Read Thangal Naga MATHAI 2 Bible Online

MATHAI 2 - Thangal Naga bible

MATHAI 2

¹Kumpi Herod lalhun laiin Judea gam Bethlehem khua a Jesu hung pianzoh in, ngaiin, suahlam a pan mipilte Jerusalem ah a hungpai ua, [3]

²“Judahte kumpipa hungpiang amah khoisan a om ahia? Suahlam ah a aksi kamu ua, amah biading a hungpai ka hi uh,” achi uhi.

³Kumpi Herod in hih a jaktakin, a lungkham mahmah a, Jerusalem a tengteng zong a lungkham chiat uhi.

⁴Tuachi`n Herod in siampite leh laigelhmite a samkhawm a, “Krist khoisan a piang kichi ahia?” chi`n a kanchian hi.

⁵Tuachi`n amauhte`n a kiangah, “Judea gam a Bethlehem khua ah, Jawlneite`n hihbang in a gelh uh,

⁶‘Nang, Judea gam a Bethlehem aw, Judah khuapite lak ah na neupen tuam kei; Nang a kipan ukpa hung piang ding ahihjiak in Ka mi Israelte ching ding in.’ ” [4]

⁷Tuachi`n hihthu ajak khit in Herod in mipilte a samdap a, bang hun a hih aksi hung kilang ahia chi`n kichiantak in adong hi.

⁸Tuakhit in aman, Bethlehem khua ah: “Pai unla hoihtak in nausen vazongkhia unla; amah na muhkhit chiang un kei hunghilh kik un, ken zong kava biaktheihna dingin,” chi`n a sawlta hi.

⁹Kumpi thugen ajakkhit takun, apaikhiatsan ta ua; ngaiin, aksi suahlam a amuhpen mah uh, nausen omna tung atun a akhawl masiah, amai uah anapai hi.

¹⁰Aksi amuh takun a kipak ua, kipahna in adimta uhi.

¹¹Tualeh innsung a aluttak un, nausen anu Mari tawh amuta ua, khupbok in amah abiata uhi. Tuakhit in agoubawmte uh ahong ua, kipahna silpiak, Khamte, Chiimte leh Murahte apia uhi.

¹²Herod kiang a kilehkik nawnlou ding a amang ua Pasian in taihilh ahihman in, lamtuam ah agam lam uah apaita uhi.

¹³Tuachi`n amauhte`n apaisan nungin, ngaiin, Joseph mang in Toupa vantungmi ahung kila`k a, “Thou inla, naungek leh anu zohpih inla, Izipt gam ah taipih inla, thu kungpiak masangsiah huamun ah om un, Herod in naungek thahding in zongding ahihman in,” achi hi.

¹⁴Tuachi`n amahzong a thoukhia a, aja`n aja`n in naungek leh anu a zohpih a, Izipt gam juan in ataipihta a,

¹⁵Herod sih masiah huamun ah a omden ta uhi. Tuapen Toupa`n Jawlnei kam a, “Ka Tapa Izipt gam a pan ka samkhia,” chia agen a tangtun theihna ding ahi.

¹⁶Tualeh Herod in mipilte`n hungkhem uh ahi chih a theihtak in, aheh mahmah a, Tuachi`n mi asawl a, Bethlehem leh akim a om pasal naupang kumnih a pat anuailam athatsak hi, tuapen mipilte adokna pan a ahun azonkhiat dungjuia asep ahi.

¹⁷Tuachi`n Jawlnei Jeremiah in:

¹⁸“Rama khua ah aw akija, Lusu`nna, kah leh mauna thu. Rachel in a tate akah; Amau a om nawnlouh jiak un, hehnepzoh hinawnlou ding chia agen a tangtungta hi.”

¹⁹Herod a sihkhit in, ngaiin, Izipt gam a om Joseph mang in Toupa vantungmite ahung kilak a

²⁰“Thou inla, naungek leh anu zohpih inla, Israel gam ah paita in, naungek thahsawmpa a sita hi,” achi hi.

²¹Tuachi`n amah zong a thoukhia a, naungek leh anu Mari azohpih a, Israel gam ah ahung paita uhi.

²²Hinanleh apa Herod tang in Arkelaus in Judea gam ah vai ahawm chih ajaktak un, huamun a pai alauta uhi. Tuachi`n Pasian in amanglam ua a taihilh mahbang in, Galili gam ninglam ahung juanta uhi.

²³Tuachi`n Nazareth kichi khuapi ah hungtung in, huamun ah a tengta ua, “Amahpen Nazarethmi akichi ding,” chih Jawlneite`n agen a tangtun theihna ding ahi.