Read Thangal Naga MATHAI 26 Bible Online

MATHAI 26 - Thangal Naga bible

MATHAI 26

¹Tualeh hichi ahung hi a, Jesu`n hihthu tengteng a genzoh in a nungjuite kiang ah,

²“Ninih zoh chiangin paikan ankuang luina ahung om ding ahi, tualeh Mihing Tapa kilhden ding a matsak in aom ding hi, chih nathei uhi,” achi hi.

³Tuatakin siampite leh laigelhmite, vantang upate siampi lianpen Kaiapha achih uh inn ah a kikhawm ua,

⁴tualeh Jesu lungsim a bawl a, man a a thahtheihna ding un akihou ua.

⁵“Hinanleh ankuang lui ni-in hihdah heh, ahuachih keileh mipi lak ah buaina ahung om khading,” achi uhi.

⁶Tualeh Jesu Bethani khua a miphak Simon inn a aom laiin,

⁷Numei khat Alabastar bawm a sathau namtui mantam tak tawiin a kiangah a hungpai a, dohkan a atoulai in, a lutung ah a hungbuak hi.

⁸Hinanleh a nungjuite`n hih amuhtak un, aheh ua, “Bangding a namawk sukthelthang a hiam?”

⁹“Hih sathau mantam juak a mijawngte kiang a piaktheih ahi!” achi ua.

¹⁰Jesu`n hih atheih in akiang uah, “Bangding a hih numei subuai nahi ua? Amahnu`n ka tung ah silhoihtak abawl hi.

¹¹Mijawngte na kiang uah a omjing ua, hinanleh kei na kiang uah omjing ka hikei hi.

¹²Hih thau namtui katung a abuak pen, vuia ka omni a ding a abawl ahi.

¹³Adiktak in kung hilh ahi, khoimun peuh ah, leitung pumpi ah hih tangthupha akigenna teng ah hih numeinu silbawl zong amah theihjingna dingin agen jel ding uhi,” achi hi.

¹⁴Tuanung in sawmlehnihte lak a khat Juda Iskariot achih uh siampite kiang ah avapai a

¹⁵tualeh akiang uah, “Amah na kiang uah hung piakhia leng nou kei bang nung pia ding ua?” avachi a, tualeh amau`n dangka sawmthum piak akhamta ua.

¹⁶Huanung siah amah matsak nang lemtang a zongta hi.

¹⁷Tanghou tol sawhlouh ankuang luini masapen in, nungjuite Jesu kiang ah a hungpai ua, “Paikan ankuang lui nekna dingin khoiah hung bawlsak le ung na ut ei?” achi ua.

¹⁸Tuachi`n aman, “Khuapi ah pai unla, mi khat kiangah: ‘Siapa`n ka hun anaita a, ka nungjuite tawh na inn ah paika`n ankuang ka nekhawm ding uh achi hi, vachi un,’ ” achi a.

¹⁹Tuachi`n a nungjuite`n Jesu`n akiang ua ahilh bangin abawl ua, paikan ankuang a bawljouta uhi.

²⁰Tualeh nitak lam a hunghih in nungjui sawmlehnihte tawh an a im ua.

²¹Anek laiun aman, “Adiktak in kung hilh ahi, nalak ua mi khat in kei ahung mansak ding hi,” achi hi.

²²Tuatakin amauh a lungkham mahmahta ua, aban ban in akiang ah, “Toupa kei kahi hiam?” a chichiat ua.

²³Tualeh aman adawng a akiang uah, “Ankuang hung sawkpihpa in kei ahung mansak ding hi.

²⁴Mihing Tapa a tanchin kigelh bang jel in apai ding hi, hinanleh Mihing Tapa mansak ding pa tung agik hi! Huapa piang kei leh amah a dingin ahoihjaw ding hi!” achi hi.

²⁵Tuachi`n amansak dingpa Juda in adong a, “Siapa keimah ka hi hiam?” achi hi. Aman a kiangah, “Nang man na chita hi,” achi hi.

²⁶Tualeh anek laiun, Jesu`n tanghou ala a, gual ajawl a, abalkek a; tuachi`n nungjuite kiangah apia a, “La unla ne un, hih ka taksa ahi,” achi a.

²⁷Tuazoh in aman nou ala a, kipahthu agen a, a kiang uah apia a, “Na un un, dawn un,”

²⁸“Khialhnate ngaihdamna ding a mi tampi a ding a pawt, hih ka sisan a thukhunthak ahi,” achi hi.

²⁹Hinanleh kung hilh ahi, ka Pa gam a nou tawh athak ka dawnni atun masiah tuban hih grepgah tui ka dawnnawn kei ding, achi hi.

³⁰Tualeh la asak zoh un apawt ua, Olive mual ah apaita uhi.

³¹Tuachi`n Jesu`n akiang uah, “Tuja`n chiangin na un un ka tungthu ah lungkia in na omsiang ding ua; ‘Belampu ka jep ding a, belam honte a kithehjak ding uh chih gelh ahi.’

³²Hinanleh ka thohkik zohnung chiangin, Galili gam ah namai uah ka pai ding,” achi hi.

³³Peter in adawng a, akiang ah, “Mi jousiah na tungthu ah lungkia in omnanle uh, kei pen lungkia in ka omkei ding!” achi hi.

³⁴Jesu`n a kiangah, “Adiktak in kung hilh ahi, tuja`n chiangin, ak khuan ma-in thumvei nung kitheihmoh bawl ding”, achi hi.

³⁵Peter in a kiang ah, “Nang tawh sikhawm ding hinanleh zong kung kitheihmoh bawl kei ding hi!” achi a. Huachimah bangin nungjuite jousiahin zong a chichiat uhi.

³⁶Tuazoh in Jesu amauhte tawh munkhat Gethsemani achih uh atung ua, tualeh a nungjuite kiangah, “Pa`m a ka vathum kal in hiah nanatou un,” achi a.

³⁷Tualeh aman Peter leh Zebedi tapate nih azohpih a, lungkham in ahung mangbang mahmahta hi.

³⁸Tuachi`n aman akiang uah, “Ka kha a lungkham mahmah a, sihna khop hial ahi. Hiah om unla hung venpih un,” achi hi.

³⁹Amah themkhat avapai gamla deuh a, khupbok in a thum a, “Pa aw, ahihtheih liaileh hih nou in hungpel hen! Ahihhangin kei deihna bang hilou in, nang deihna bang hijaw hen,” achi hi.

⁴⁰Tuachi`n amah nungjuite kiangah a hungpai a, amauhte ihmu in amu a; Peter kiangah, “Bangchi, nou dakkal khat sung zong hung venpih zoulou nahi uh maw?

⁴¹Khemna a na lutlouhna ding un kiveng gige in thum un; kha injaw a ngap a, hinanleh taksa pen ahatkei hi,” achi a.

⁴²Anihveina ding in ava paikhia kik a, athum a, “Pa aw, hih nou ka dawn louh a, hung peltheilou ahihleh, nadeih lam kibawl hen,” achi a.

⁴³Tualeh amah a hungpai a, amauhte ihmu in a mukik a, a ihmut uh asuak mahmah jiak in.

⁴⁴Tualeh amauhte nusia in avapai kik a, athumveina ding in ava thum kik a, agen ngaiteng mah agen hi.

⁴⁵Tuakhit in amah a nungjuite kiangah a hungpai a, akiang uah, “Noute ihmu lailai a tawlnga lailai nahi uh maw? En un! Ahun a hungtungta, Mihing Tapa mikhialte khut a matsak in aom ding.

⁴⁶Thou un, ipai ding uh; En un, kei hung mansak dingpa a hungtungta hi!” achi hi.

⁴⁷Tualeh aman hihthu agen laiin, en-in, sawmlehnihte lak a khat, Juda; siampite leh upate kiang a kipan mipi thupitak namsau leh khetbuk tawite tawh a hungpai a.

⁴⁸Tualeh amansak ding pa in amauh chiamtehna ahilh masa a: “Ka tawp penpen amah ahi ding hi. Amah man un!” chi-in.

⁴⁹Tuachi`n amah kintakin Jesu kiangah avapai a, “Chibai, Siapa,” chi`n atawp a.

⁵⁰Tualeh Jesu`n a kiangah, “Lawm, bang ding a hungpai nahia!” achi a. Tuachi`n Jesu tungah khut akha ua, amanta uhi.

⁵¹Tualeh ngaiin, Jesu ompihte lak a mi khat in akhut in asawk a a namsau adokkhia a, siampi silapa asat a, abil a satkhiatsak hi.

⁵²Tuachiah Jesu`n a kiang ah, “Na namsau akoihna ah koih in, Namsau zangmi namsau in asi ding hi.

⁵³Tuin zong vanmite sangguk mun sawmlehnih sang a tamjaw hung sawlsak dingin ka Pa kiang a ngentheilou hungsa nahi uh hiam?

⁵⁴Hinanleh tuabang hitaleh Laisiangthou bangchi`n ahia ahung tangtuntheih ding?” achi hi.

⁵⁵Tuahun mah in Jesu`n mipite kiangah, “Guta man ding bangin namsau leh khetbuk tawiin kei man dingin nung pawt uh maw? Niteng in tempul ah noutawh thuhilh in katou a nungman kei ua.

⁵⁶Hinanleh Jawlneite Laisiangthou thute ahung tangtun theihna ding a, hihte jousiah hung om ahi,” achi hi. Tuakhit in nungjuite tengteng in a nusia ua, a taimangta uhi.

⁵⁷Tualeh Jesu mante`n amah siampi Kaiapha inn a laigelhmite leh upate kikhopna ah apaipih ua.

⁵⁸Hinanleh Peter in siampi inn dong in gamlatak in amah ajui a, avalut a, atawptan theihsawm in silate lak ah avatou hi.

⁵⁹Tuachi`n siampite leh upate leh vaihawmmite jousiahin, Jesu a thahtheihna ding un, theihpihtu diklou a zong ua;

⁶⁰hinanleh amukei uhi, theihpihtu diklou tampi hungpai nanle uh amutuan kei uhi. Atawp in theihpihtu diklou nih a hungpai ua

⁶¹“Hihpa`n, ‘Pasian tempul hihsia in nithum sung in lamthakthei ka hi achi hi,’ ” achi ua.

⁶²Tualeh siampi a dingdok a, “Nang bangmah a dawnglou ding maw? Hihte hung hekna bang chidan ahia?” achi hi.

⁶³Hinanleh Jesu daidide in a om a, tuatak in siampi in a kiang ah, “Pasian hing min in kungvau ahi: Pasian Tapa Krist nahihleh hihlouh hunghilh in,” achi hi.

⁶⁴Jesu`n a kiang ah, “Na chita hi. Hinanleh kung hilh ahi: tunung chiangin Mihing Tapa silbawltheihna jiatlam a tou leh van meipi tung a hungpai na mu ding uhi!” achi hi.

⁶⁵Tuachi`n siampi in apuan a botkek a, “Pasian agensia hi! Theihpihtu dang bang i poimoh lai dia! Ngaiun Pasian agensiatna tuin naja uhi! achi hi.

⁶⁶Bang na chingaih ua?” achi a. Amauhte`n adawng ua, a kiangah, “Sitak ahi,” achi uhi.

⁶⁷Tuachi`n amaiah chil aphih ua; a khuttum un atum ua, khenkhat in akhutphang ua beng in,

⁶⁸“Nang Krist! Hunghilh in kua ahia hungbeng!” achi uhi.

⁶⁹Tualeh Peter pualam ah huangsung ah atou a; nungak khat a kiangah a hungpai a, “Nang zong Galilimi Jesu tawh lawikhat nahi,” achi a.

⁷⁰Hinanleh aman, “Na thugen ka theikei chi`n aun ua amai uah theimoh akipang a.”

⁷¹Tualeh innlim a avapawt khiat tak in nungak dang khat in amah ana mu a, huamun a omte kiangah, “Hihpa zong Nazareth Jesu kiang a om ahi,” achi a.

⁷²Hinanleh aman, “Hihpa ka theingai kei achia, kichiam in a kitheihmoh bawl kikta hi!”

⁷³Tualeh tomkhat zoh in huamun a dingte a hungpai ua Peter kiangah, “Nang zong alak ua mikhat hi ngel teh, na ham in akithei hi!” achi ua.

⁷⁴Tuachi`n aman, “Hihpa ka theingai kei! chi`n hamsia kiloh in a kichiamta hi!” Tuatakin ak ahung khuangpaita hi.

⁷⁵Tuatakin Peter in Jesu thugen, “Ak khuanma in nang thumvei nung kitheihmoh bawl ding, achih ahung theikhiata a.” Tuachi`n pualam ah apawt a, akap ngutngutta hi.