Read Thangal Naga MATHAI 18 Bible Online

MATHAI 18 - Thangal Naga bible

MATHAI 18

¹Huahun laitak in nungjuite Jesu kiangah a hungpai ua, “Van gam ah kua alianpen dia?” achi ua.

²Tuachi`n Jesu`n naupang neu khat a kiangah asam a, alak uah adingsak a,

³“Adiktak in kung hilh ahi, na kikhel ua naupang neunou nungbak kei uleh, van gam ah na lut ngaikei ding uhi.

⁴Tuajiakin kuapeuh hih naupang neunou banga ki ngaingiam, huami van gam ah alianpen ahi ding hi.

⁵Kuapeuh ka min jiak a hichibang naupang neu khat kipahpih in keimah hung kipahpih ahi ding hi.

⁶“Hinanleh kuapeuh kei hung gingta mineute lak a khat khialhna puksak pen, a ngawng ah buhgawina suang lianpi awhsak in tuipi thuktak sung ah kikhialeh amah a dingin ahoihjaw ding.

⁷Puknate jiakin leitung tung agik hi! Puknate pen ahung om ding mawng ahi a, hinanleh pukna omsakpa tung agik hi!

⁸“Tualeh na khut in hiam, na keng in hiam khialhna a ahung puksakleh, tan inla paimang in! Khut nih hiam keng nih hiam nei a tangtawn meidil a paih a na om sangin, piangsual a, ahihkeileh kengbaiin hiam hinna a lut nang a ding in ahoihjaw hi.

⁹“Tualeh na mit in khialhna a ahung puksakleh kheikhia inla paimang in, mit langnih nei a gawtmun a lut sangin mit langkhat neia hinna a lut nang a ding in ahoihjaw hi.

¹⁰“Hih mineute lak a khat zong simmoh lou dingin pilvang un, ajiak a vantungmite un van a om ka Pa mel amu gige uh chih kung hilh ahi.

¹¹Mihing Tapa ahihleh mangthangte hundam ding a hungpai ahijaw hi.

¹²“Bang nachi ngaih ua? Mi khat in belam za nei henla, alak ua khat vakmang taleh, sawmkua leh kuate nusia in, mual ah paiin, a vakmang pen vazong lou ding maw?

¹³Adiktak in kung hilh ahi, va mukikta henla hileh sawmkua leh kuate tungah sangin, tua belam tungah a kipakjaw ding hi.

¹⁴Tuachimah bangin hih mineute lak a khat zong amanthat ding na Pa uh van a om deihlam ahikei hi.

¹⁵“Tualeh na sanggampa`n na tung a sil a bawlkhialh leh nougel guak theih in a khialhna ah hilh in, nathu angaihleh na sanggam na zou ahi.

¹⁶Hinanleh na thu angaih nuam keileh, ‘theihpihtu mi nih hiam thum hiam kam a hihkip a aomtheihna dingin, mi khat hiam nih hiam tonpih in.’

¹⁷Tuachi a amauhte thu angaihnuam kei laileh saptuamte kiang ah tun in. Hinanleh saptuam thu zong angaihnuam kei laileh amah pen nang a ding in lawki leh siahkhonmi bang in koih in. [16]

¹⁸“Adiktak in kung hilh ahi, leitung a na hen uh khatpeuh, van ah hen ahi ding. Tualeh leitung a naphel jousiah uh van ah zong phel ahi ding hi.

¹⁹“Adiktak in kung hilh kik ahi: leitung a nalak ua mi nih asilnget lam ua a kithutuak uleh ka Pa van a om bawlsak in aom ding uhi.

²⁰Mi nih hiam thum hiam ka min a akikhopna teng uah ka omjel hi,” achi hi.

²¹Tuachiang in Peter a hungpai a akiang ah, “Toupa, ka sanggam ka tung ah khialleh bangzahvei ahia ka ngaihdam ding? Sagihvei tanin ahi diam?” achi a.

²²Jesu`n a kiang ah, “Sagihvei tan in kung chikei, Sagihvei mun sawmsagih tan in kung chijaw ahi.

²³‘Tuajiakin van gam pen kumpipa kuahiam a silate kiang a dangka thu hihchian tum tawh kibang ahi.’

²⁴Ahihchian pat takin, mikhat talent sangsawm ba akiang ah ahung paipih ua.

²⁵Hinanleh piak ding a neihlouh jiakin apu in amah tawh, a zi tawh a tate tawh tualeh aneih jousiah tawh juak a dit ding thu apia hi.

²⁶Tuachi`n silapa`n khupbok in abia a, ‘Pu aw, ka tungah zahngai tadih inla, A un in kungdin ding!’ achi a.

²⁷Tuachi`n tua silapa pu-in ahehpih mahmah a, a khahkhia a, a batteng a ngaihdamta hi.

²⁸“Hinanleh hua silapa apawt a, asila hihpih lak a khat amah dangka zakhat ba avamu a. ‘Nabat hungpian!’ chi`n a ngawng ah amek a.

²⁹Huachi`n asila hihpihpa`n akeng bulah khupbok in, ‘Ka tungah zahngai tadih lai in, aun in kungdin ding!’ chi`n angen ngutngut a.

³⁰Hinanleh amah a utkei a; abat adit zoh masiah thong ah akhumta hi.

³¹Tuachi`n asila hihpihte`n asilbawl amuhtak un adah mahmah ua; tualeh hungpaiin asilbawl teng apu uh a hunghilhta uhi.

³²Tuatakin apu un amah asam a, a kiang ah, ‘Aw sila giloupa! Nung nget ngutngut jiak a na batteng hung ngaihdam ing a.

³³Ken nang kung hehpih bang a, nangzong na sila hihpihte na hehpih sawm ding hilou maw,’ achi a.

³⁴Tuachi`n apu ahehta a, a batteng apiakzoh masiah migawtte kiangah apiata hi.”

³⁵“Michih in na lunggiltak ua na sanggamte uh tatkhialhna na ngaihdam kei uleh, ka Pa van a om in zong tuachimah bang in natung uah abawl ding,” achi hi.