Read Thangal Naga MATHAI 20 Bible Online

MATHAI 20 - Thangal Naga bible

MATHAI 20

¹“Van gam pen huan neipa a grep huan a nasem ding mi chial ding a jingsang baihtak a pawt bang ahi.

²Aman nasemte tawh nikhat a makhai lawh ding a akihou zawh un, a grep huan ah asawlta hi.

³Tualeh dak thumna ding vel in ava pawtkhia a, midang vanjuakna mun a mawkdinte amu a,

⁴akiang uah, ‘Nou zong grep huan ah vakuan un, akilawm hun kung pia ding,’ achi a. Huachi`n amauhte apaita uhi.

⁵Tualeh dak gukna ding leh dak kua na ding vel in a pawtkik a, tuachimah bangin ava bawl kik a.

⁶Tualeh dak sawm leh dak sawmlehkhat ding vel in avapawt kik a, midang mawk dinte ava mu a, ‘Bangding a sunnitum a hihteng a mawk dindin nahi ua?’ achi a.

⁷Amau`n a kiangah, ‘kuamah in ahung chiallouh jiakin ahi,’ achi ua. Aman akiang uah, ‘Nou zong grep huan ah vakuan un, akilawm bangbang namu ding uh,’ achi hi.

⁸“Nitak ahung hih takin grep huan neipa`n asum kempa kiangah, ‘nasemte sam inla, a nunungpen a kipan in amasapen tan in a nitha uh pia in,’ achi hi.

⁹Dak sawmna leh dak sawmlehkhat na ding vel a achialte ahung paitak un, makhai khat chiat amuta ua.

¹⁰Hinanleh a masapente a hungpai un, muh tamdeuh a kinem ua, hinanleh amau`n zong makhai khat chiat mah amuta ua.

¹¹Adangka alak khit tak un, huan neipa tung ah aphunta ua.

¹²‘Hih a nunungpen te`n dakkal khat sung mai asem ua, kou sun haksa leh khua-ul thuakte tawh kibang in nabawl a!’ chi-in.

¹³Hinanleh aman alak ua mikhat kiang ah, ‘Lawm, na tung ah bangmah ka bawlkhial kei hi. Makhai lawh ding a kihoutuak hilou imaw?

¹⁴Nang a pen kilak inla paita in; hih anunung pente kiangah zong nang kung piakzah mah ka pia ut hi.

¹⁵Ka neihsa ka ut ut a ka bawltheih hilou maw? Ka hoih jiakin na thangsia maw?’ ”

¹⁶“Huachi bangin a nunungte a masa ding ua, tualeh a masate a nunung ding uhi; ajiak tampi sap ahi a, hinanleh tawmnou khat tel ahi,” achi hi.

¹⁷Tualeh Jesu Jerusalem a ahawhtouh laiin nungjui sawmlehnihte lampi ah azohpih tuam a akiang uah,

¹⁸“Ngai un, Jerusalem juan in ipaitou uhi, Mihing Tapa Siampite leh Laigelhmite khut ah matsak in a om ding a, tualeh amau`n siding in atung ah siamlouh atan ding uhi.

¹⁹Tualeh amah chiamnuih bawlna dingin leh jep ding in tualeh kross a kilhden dingin Jentelte kiangah apia ding uhi. Tuachiah nithum ni in a thoukik ding,” achi hi.

²⁰Tuachi`n Zebedi tapate nu atate tawh a kiangah a hungpai ua, ahung bia ua, akiang a pan bang hiam silkhat a ngen a.

²¹Aman a kiangah, “Bang ahia na deih?” achi a. Amahnu`n a kiangah, “Na lalgam ah hih ka tapa tegel khat na jiatlam ah khat na veilam ah a toutheihna ding un thu pia in,” achi hi.

²²Hinanleh Jesu`n a dawng a akiang ah, “Na nget uh theilou hi uteh, ka nou dawn ding na dawnthei ding uh maw?” Ka baptisma tan ding na tangthei ding uh maw? achi a, adawng a. Amau`n a kiang ah, “Hithei e,” achi ua.

²³Aman akiang uah, “Ka dawn ding na dawnthei ding ua, ka baptisma tan ding zong na tangthei ngut ding uhi, hinanleh ka jiatlam leh ka veilam a tou ding pen kei piak ding ahikei, ka Pa`n aguatsakte kiang a piak ahijaw ding,” achi hi.

²⁴Tualeh sawmte`n hihthu anajak un, unau nihte tungah ahehta uhi.

²⁵Hinanleh Jesu`n amauhte a kiangah asam a, “Jentelte vaihawmtute atung uah alal mahmah ua, a miliante un atung uah thu anei mahmah uhi chih zong nathei uhi.

²⁶Hilehjong nou lak ah hichibang hikei hen, kuapeuh nalak ua milian hih ut tuh na nna uh sem in aom ding uhi.

²⁷Tualeh kuapeuh nalak ua lamkai pen a pan ut tuh na sila un apang ding hi.

²⁸Mihing Tapa hilhial zong na sepsak a om ding a hungpai ahihlouh a, nasem ding leh mi tampi tatna ding a ahinna pia ding a hungpai jawk mahbang in,” achi hi.

²⁹Tualeh Jeriko a kipat apawt un mihon tampi`n amah ajui ua.

³⁰Ngaiin, mittaw nih lamgei a tou tegel in Jesu lampi ah apai chih ajaktak un; “Aw Toupa, David Tapa! katung uah zahngaiin!” chi`n a kikou ua.

³¹Tualeh mipite`n dai dingin atai ua; hinanleh amau`n, “Aw Toupa, David Tapa! katung uah zahngaiin!” chi`n ngaihjawsem in a kikou ua.

³²Tuachi`n Jesu ading a amau asam a, “Nou a dingin bang bawlleng na ut ua?” achi a.

³³Amau`n a kiangah, “Toupa, mitvak ka ut uh!” achi ua.

³⁴Tuachi`n Jesu`n ahehpih mahmah a, amit uh akhoih a; tuachi`n amuthei paingal ua, amah ajuita uhi.