Read Thangal Naga MATHAI 3 Bible Online

MATHAI 3 - Thangal Naga bible

MATHAI 3

¹Tuahunlai in baptispa Johan Judea gamdai ah, thugen in a hungpai a.

²“Kisik un, Van gam anaita!” achi hi.

³Amah ahi Jawlnei Isaiah in, “Gamdai a mi kikou aw khat in, ‘Toupa lampi sial unla; Lampi tangsak un!’ ” achi, chia anagen.

⁴Tualeh Johan in sangawngsau mul puan in asilh a savun kawnggak tawh akawng agak a, tualeh a annek pen kauphe leh khuaiju ahi.

⁵Tuachi`n Jerusalem khuate, Judea gamte leh Jordan luikim gam a pan mi amah kiangah a hungpai ua.

⁶A khialhnate uh a phuangkhia ua Johan in Jordan luiah amauhte ana baptis hi.

⁷Hinanleh aman Pharisaite leh Sadukaite tampi akiang a baptisma tang ding a hungpai amuhtak in, aman akiang uah, “Nou, gul suante aw, thangpaihna hungtung ding taisan ding a kuan hung taihilh ahia? achi hi.

⁸Tuajiakin kisik chinna gah hungnei khia phot un.

⁹Abraham kapa uh ahi chi`n noumauh in ngaihsutna nei kei un. Pasian in suangtang neute zong Abraham tate suaksakthei hi!

¹⁰Tualeh tu mahmah in heipi singzung teng ah kikoihkhin hi; tuajiakin singkung gahhoih neilou jousiah sattan a meilak a paih ahi ding hi.

¹¹Ken na kisikna uh lahna ding in tui in kung baptis a, hinanleh ka nung a hung paidingpa ahihleh keisang a hatzaw ahi a; akhedap tawi ding a zong taklou ka hi. Aman Khasiangthou leh mei in ahung baptis ding hi. [5]

¹²A phikphek a khut ah a tawi a, aman a buhphual ngiltak in ajapsiang kilkel ding a tualeh anbuk sungah buhtakte a koihkhawm ding a; hinanleh buhsite pen amittheilou mei tawh ahaltum ding hi.”

¹³Tuachi`n Jesu Johan kiang a baptisma tang ding in, Galili gam a pan Jordan luiah a hungpai hi.

¹⁴Hinanleh Johan in kham sawm in, “Nang kei nung baptis ding poimoh jaw hi`ng a, Kei kiangah Nang nungpai jawsop ding maw!” achi hi.

¹⁵Hinanleh Jesu`n a dawng a hichi`n a kiangah, “Tu`n hithei sak teitei in; hihbang diktatnate tengteng sep tangtun ei a ding a chinna ahi,” achi hi. Tuachi`n aman aphalsak ta hi.

¹⁶Tualeh Jesu`n baptisma a tankhit, tuilak a pat ahung pawtkhiat phet in, ngaiin, amah a dingin van ahung ki hongkhia a, vak in amah a khohsuk a Pasian Khasiangthou vakhu bang a hung kumsuk amu hi.

¹⁷Tuachi`n thakhat in van a pan in aw khat in, “Hih Ka Tapa it tak ahi, Ka kipahna mahmah ahi,” achi hi.