Read Thangal Naga MATHAI 23 Bible Online

MATHAI 23 - Thangal Naga bible

MATHAI 23

¹Tuachi`n Jesu`n a nungjuite kiang leh mipite kiangah thu agen a.

²“Laigelhmite leh Pharisaite Mosi touna ah atou uhi.

³Huajiakin juihding chia hunghilh taphot uh jui unla, bawljel un, hinanleh amauh silbawl bang bawlkei un; amau`n agen ua a bawltuan kei uhi.

⁴Puakgik haksa taktak abawl ua mi liangkou ah asuan ua, hinanleh amau`n lah akhut meleng khat un zong a khoihnuam kei uhi.

⁵Hinanleh a silbawl jousiah uh mi muhding in ahi, abawl uh, a silbulhte uh leh a khipte uh abawl lian ua apuan mawngte uh atualsak uhi.

⁶Tualeh ankuang luinate ah mun sangpente, kikhopna inn ah touna hoihpente bang adeih uhi;

⁷tualeh van juakna munte lak a mi`n chibai abuk uh bang, tualeh mi`n Rabbi Rabbi, chia asap bang aut uhi.

⁸Hilehjong noujaw ‘Rabbi,’ chih in om kei un, ajiak Siapa khat nanei ua, Krist ahi, tualeh nouteng sanggam khat nahi uhi.

⁹Leitung ah kuamah ‘pa,’ chikei un, Na pa uh khat mai ahi, amah van ah a om.

¹⁰Tualeh, ‘Siate,’ chih in om kei un, sia khat nanei ua, amah Krist ahi.

¹¹Hinanleh nalak ua lianpenpa na sila un aom ding hi.

¹²Tualeh kuapeuh a kiliansak tuh sukngiam ahi ding a, kuapeuh aki ngiamkhiat tuh tawisang in aom ding hi.

¹³“Hinanleh nou laigelhmite leh Pharisai lepchiahte aw, na tung uh agik hi! van gam lampi mi dingin na khaksak ua, noulah na luttuan kei ua. Mi alut dingte lah na lutsak kei ua.

¹⁴Nou laigelhmite leh Pharisai lepchiahte aw, na tung uh agik hi! Meithaite inn na negam ua, mi khemna in sawtpipi nathum ua, tuajiakin mawhna liansem natuak ding uhi.

¹⁵“Nou laigelhmite leh Pharisai lepchiahte aw, na tung uh agik hi! Mi khat Juda biakna a siam ding in zong tuipi leh gam ah napai kimvel ua, tualeh na siam zoh chiang un, amah pen noute sangin alehnih in gawtmun ta in na bawljel uhi!

¹⁶“Nou mittaw lamkaite! Kuapeuh Pasian tempul lou a kichiam bangmah ahikei a; ‘hinanleh kuapeuh Pasian tempul a kham lou a kichiam in a tangtunsak ding ahi, chite aw, na tung uh agik hi!’

¹⁷Nou mimaw leh mittawte! Kham leh kham siangthousak Pasian tempul khoipen thupijaw ahiam?

¹⁸‘Tualeh kuapeuh maitam lou a kichiam bangmah ahikei a, hinanleh kuapeuh atung a silpiak om lou a kichiam in a tangtunsak ding ahi,’ na chi uhi.

¹⁹Nou mimaw leh mittaw! Silpiak leh silpiak siangthousak maitam khoipen thupijaw ahiam?

²⁰Tuajiakin kuapeuh maitam lou a kichiam tuh, maitam leh atung a om tengteng lou a kichiam ahi;

²¹kuapeuh Pasian tempul lou a kichiam tuh, Pasian tempul leh asung a tengpa lou a kichiam ahi;

²²tualeh van lou a kichiam jousiah, Pasian laltouna leh atung a tou-pa lou a kichiam ahi.

²³“Nou laigelhmite leh Pharisai lepchiahte aw, natung uh agik hi! Lounamsiate, lengmaselte, zirate sawm a khat napia jel ua, danthu poimoh jawte, diktatnate, hehpihnate, gin-omnate na limsak kei ua; hinanleh hihte ahi nabawl ding uh, adangte zong bawllou hituanlou in. [17]

²⁴Nou mittaw lamkaite aw! Thouvai khisiang a sangawngsau apum a valhmangte aw!

²⁵“Laigelhmite leh Pharisai lepchiahte aw! Na tung uh agik hi! Nou leh kuang pualam na silsiang ua, hinanleh asung lah nekgukna leh kisu`mlouhna in adim hi.

²⁶Nou Pharisai mittaw! Nou leh kuang sunglam silsiang masa un, apualam zong ahung sianthou theihna ding in!

²⁷“Laigelhmite leh Pharisai lepchiahte aw! Na tung uh agik hi! Han kinuhkang apualam kilawm tak a lang, asunglah misi guhte leh nin chiteng a dim bang nahi uhi.

²⁸Huachimah bangin nou zong pualam ah mihing mitmuh in diktattak in nalang ua, hinanleh na sunglam ulah lepchiahna leh gitlouhna in adim hi.

²⁹“Nou laigelhmite leh Pharisai lepchiahte aw! Na tung uh agik hi! Ajiak nou Jawlneite han nabawl ua, tualeh midiktatte han zong najem uhi;

³⁰kapu kapate uh damlaia na om hile ung, Jawlneite sisan asuahna uah panglou ding hi ung a nachi uhi.

³¹Huajiakin Jawlneite thatte tate nahi uh chih noumauh na kitheisak uhi!

³²Na pu na pate uh mohna tehna dan sungdim vanglak un!

³³Gulte aw, gulsuante aw! Bang chi`n ahia gawtmun siamlouh tanna na pelhtheih ding uh?

³⁴Huajiakin, ngaiun, na kiang uah Jawlneite, mipilte, laigelhmite kung sawl ding; khenkhat nathat ding ua, kross ah na kilhden ding uh, tualeh khenkhatte na kikhopna inn uah najep ding ua, khuateng ah na soisa ding uhi.

³⁵Tuachi`n, midiktat Abel sisan kisuah a pat, Pasian tempul leh maitam kikal a Barakia tapa Zakariah nathah ua a sisan suah tanpha in leitung a midiktatte sisan kisuah jousiah na tung uah ahung tunlawh ding hi.

³⁶Adiktak in kung hilh ahi: hih silte jousiah tulai khangthakte tungah a hungtung ding hi!

³⁷“Aw Jerusalem, Jerusalem, Jawlneite thattu, na kiang a kisawlte suang a na denglumtu! Akpi`n anoute akhanuaia a opkhum bang a ken zong natate uh bangzah vei opkhum ka tum a, hinanleh na utkei uhi!

³⁸En un! na innte uh ahawm a taisan in a omta hi.

³⁹Kung hilh ahi, ‘Toupa min a hungpaite ahampha hi, nachih masiah uh, tuban nung munawn takei ding uhi,’ ” achi hi.