Read Thangal Naga MATHAI 27 Bible Online

MATHAI 27 - Thangal Naga bible

MATHAI 27

¹Jingsang ahunghih in siampite leh vantang upate jousiah Jesu thahna dingin a kihoukhawm ua.

²Tualeh amah ahenkhit un apaipih ua, gam ukpa Pontia Pilat kiangah a piakhiata uhi.

³Tuachi`n Juda, a mansakpa in Jesu siamlouh a tangsak uh chih a theihtak in a kisik a, daan dangka sawmthum pen siampite leh vantang upate kiangah ahung nungtawi a.

⁴“Midik sisan kakhok pen sil kana bawlkhial hi!” achi hi. “Tua koutawh bang kisai ahia? Na lawhlawh kilawh ve!” achi uhi.

⁵Tuachi`n aman daan dangka sawmthum pen tempul sung ah apailut a, apawt a, paiin ava awklumta hi.

⁶Hinanleh siampite`n daan dangka pen ala ua, “Sisan man ahihjiak in hihpen thohlawm bawm a koih asiang kei,” achi ua.

⁷Tualeh amauh a kihoukhawm ua, khualzinmite vuina dingin hua sum in bel khengpa lou aleita uhi.

⁸Tuajiakin tuamun pen tunitan in sisan mun achi uhi.

⁹Tuachi`n Jawlnei Jeremiah thugen: “Israeltate lak a kuate hiam in ana saksa uh amah man ding daan dangka sawmthum pen alata ua,

¹⁰Toupa`n a hunghilh bangin belkhengtu mun man dingin apia uh,” chih ahung tangtungta hi.

¹¹Tuachi`n Jesu gam ukpa maiah ading a, tualeh gam ukpa`n, “Judate kumpipa nahi hiam?” chi-in adong a. Jesu`n a kiangah, “Na gen bangbang in himah ing,” achi hi.

¹²Tualeh siampite leh vantang upate`n amah aheklai un, aman bangmah in adawng kei hi.

¹³Tuachi`n Pilat in a kiang ah, “Ahung hekna tengpi uh zalou nahi maw?” achi hi.

¹⁴Hinanleh aman kamkhat in zong a dawng kei a, tuachi`n gam ukpa`n lamdang asa mahmah hi.

¹⁵Tualeh paikan ankuang luini chiang a gam ukpa`n thongkia khat mipite`n atel penpen uh a khahkhiat jel ahihdan ngaina ahi hi.

¹⁶Tualeh huahun laitak in Barabba kichi thongkia minthang tak khat a om hi.

¹⁷Huajiakin amauh ahung kikhop tak un, Pilat in akiang uah, “Kua hung pawtsak leng na ut ua? Barabba maw? Jesu Krist kichi?” achi hi.

¹⁸Ajiak hazat man a Jesu ama khut a pia uh ahi, chih aman athei hi.

¹⁹Tualeh vaihawmna touna a atoulai in, azi-in a kiangah mi asawl a, “Hua midik tung ah bangmah bawlken, tunin amah jiakin kamang in sil tampi kathuak hi,” ava chisak hi.

²⁰Hinanleh siampite leh vantang upate`n Barabba nget a Jesu hihlum ding a ngen ding in mipite akhem ua.

²¹Gam ukpa`n adong a akiang uah, “Hih nih tegel lak a kuapen hung khahkhia leng na ut ua?” achi a. A mau`n, “Barabba!” achi uhi.

²²Pilat in akiang uah, “Ahihleh Jesu Krist kichi bang kalawh diai?” achi a, aun un akiang ah, “Kross ah kilhden in om hen!” achi ua.

²³“Bangding inla? Aman bang bawlkhial anei a?” achi a. Amau`n, “Kross ah kilhden in om hen!” chi-in ngaihjaw sem in akikou uhi.

²⁴Pilat in bangmah lawh theihlouh leh buaina semsem hiding ahi chih amuhtak in, tui ala a, mipi mai a akhut sil in, “Hih midik sisan ah mawhna ka neikei! Nou na lawhlawh kilawh un!” achi hi.

²⁵Tuachi`n mipi jousiahin adawng ua, “A sisan mawh koute tung leh ka tate uh tung ah om hen!” achi ua.

²⁶Tuakhit in aman Barabba akiang uah a khahkhiata a, tualeh Jesu ajepzoh in kross a khailup dingin a piakhiata hi.

²⁷Tuakhit in gam ukpa galkapte`n Jesu kikhopna innpi sung ah alutpih ua, galkap jousiah akim ah ahung kikhawm ua.

²⁸Tualeh amauhte`n apuan asutkhiat sak ua, puan sandup asilhsak uhi.

²⁹Tualeh linglukhu aphan ua, akhusak ua, akhut jiatlam ah pumpeng chiangkhut atawisak ua, tualeh amai a khupdin in akun ua, “Chibai Judate kumpipa!” chi`n chiamnuih bawlnan anei uhi.

³⁰Tualeh atung ah chil asiat ua, pumpeng chiang alaksak ua, alu satnan anei uhi.

³¹Tualeh amah chiamnuih bawlna a aneihzoh un, puansandup asutkhiat sak ua, ama puante asilhsak ua, kross a kilhden dingin a paipihta uhi.

³²Tualeh ahung pawtdok uleh Kurini mi amin Simon kichi mikhat amu ua, amah kross puading in aman uhi.

³³Tualeh Golgotha kichi mun a hungtun un, “Hua pen luguh mun chihna ahi.”

³⁴Amauhte`n uain silkha tawh kihel dawn ding in apia ua, aman achep takin a dawnnuam kei hi.

³⁵Tualeh kross a akilhden khit un, aisan in a puansilhte akihawm ua; Jawlneiin, Amau`n ka puante a kihawm ua, ka puan-ak tual tung ah ai asan uh, chia anagen atangtun na ding in.

³⁶Huamun ah atou ua, avengta uhi.

³⁷Tualeh ahekna, “HIH JUDATE KUMPIPA JESU AHI,” chia gelh alutung ah atak uhi.

³⁸Tualeh amah tawh suamhat nih zong akilhden ua, ajiatlam ah khat aveilam ah khat.

³⁹Tualeh mi vaklehte`n alu uh lawhkhum in a enghou uhi.

⁴⁰“Nang tempul hihsia a nithum sung a lamkik dingpa! Nang leh nang kihunkhia tanla Pasian Tapa nahihleh! Kross a pan hung kumkhia in!” achi ua.

⁴¹Tuachimah bangin siampite`n enghou in laigelhmite leh upate tawh:

⁴²“Aman midangte a hundam a; amah leh amah a ki hundamthei kei. Israelte kumpipa ahihleh kross dawn a pat hungkumta henla? Tuahileh igingta mai ding uh!

⁴³Aman Pasian amuang vele: ama deih ahihleh tuin hunkhiata henla, Pasian Tapa ka hi achi vele!” achi ua.

⁴⁴Hua suamhatte amah tawh kross a akilhdente un zong huachimah bangin a enghou uhi.

⁴⁵Dak gukna pan dak kuana dongin gamsung pumpi ah khim ahung ji`ng a.

⁴⁶Tualeh dakkua tuam in Jesu aw ngaihtak in akikou a, “ELOI, ELOI, LAMA SABAKTHANI?” achi hi, tuapen “Ka Pasian, ka Pasian bangding a hung taisan?” chihna ahi.

⁴⁷Akiang a ding mi khenkhatte`n, tua ajaktak un, hihpa`n, “Elijah sam ahi!” achi ua.

⁴⁸Alak ua mikhat kintakin avataipai a sponzi ala a grep tuithuk ah adiah a, pumpeng dawn ah atak a, adawnsak tou hi. [19]

⁴⁹Midangte`n, “Huachisak in, amah hundam dingin Elijah a hungpai ei enni!” achi ua.

⁵⁰Jesu aw ngaihtak in a kikou kik a, akha akhahta hi.

⁵¹Tualeh ngaiin, tempul puanjak a tunglam a pan in a nuailamtan in keknih ahung kisuah a; jin ahung ling a, suangpite ahung pokkek a,

⁵²tualeh hante ahung kihong a; misiangthou sisate pumpi tampi kaithoh in a omta uhi.

⁵³Tualeh ama thohkik nung in hante a pat hung pawtdok in khuapi siangthou ah alut ua, mi tampi kiang ah akilak uhi.

⁵⁴Tuachi`n galkap zalamkai leh akiang a Jesu veng a omten jinling leh sil hung omte amuh tak un alau mahmahta ua, “Hihpa Pasian Tapa ahi taktak na hi!” achi uhi.

⁵⁵Tualeh Galili gam a pat a ana sepsakjel kawm a Jesu hungjui numei tamtak huamun ah a om ua, gamlatak a pat a en uhi.

⁵⁶Huate lak ah Mari Magdalini, Mari Jakob leh Joseph nu, Zebedi tapate nu Mari a om uhi.

⁵⁷Nitaklam ahunghih in Jesu nungjui hive Arimathai khua a om amin Joseph mihausa khat a hungpai a.

⁵⁸Amah Pilat kiangah apai a, Jesu luang a ngen a, tuachi`n Pilat in pia dingin thu apia hi.

⁵⁹Tuachi`n Joseph in aluang ala a, puan malngat siangtak in atuam a,

⁶⁰ahanthak, suang akhuak hawm ah asial a, han kongkhak ah suang lianpi khat aliklut a, apaita hi.

⁶¹Mari Magdalini leh Mari dangte han mai ah touin a om uhi.

⁶²Tualeh ajingni in, hua hi kiginni jingni ahi a, siampite leh Pharisaite Pilat kiang ah ahung kikhawm ua.

⁶³“Siapa, hih mikhemhat pa`n adamlai in, ‘Nithum zohchiang in ka thoukik ding achih ka theigige uhi.’

⁶⁴Tuajiakin han pen nithum tan hoihtak a veng dingin thu pia in, atuachih keileh jan kal in a nungjuite paiin amah avagu kha ding ua, mipilak ah, misi lak a kipan a thoukikta hi, achi khading uhi; tuachi`n khemna masa sang in khemna nunung pen asiajaw sem ding,” achi ua.

⁶⁵Pilat in akiang uah, “Vengmi galkapte nanei ve ua le,” “Pai unla na hihtheih bang un venghoihsak ta unla,” achi a.

⁶⁶Tuachi`n apai ua han a enchian ua, asuang achiamteh ua, vengtu akoihta uhi.