Read Thangal Naga MATHAI 16 Bible Online

MATHAI 16 - Thangal Naga bible

MATHAI 16

¹Tuachi`n Pharisaite leh Sadukaite a hungpai ua, amah ze-etna dingin van a kipan chiamtehna amaute ensak dingin a ngen ua.

²Aman a dawnga akiang uah, “Nitaklam ahih chiangin, ‘khua apha ding a hinteh meisan hungsuak na chi uhi.’

³Tualeh, jingsang chiangin, ‘Tuni khua asia ding a hinteh meisan asuak a a ngiamkai,’ na chijel uh. Lepchiahte aw, van omdan na theisiam ngel ua, hinanleh hun chiamtehnate na theisiam theikei uhi.

⁴Khangthak gilou leh angkawmhatte`n chiamtehna azong ua, hinanleh Jona chiamtehna chihlouh chiamtehna dang mawng mawng akiang uah piak ahikei ding uh, achi a. Huachi`n amauhte anusia a, apaisanta hi.”

⁵Tualeh a nungjuite`n galkhat lam atunkhit un, tanghou apua manghilh ua

⁶Tuachi`n Jesu`n akiang uah, Pharisaite leh Sadukaite tol lak ah kiveng unla, pilvang un, achi hi.

⁷Tuachiah amauhte aki ngaihtuah chiat ua, tanghou ipuakkhak louh jiak ahi, achi ua.

⁸Hinanleh Jesu`n hua athei a akiang uah, “Nou ginna tawmte aw, bangding a tanghou na puakkhak louh jiak ua kingaihtuah nahi ua!

⁹Mi sangnga vakna tanghou phel nga leh lawh bangzah hiam dim naluak uh chih tu nasan a theisiam nailou a, na lungsim ua zong theigige lou nahi uh maw?

¹⁰Ahihkeileh, mi sangli tanghou sagih leh lawh tampi naluak uh zong?

¹¹Na kiang ua tanghou thu gen ka hikei a, Pharisaite leh Sadukaite tol lak ah pilvang un chih gen ka hijaw chih bang achia theilou nahi ua?” a chi hi.

¹²Tuachi`n amau`n tol tanghou lak ah kiveng un chi hilou in Pharisaite leh Sadukaite thugin lak a pilvang dingin ahijaw chih a hung theita uhi.

¹³Jesu Kaisaria Philippi gam a hungtun in, a nungjuite kiangah, “Mite`n kei, Mihing Tapa kua ahi achi ua?” chi`n a dong a.

¹⁴Tuachi`n amau`n, “Khenkhat in baptispa Johan ahi ahung chi ua, khenkhat in Elijah ahi achi ua. A dangte`n Jeremiah ahihkeileh Jawlnei kuahiam khat ahi a hungchi uh,” achi ua.

¹⁵Aman akiang uah, “Ahihleh nou, Kei kua ahi nung chi ua?” achi a.

¹⁶Simon Peter in, “Krist, Pasian hing Tapa nahi,” achi a, adawng a.

¹⁷Jesu`n a dawnga akiang ah, “Simon, Jona tapa, hampha chia! Sa leh sisan in na kiang ah hih ahung theihsak na hikei a, ka Pa van a om in ahung theihsak nahijaw hi.

¹⁸Tualeh ken zong na kiangah kung hilh ahi, Nang Peter na hi: hih suangpi tung ah ka saptuam ka lam ding a, misikhua kulh kongkhakte`n hih bangmah alawhjou kei ding uhi.

¹⁹Tualeh van gam chabi na kiangah kung pia ding a, leitung a nahen jousiah vantung ah zong hen ahi ding a, leitung a naphel jousiah vantung ah zong phel ahi ding,” achi hi.

²⁰Tuakhit in amah Krist Jesu ahi chih kuamah hilhlou dingin a nungjuite thu apia hi.

²¹“Huahun a kipat in Jesu`n Jerusalem a apai ding dante, siampite leh laigelhmite pan a sil tampi athuak ding dante, thah a aom ding dante tualeh nithum ni a thoukik ding a hihdante a nungjuite ahilh panta hi.”

²²Tuachi`n Peter in amah atuam in apaipih a, “Toupa, hih in hung gamlat hen! tualeh hihbang sil na tungah a tungngai kei ding!” chi`n ataihilh hi.

²³Hinanleh amah akihei a Peter kiangah, “Setan! Ka nunglam ah om in, Kei a dingin kipalpukna nahi; Pasian silte ngaihsun louin mihing silte na ngaihsun jawk jiak in,” achi hi.

²⁴Tuachi`n Jesu`n a nungjuite kiangah, “Mi khatpeuh in ka nung ajuih-utleh amah ki manghilh in a kross pua in hungjui hen, achi hi.

²⁵Kuapeuh ahinna humbit in ata`n ding a, kuapeuh kei jiak a ahinna ta`n in amu ding hi.

²⁶Mi`n leitung pumpi nei henla, ahinna mansuah taleh, amah a ding in bang aphatuam diai? Ahihkeileh ahinna leinang in bang apiathei dia?

²⁷Mihing Tapa a Pa thupina tawh a vantungmite tawh a hungpai ding a, tuahun chiangin michih ana sepna bangbang un nuamman apia ding hi.

²⁸Adiktak in na kiang uah kung hilh ahi, hihsan a dingte mi khenkhat Mihing Tapa a kumpi lalgam a a hungpai amuh masiah uh sihna chiamlou ding aom uh,” achi hi.