Read Thangal Naga MATHAI 19 Bible Online

MATHAI 19 - Thangal Naga bible

MATHAI 19

¹Tualeh hichi ahung hi a, Jesu`n hih thute agen khit in, Galili gam a pat apawt a, Jordan luigal a Judea gam lam ah a vapaita hi.

²Mihon tampi in amah ajui ua, huamun ah ana damsakta hi.

³Pharisaite zong a hungpai ua, amah ze-et nang in, “Bang jiak peuh in mi`n azi akhul asiang diam?” achi ua.

⁴Aman adawng a akiang uah, “A tu`ng a kipan amauhte siampa`n numei leh pasal ana siam hi chih Laisiangthou simkhalou nahi uh hiam?

⁵‘Hihjiakin pasal in anu leh pa nusia in azi atu ding, tuachi`n nih pen sapum khat ahung hita ding uh,’ achi hi, chih sim khalou nahi uh hiam?

⁶Tuachi`n amau nih ahi nawn takei ua, sapum khat ahita uhi. Tuajiakin Pasian gawmsa mihing in khen kei hen,” achi hi.

⁷Amau`n a kiangah, “Ahihleh bangding a Mosi in khulna lai piak a khulding ahi chia thu pia ahia?” achi ua.

⁸Aman a kiang uah, “Mosi in na lungtang uh khauh jiak a na zite uh khul ahung phalsak ahi, hinanleh atu`ng a kipan hihbang ahi-ngai kei hi.

⁹Kenjaw kung hilh ahi, kuapeuh midang tawh kingaihjiak hilou a, zi khul a midang tawh kiteng tuh angkawm ahi; kuapeuh khulsa tawh kiteng zong angkawm ahi,” achi hi.

¹⁰A nungjuite`n a kiangah, “Pasal azi tawh tungtang thu huachi ahihleh kiten ahoih kei,” achi ua.

¹¹Hinanleh aman akiang uah, “Hih thu kigen pen akiang ua piak a om mite loungal kuaman a pomthei kei ding uhi.

¹²Michilgeh khenkhat anu uh gilsung a kipan-a huachi bang a piang mawng a om ua; michilgeh khenkhat mihing gehthuh a om a, tualeh michilgeh van gam jiaka chilgeh a kibawl tawm zong a om uhi. Kuapeuh a pomthei in pom uheh,” achi hi.

¹³Huahun laiin atung ua akhut nga a a thumsak dingin a kiangah naupang neute ahung paipih ua; hinanleh nungjuite`n anatai ua.

¹⁴Hinanleh Jesu`n, “Naupang neute ka kiang a ahung pai ding uh phalsak un, amauhte kham kei un; van gam pen hichi bang mite a ahi,” achi hi.

¹⁵Tuachi`n atung uah akhut a nga a, hua a pat in apaita hi.

¹⁶Tualeh ngaiin, mikhat hung paiin a kiang ah, “Siapa hoih, tangtawn hinna ka neihtheihna dingin silhoih bang ka bawl dia?” achi a.

¹⁷Tuachi`n aman a kiang ah, “Bang ding a mihoih hungchi na hia? Pasian chihlouh mihoih dang a om kei hi. Hinanleh hinna a nalut ut leh, thupiakte juiin,” achi hi.

¹⁸“Aman khoipen la?” achi a, Jesu`n adawng a, “Tual nathahlouh ding ahi; ang nakawmlouh ding ahi; naguklouh ding ahi, juauthu in mi naheklouh ding ahi;

¹⁹na nu leh na pa zahtak in; chihte leh nangmah na ki it bangin na innvengte na it ding ahi,” chih, achi a.

²⁰“Tangvalpa`n hihte jousiah kaneu a pat ka juijingta hi, bang kasam nalai a?” achi a.

²¹Jesu`n a kiang ah, “Hoihbukim a om na utleh, pai inla naneih juak inla, mijawngte kiangah pia in, tuachi`n van ah gou nanei ding; tuakhit chiang in hungpai inla hungjui in,” achi hi.

²²Hinanleh tangvalpa`n huathu azaktak in, lungkham takin a paimangta hi, sil tampi nei ahihjiak in.

²³Tuachi`n Jesu`n a nungjuite kiangah, “Adiktak in kung hilh ahi, mihausa a ding in van gam lut a haksa ahi.

²⁴Tualeh kung hilh kik ahi, mihausa Pasian gam a alut sang in, sangawngsau phinbil vang a alutpaisuak abaihlamjaw ding hi,” achi hi.

²⁵A nungjuite`n hihthu ajaktak un, lamdang asa mahmah ua. “Ahuachihleh kua hundam in a omjou dia?” achi ua.

²⁶Hinanleh Jesu`n amauh a en a akiang uah, “Hihpen mihing a dingin sil hitheilou ahi a, hinanleh Pasian a dingin sil bangkim ahithei hi,” achi hi.

²⁷Tuachi`n Peter in a kiang ah, “Ngaiin, kou bangkim nusia in kung juita ua, bang kamu ding ua le?” achi a, adong a.

²⁸Tuachi`n Jesu`n a kiang ah, “Adiktak in kung hilh ahi, gamthak ah, Mihing Tapa a thupina laltouna a atouchiang in, nou kei hungjuite, Israel nam sawmlehnihte vaihawm in laltouna sawmlehnih ah natou ding uhi.

²⁹Tualeh michih kamin jiaka a inn hiam, a sanggampa hiam, a sanggamnu hiam, apa hiam, anu hiam, azi hiam, atate hiam, gamte hiam nusia in alehja amu ding ua, tangtawn hinna atang ding uhi.

³⁰Hinanleh mi tampi masapen a omte nunung pen in aom ding ua, nunung pen a omte masapen ahi ding uhi,” achi hi.