Read Thangal Naga MATHAI 15 Bible Online

MATHAI 15 - Thangal Naga bible

MATHAI 15

¹Tuachi`n Jerusalem khua a om Pharisaite leh laigelhmite Jesu kiangah a hungpai ua,

²“Bangding a na nungjuite upate thugousiah banglou tak a om uh ahia? An anek chiang un akhut uh asilngai kei uh!” achi ua.

³“Hinanleh aman adawng a akiang uah, bangding a nou zong na thugousiah jiak ua, Pasian thupiak danlou bang tak a om nahi ua? achi hi.

⁴Pasian in, ‘Na nu leh napa zaktak in, Kuapeuh anu hiam apa hiam gensiate pen si teitei heh,’ achi hi.

⁵Hinanleh nou, kuapeuh anu hiam apa hiam kiang a, ‘Kei a kipan a phattuamna na muh ding jousiah uh Pasian kiang ah piak ahita,’ chi jousiahin, anu leh apa azah ding ahikei nachi ua,

⁶Tuachi`n, na thugousiah jiak un Pasian thu pen bangmahlou na suaksakta uhi. [15]

⁷Nou lepchiahte! Isaiah in na tungtang thu uh ana genkholh dik mahmah hi!

⁸“ ‘Hih mite`n akam un a hungnaih ua, amuk un a hungzah ua, hinanleh a lungtang un ahung gamlat uhi.

⁹A thuhilhna uah mihing thupiak ahilh jiak un, ahung biak uh pannabei ahi, chi in a dawng hi!’ ”

¹⁰Tuachi`n mipite asam a akiang uah, “Ja unla theisiam un!

¹¹Kam a lut mihing ninsak a pang ahikei; hinanleh, kam a pawt hua in mihing aninsakjaw,” achi hi.

¹²Tuachi`n a nungjuite a hungpai ua a kiangah, “Pharisaite`n hua thu ajaktak un aheh uh chih nathei ei?” achi ua.

¹³Hinanleh aman a dawnga akiang uah, “Kung tengteng van a ka Pa suanlouh jousiah bawhkhiat in aom ding,” achi hi.

¹⁴“Amauhte awlmoh kei un! Amauh mittaw lak a mittaw lamkaite ahi uh: Mittaw in mittaw mah a lamkaihleh kawkhuk ah a kiakhawm ding uh, achi hi.”

¹⁵Tuachi`n Peter in a dawng a akiang ah, “Hih gentehna kou kiangah hung hilhchian in,” chi`n adong a.

¹⁶Tuachi`n Jesu`n, “Tutan a nou zong theihsiamna neilou a om nalai nahi uh maw.

¹⁷Kam a lut jousiah gilsung ah alut a, dailenna ah paihkhiat in a om chih theinailou lai nahi uh maw?

¹⁸Hinanleh kam a pawtte pen lungtang a kipan-a hungpawt ahi ua, huate mah in mihing aninsakjaw hi.

¹⁹Lungtang a kipan in ngaihtuahna giloute, tualthahnate, angkawmnate; kingaihnate guktatnate, heknate, gensiatnate hungpawt veu hi.

²⁰Hihte ahi mihing ninsak, khut sillou a annek in mi a ninsakkei,” achi hi.

²¹Tuachi`n Jesu hua a kipan in apawt a, Tura leh Sidon gam lam ah apaita hi.

²²Tualeh ngaiin, hua gam a kipan Kanan numei khat a hungpawt a, “Aw Toupa, David Tapa! Ka tungah zahngaiin! Ka tanu dawiin aman a agim mahmah,” chi`n a kikou hi.

²³Hinanleh aman kamkhat in zong a dawng kei hi. Tualeh a nungjuite hungpaiin a kiangah, “I nungah aki koukou a! Paisak maiin,” chi`n ahung ngen ua.

²⁴Hinanleh aman a dawng a, “Israel nam belam mangte kiang chihlouhngal ah sawl ka hikei,” achi hi.

²⁵Tuachi`n numeinu a hungpai a, “Toupa hung panpih in!” chi`n chibai a hungbuk hi.

²⁶Hinanleh aman a dawng a, “Tate tanghou laksak a, uinoute kiang a paih akilawm kei,” achi hi.

²⁷“Toupa, hihjaw ahia, Hilehzong uite`n apu an nekna dohkan pan a tanghou them kia anejel ve uale,” achi a.

²⁸Tuatakin Jesu`n akiang ah, “Aw numei, na ginna thupi na tazen e! Na deih bangtak in na tungah omta hen,” achi a, adawng a. Tuachi`n a tanu huahun mahmah in ahung damta hi.

²⁹Tualeh Jesu hua a pat in a paikhia a, Galili tuipi gei a hungtung a. Tualeh mual ah a paitou a, huasan ah atouta hi.

³⁰Tuachi`n mipi tamtak, kengbaite, mittawte, hamtheiloute, piangsualte leh midang tampi tonpih in a kiangah a hungpai uhi. Tualeh Jesu kengbul ah amauhte asial ua; tuachi`n aman amauhte ana damsak chiatta hi.

³¹Tuachia hamtheiloute ahung hamtheih ua, piangsualte a hunghoih ua, kengbaite keng a pai a, mittawte`n ahung mutheita uh chih amuhtak un; mipite`n lamdang asa mahmah ua, tuachi`n Israelte Pasian a pahtawita uhi.

³²Tuachi`n Jesu`n a nungjuite a kiangah asam a, “Mipite tuin ka kiangah nithum a omta ua, nek ding bangmah aneihlouh jiak un ka hehpih mahmah a, amauhte anngawl in ka paisak utkei; ahuachih keileh lamkal ah abahsam kha ding uh,” achi a.

³³Tuachi`n a nungjuite`n a kiangah, “Mipi hih zahzah vahna khop tanghou gamdai ah khoiah ila dia?” achi ua.

³⁴Jesu`n akiang uah, “Tanghou phel bangzah nanei ua?” achi a. Tualeh amauhte`n, “phelsagih,” leh “ngasaneu themkhat tawh,” achi uhi.

³⁵Tuachi`n aman tual a tou dingin mipite thu apia a.

³⁶Tuachi`n aman tanghou phel sagih leh ngasate ala a, kipahthu agen a, abalkek a, nungjuite apia a, tuachi`n nungjuite`n mipite kiangah apia uhi.

³⁷Tuachi`n aun un ane ua, avah chiatta ua, anekval nen uh zong lawh sagih aluak dim uhi.

³⁸Anete numei leh naupang simlouh in piching ngen zong sangli ahi uhi.

³⁹Tualeh mipite a sawlkhiat nung in gunkuang ah a hungtuang a, Magdala gam lam ah a hungpaita hi.