhia ding ua,

⁴²haltuina meipi lak ah amauhte apai ding hi. Tuamun ah kah leh hagawina aom ding hi.

⁴³Tuahun chiangin midiktatte ahihleh a Pa uh kumpi gam ah nisa bang in avakta ding uhi, jakna ding bilnei jousuah in ja uhen!

⁴⁴Gentehna dang ahihleh, “Van gam ahihleh lou a gou kiphualdap bang ahi, tuapen mi`n amuh a aphualdap a, a kipak sengseng jiakin apai a aneih jousiah a zuaksiang a tua lou alei hi.”

⁴⁵Tualeh van gam pen sumsinmi tuikepsuang hoih zong bang ahi kik hi,

⁴⁶aman tuikep suang mantam tak khat amu a, aneih jousiah azuak a aleita hi.

⁴⁷“Tualeh, van gam ahihleh ngen, tuipi a khuh a namchin tuamkhawm bang ahi kik hi.

⁴⁸Tuapen adim chiangin, apiau ah a kaikhia ua, atou ua: ahoihteng bawm sung ah akhum ua ahoihlou teng apai uhi.

⁴⁹Huntawpni chiangin huachi bang in aom ding, vantungmite ahung paikhia ding ua, midiktat lakpan in mikhialte a khenkhia ding ua

⁵⁰tualeh amauhte haltuina meidil ah apai ding uh, tuamun ah kah leh hagawina a om ding hi.”

⁵¹Jesu`n akiang uah, “Hih silte jousiah na theisiam uai?” achi a. Amauhte`n akiang ah, “Hi, Toupa,” achi ua.

⁵²Tuachi`n Jesu`n akiang uah, “Tuajiakin laigelhmi van gam hilh a om jousiah, innneipa a goubawm a kipan a sillui leh silthak hung pholhkhia bang ahi,” achi hi.

⁵³Tualeh hichi ahi a, Jesu`n hihbang gentehna thute agenzoh in tuamun a kipan in a pawtkhiata a

⁵⁴tuachi`n a omna khua a hungtung a, a kikhopna inn uah amauhte thu ahilh a, amauhte`n lamdang asa mahmah ua, “Hih mipa`n pilna leh hihbang sil thupi septheihna khoia akilak ahia?

⁵⁵Hihpa sing bawlsiampa tapa hilou amaw? Anu Mari kichi hilou amaw, tualeh a sanggamte Jakob, Joseph, Simon leh Judah hilou uh maw?

⁵⁶Tualeh a sanggam numeite eite tawh omkhawm hilou maw? Hihpa`n khoisan a kipan a hihte jousiah mu ahia?” achi ua.

⁵⁷Tuachi`n a tungah ahehta ua, hihnanleh Jesu`n akiang uah, “Jawlnei jaw ama khualam leh ama innlam ah chihlouh ngal pahtawi louh in a om kei,” achi hi.

⁵⁸Tualeh agintat louh jiak un tuamun ah nasep thupi dang atambawl kei hi.