Read Thangal Naga MATHAI 22 Bible Online

MATHAI 22 - Thangal Naga bible

MATHAI 22

¹Tualeh Jesu`n a dawng a akiang uah gentehna thu agen kik a.

²“Van gam pen kuahiam kumpi khat a tapa a ding a kitenna ankuang lui tawh kibang ahi.

³Tualeh kitenna ankuang luina a chialte sam dingin asilate asawl a, amauh ahung painuam kei uhi.

⁴Aman asila dangte asawl dok kik a: ‘chialte kiang ah vapai unla, ngaiun, ka ankuang kamanta; ka bawngtalte leh ka gan vakthaute kagou a, bangkim amanta hi; kitenna ah hungpaita un!’ vachi un, achi hi.

⁵Hinanleh amau`n ana limsak kei ua, khat alou ah, khat asum bawlna ah a paimangta ua,

⁶tualeh midangte`n asuakte aman ua, musittak in abawl ua, athatta uhi.

⁷Hinanleh kumpipa in huabang thu ajaktak in aheh mahmah a, a galkapte a sawl a, hua tualthatte a hihmang a, tualeh akhuapi uh zong a halsakta hi.

⁸Tuachi`n aman asilate kiangah, ‘kitenna ankuang amanta, hinanleh ka chialte anetak ahikei uh, achi a.

⁹Tuajiakin kongjing ah pai unla, mi namuh taphot uh anne dingin hungchial un,’ achi hi.

¹⁰Tuachi`n hua silate apawt ua, kongjingte ah vapaiin amuh taphot uh misia mipha aun un a samkhawm ua; tuachi`n kitenna inndan sung michialte in ahung dimta hi.

¹¹“Hinanleh kumpipa a michialte en ding a a hunglut leh, kitenna puan silhlou mi khat amuta a.

¹²Tuachi`n aman a kiang ah, ‘Lawm, bangchidan ahia kitenna puan silhlou a hihsan a nunglut?’ achi a. Tuatakin amah adai dide a.

¹³Tuachi`n kumpipa`n asilate kiangah, ‘Akhut leh akengte kan unla, puakhia unla, pualam mial ah paikhia un, hua ah kahleh hagawina a om ding.’ ”

¹⁴Ajiak, “Tampi sap ahi a, hinanleh tawmnou khat tel ahi uh,” achi hi.

¹⁵Tuachi`n Pharisaite apai ua, athugen a mattheihna ding dan a kikum ua.

¹⁶Tualeh amau`n a nungjuite uh leh Herod pawlte a kiangah asawl ua, huate`n a kiangah, “Siapa, midiktak nahi a, diktak in Pasian lam thu nahilh a, mi kuamah khawksak tuam na neikei chih ka thei uh; kuamah khentuam na neikei hi.

¹⁷Huajiakin bangchi nasa a? Hung hilh in. Kaisar kiang a siah tawi asiang hiam, sianglou?” achi ua.

¹⁸Hinanleh Jesu`n a lungsim uh gitlouhdan pen athei a, “Milepchiahte aw! Bangding a hung ze-et nahi ua?

¹⁹Siah dangka hung ensak un!” achi a, Tuachi`n a kiangah makhai khat a hungtawi ua,

²⁰tuateh aman akiang uah, “Hih kualim leh kua laigelh ahia?” achi a.

²¹Amau`n a kiangah, “Kaisar a,” achi ua. Tuachi`n aman akiang uah, “Kaisar silte Kaisar kiangah pia unla, Pasian silte Pasian kiangah pia un,” achi hi.

²²Hih thute ajak un lamdang asa mahmah ua, amah apaisan ua, a paimangta uhi.

²³Huanimah in Sadukaite thohkikna a omkei chite a kiangah a hungpai ua.

²⁴“Siapa, Mosi-in mi taneilou a asihleh a sanggampa in azi aluah ding a, asanggampa a dingin chi akhahsak ding ahi, achi hi.

²⁵Tuin, kalak uah sanggam pasal sagih a om ua, a upapen in zi anei a, asita, chi akhahlouh jiakin azi asanggampa anutsiat a.

²⁶Huachimah bangin anihna zong taneilou in asi a, athumna in aluah a, sagihna tan in aneichiat ua.

²⁷Atawp in numeinu zong ahung sita hi.

²⁸Tuajiakin, thohkikna ah amahnu pen kuazi ahita diai? A un un lah a neichiat ngal ua,” chi`n a dong ua.

²⁹Jesu`n a dawng a akiang uah, “Pasian Laisiangthou leh Pasian sil bawltheihna na theihlouh jiak un na hihkhial jel uhi!

³⁰Thohkikna ah kitenna a om nawnkei a, teng zong a kitengsak nawnkei uh, van a vanmite bang ahita uhi.

³¹Hinanleh misi thohkikna ah: Pasian in na kiang ua agen simkha ngailou nahi uh hiam?

³²‘Keimah Abraham Pasian, Isak Pasian, Jakob Pasian ka hi,’ achih, chi in. Pasian jaw misi Pasian ahikei a, mihing Pasian ahi jaw,” achi hi.

³³Tualeh mipite`n hih ajaktak un a thuhilhdan lamdang asa mahmah uhi.

³⁴Hinanleh Jesu`n Sadukaite aseljou chih ajak un amau akikhawm ua,

³⁵tuachi`n alak ua dansiammi khat in amah ze-et in thukhat a dong a,

³⁶“Siapa, danthu ah khoipen ahia thupiak lianpen?” chi in.

³⁷Jesu`n a kiangah, “ ‘Toupa na Pasian na lungtang tengteng in, na kha tengteng in, na lungsim tengteng in na it ding ahi,’ chih.

³⁸Hih thupiak masapen leh thupiak lianpen ahi.

³⁹Tualeh anihna zong hihbang mah ahi: ‘Nangmah na ki it bangin na innvengte na it ding ahi,’ chih.

⁴⁰Hih thupiak nihte tungah danthu leh Jawlneite thu jousiah a kikhaikhawm siang ahi,” achi hi.

⁴¹Pharisaite akikhop lai un, Jesu`n amauh thu a dong a,

⁴²“Krist hi bangchi`n na ngaihsun ua? Amah kua tapa ahia?” achi a, amau`n a kiangah, “David Tapa,” achi ua.

⁴³Aman akiang uah, “Ahihleh,” bang chidan a “David in kha a amah, ‘Toupa’ achih?”

⁴⁴“ ‘Toupa`n ka Toupa kiangah: na melmate na kengphang nuaiah kakoih masiah, ka jiatlam ah tou in,’ chia Toupa achih ahia?

⁴⁵David in amah ‘Toupa’ achihleh, a tapa bang achi hihthei diai?” achi a.

⁴⁶Tuachi`n kuamah in amah kamkhat in zong a dawngthei takei ua, huani a kipan in kuaman thudang mawng mawng a dong ngam nawn takei uhi.