Read Thangal Naga MATHAI 25 Bible Online

MATHAI 25 - Thangal Naga bible

MATHAI 25

¹“Huahun chiangin van gam pen nungak siangthou sawm a meivak uh tawia mouneipa dawn ding a pawtkhiate tawh teh ahi ding.

²Alak ua mi-ngate apil ua; adang ngate amaw uhi.

³Amawte`n ameivak uh akeng ua, thautui a kengkop kei uhi,

⁴hinanleh apilte`n ameivak utawh abawm ah thautui zong a kengkop uhi.

⁵Mouneipa ahung zekai jiakin aun un a lusu ua, ana ihmuta uhi.

⁶“Tualeh ja`nkim laiin, ‘Ngaiin, mouneipa hungpai hi! A dawn ding in pawtkhia un!’ chia kikou ging a omta a.

⁷Tuatakin nungak siangthoute athou ua, ameivak uh adeta ua.

⁸Tualeh amawte`n apilte kiangah, ‘Na meivak tui uh themkhat hung hawm un, ka meivakte uh mit ding ahita,’ achi ua.

⁹Hinanleh apilte`n adawng ua, ‘Kou leh nou dingin a kiching kei ding, ajuakte kiangah pai unla leijaw un,’ achi ua.

¹⁰Tualeh amauh alei ding a apaikhiat kal un mouneipa a hungpaita a; tualeh kigingsa a na omte amah tawh moulopna inn ah a lutkhawmta ua; tuachi`n kot a kikhakta hi.

¹¹“Huanung in nungak siangthou dangte zong a hungpai ua, ‘Toupa, Toupa! Kot hunghon in!’ achi ua.

¹²Hinanleh aman adawng a, ‘Adiktak in kung hilh ahi!’ Nou kungthei khakei, achi hi.”

¹³Tuajiakin, “Kiging un mihing Tapa hungpai ding ni leh ahun na theihlouh jiak un.”

¹⁴Van gam pen mi khat in asilate samkhawm a asilneih jousiah akiang ua kemsak a, khual gamlapi a zinmang tawh kibang ahi.

¹⁵Tualeh aman asila khat kiang ah talent nga, adang khat kiang ah talent nih, tualeh asila dang khat kiang ah talent khat apia a, amau bawltheih khom chingchiat tawh kijui in apia a, amah khual azinta hi.

¹⁶Tuachi`n talent nga ngahpa paiin summet avabawl a, talent nga dang ava metsak beh hi.

¹⁷Tuachimah bang in talent nih ngahpa in zong talent nih dangmah ametsak beh a.

¹⁸Hinanleh talent khat mupa apai a lei atou a, apu dangka avaphualta hi.

¹⁹“Hun sawtpi nungin hua silate pu a hungtungta a, amauh tawh sum a sutuakta hi.

²⁰Tuachi`n talent nga ngahpa a hungpai a, talent nga dang ahung tawi a, ‘Pu, nang talent nga nung kemsak a, En-in! Talent nga dang ka muhbeh hi,’ achi a.

²¹Apu in a kiang ah, sila hoih leh gin-om, na bawlhoih hi; sil tawmnoukhat tung ah na gin-om a, sil tampi tung a thunei in kung bawl ding hi; napu kipahna ah lut in! achi hi.

²²Talent nih ngahpa zong a hungpai a, ‘Pu, nang talent nih nung kemsak a, En-in! Talent nih dang ka muhbeh hi,’ achi a.

²³Apu in a kiang ah, ‘Sila hoih leh gin-om, na bawlhoih hi! Sil tawmnoukhat tungah na gin-om a, sil tampi tung a thunei in kung bawl ding, napu kipahna ah lut in!’ achi hi.

²⁴Tuachi`n talent khat ngahpa a hungpai a, ‘Pu, mi giloutak nahi chih kungthei a; na tuhlouhna ah na at a, na thehlouhna ah zong na khawm khawm hi.

²⁵Tuajiakin kunglau a, ka vapaia na talent leinuai ah ka vaphual a; En-in! Hiah nang a mah na mukikta hi,’ achi hi.

²⁶Hinanleh apu in a kiang ah, ‘Nang, sila gilou leh thadah! Ka tuhlouhna ah ka at a, ka thehlouhna ah ka lakhawm jel hi, chih nathei maw?

²⁷Tuachi`n ka dangka sumsinte kiangah na vakoih ding a, kungpai chianga kei a pen amet tawh ka muh ding hilou maw.

²⁸Tuajiakin a talent a kiang a pan laksak unla, talent sawm neipa kiang ah pia un.

²⁹Kuapeuh aneite piakbeh ahi ding a, tamsem a hungnei ding; hinanleh kuapeuh aneiloute aneihsun nangawn laksak ahi ding hi.

³⁰Tualeh sila phatuamlou tuh pualam mial ah paikhia un, huasan ah kah leh hagawina aom ding hi,’ achi hi.

³¹“Mihing Tapa a vanmi siangthoute tengteng tawh a thupina a kivon a a hungpai hun chiangin, a thupina laltouna ah atou ding a,

³²amai ah namchih a kikhawm ding ua; belam chingpa`n kel lak a a belamte a khenkhiat bangin, amauhte a khenkhia ding.

³³Tualeh belamte ajiatlam ah akoih ding a, hinanleh kelte aveilam ah akoih ding.

³⁴Huahun chiangin kumpipa`n a jiatlamate kiang ah, ‘Nou ka Pa deihsakte aw, hungpai unla, leitung kisiam chil a pat a noua ding a gam bawlsa luah un.

³⁵Ka gil akial in nek ding nung pia ua, ka dang atak in dawn ding nung pia uh, mikhual ka hih in nung jintun ua,

³⁶guaktang ka hih in puan nung silhsak uh; ka damlouh in nungveh ua, thong a ka om in ka kiang ah nungpai uh,’ achi ding.

³⁷Huahun chiangin mi diktatte`n, ‘Toupa bangchik in ahia gilkial a kungmuh ua an kung piak uh, bangchik in ahia dangtak a kungmuh ua dawn ding kung piak uh?

³⁸Bangchik in ahia mikhual nahih kungmuh ua kung zintun uh? Guaktang a kungmuh ua puan kung silhsak uh?

³⁹Bangchik in ahia china in hiam, thong ah hiam kungmuh ua na kiang a kungveh uh?’ aci ding ua.

⁴⁰Kumpipa`n akiang uah, ‘Adiktak in kung hilh ahi, hih ka sanggamte lak a neupen khat tung a nabawl uh keitung a bawl nahi uh, achi ding!’

⁴¹“Tuazohchiang in aman aveilam a omte kiang ah, ‘Nou hamsiat thuakte, kakiang a pat paimang unla, tangtawn mei, dawi leh a sawltakte ding a abawl ah lut un!

⁴²Ka gil akial in an nung piakei ua, kadang atak in dawn ding nung piakei uh;

⁴³mikhual kahih in nung zintun kei uh; guaktang kahih in puan nung silhsak kei ua; china leh thong a ka om in nungveh kei uh,’ achi ding.

⁴⁴Tuachiang in amau`n zong adawng ding ua, ‘Toupa, bangchik in ahia gilkial in hiam, dangtak in hiam, khualzin in hiam, guaktang in hiam, damloua na om in hiam ahihkeileh thong a na om kungmuh ua, kung donlouh uh?’ achi ding uhi.

⁴⁵Tuachiang in aman adawng ding a akiang uah, ‘Adiktak in kung hilh ahi, hih mineupente lak a khat tung a na bawllouh uh katung a bawllou na hi uh,’ achi ding.

⁴⁶Tualeh hihte tangtawn gawtmun ah alutta ding ua, midiktatte tangtawn hinna ah alutta ding uh,” achi hi.