Read Thangal Naga MATHAI 5 Bible Online

MATHAI 5 - Thangal Naga bible

MATHAI 5

¹Mihonpi amuhtak in, mual tungah apaitou a, atou a. Anungjuite a kiangah ahungpaita ua,

²tuachi`n thu agen a, hichin a nungjuite thu ahilhta hi:

³“Khalam a jawngkhalte a hampha uhi; van gam amau ua ahihman in!”

⁴“Lungkhamte a hampha uhi; khamuan a om ding ahihman un!”

⁵“Mi nunnemte ahampha uhi; leigou luah ding ahihman un!”

⁶“Diktatna lunggulh a gilkial dangtakte ahampha uhi; taiding ahihjiak un!”

⁷“Zahngaitheite ahampha uhi; zahngaihna mu ding ahihman un!”

⁸“Lungsim a siangthoute ahampha uhi; Pasian mu ding ahihjiak un!”

⁹“Lemna bawlte ahampha uhi, Pasian Tate kichi ding ahihjiak un!”

¹⁰“Diktatna jiaka gawtna thuakte ahampha uhi; van gam amauh a ahihjiak in!”

¹¹“Mi`n Kei jiaka ahung housiat ua, ahung gawt ua juau a gilou chiteng a ahunghek hun chiang un na hampha uhi.

¹²Nuam unla nakpitak in kipak un, van ah na nuamman uh thupi ahihman in. Tuamah bangin namai ua Jawlnei omte zong ana bawlsia uhi.”

¹³“Noute lei chi nahi uhi. Hinanleh chi in a alna mansuah taleh, bang chi`n alkikthei ding ahia, Paihkhiat a mite chilgawp ding louhngal in bangmah phattuamna anei nawnkei ding hi.

¹⁴“Noute leitung va`k nahi uh. Mualtung a khuapi om pen phualdap theih ahi kei.

¹⁵Kuaman a meivak de in lawh nuaiah akoih ngaikei; a tanna khuam tungah akoih a, tuachi`n ava`k in innsung teng asalhvakjaw hi.

¹⁶Tuachimah bangin, na va`k uh mite maiah va`k hen, tuahileh mi`n na nasep-hoihte uh mu un chin, van a om na Pa uh min aphatthei ding uhi.

¹⁷“Jawlneite leh da`nthu beisak ding a hungpai ka hih hung gingta kei un. Beisak ding a hungpai ka hikei a tangtungsak ding a hungpai ka hijaw hi.

¹⁸Adiktak in na kiang uah kung hilh ahi, lei leh van aman masiah, da`nthu bu a sut vom khat hiam, laimal neunou khat zong a mangthang kei ding, aun a atangtun masiah.

¹⁹Tuajiakin, kuahileh hih da`n thupiakte lak a neupen khatmai zong juilou a, tuabang bawl ding a mi hilhte pen, van gam ah mineupen a kichi ding uhi. Hinanleh kuahileh a jui a mi hilhte van gam ah milian a kichi ding hi.

²⁰Na diktatna un Laigelhmite leh Pharisaite diktatna akhupzoh keileh, van gam na lut kei ding uh, chih kung hilh ahi.

²¹“Tanglai mite kiangah, ‘Tual na thahlouh ding uh ahi, kuahileh tualthat in thukhenni a dingin lauhhuai takin aom ding chih na jata uhi.’

²²Hinanleh ken noute kung hilh ahi: Ajiak beia a sanggampa tung a hehmi pen thukhenna thuak ding in alauhuai ding; tualeh a sanggampa sialphou mi pen vaihawmpawl maia dinding alauhuai ding; hinanleh a sanggampa kiang a ‘Nang mimaw!’ chi mi pen gawtmun meidil a paihding alauhuai ding hi. [6]

²³Tuajiakin maitam a silpiak latding a nungtawi laitakin, na sanggampa`n na tungah banghiam khat lungkim louhna anei hi chih na theihleh,

²⁴maitam maiah na silpiak nusia inla, pai inla na sanggampa tawh kilem masaphot inla, tuakhit chiah hungpai inla na silpiak lan in.

²⁵“Na langpa tawh lampi a na pailai un kintakin kileppih in, atuachih keileh na langpa`n vaihawmmite khut ah ahung piakhia kha ding a, tualeh vaihawmmite`n mimanpa khut ah ahung piakhia kha ding a thong ah a hungkhum kha ding uhi.

²⁶Adiktak in na kiang uah kung hilh ahi, paisasan khat bek napiak masiah hua a pan-in na pawtkhia ngaikei ding hi.

²⁷“Tanglai mite kiangah, ‘Ang na kawmlouh ding ahi,’ chia kigen najata uhi.

²⁸Hinanleh Ken: kuahileh numei sualpih utna tawh enmi in a lungsim in huanu tawh ang a kawmkhinta ka chi hi.

²⁹Tualeh na mit jiatlam in ahung khialhsak ding leh, kheikhia inla na kiang a pan paikhia in! Na pumpi gawtmun meidil a paih a aom sangin na chimeng khat mansuah nang a dingin ahoihjaw hi.

³⁰Tuaban ah nakhut jiatlam in ahung khialhsak ding leh, sattan inla na kiang a pan paikhia in! Na pumpi a gawtmun meidil a paih a na om sangin na chimeng khat mansuah nang a dingin ahoihjaw hi.

³¹“Tuaban ah, ‘Kuapeuh azi khul in, kikhulna lai a kiangah pia hen,’ zong aki chi hi.

³²Hinanleh Ken: kuapeuh angkawm jiak hilou a, bangjiak hiam a azi khul in, amah angkawmsak ahi; tualeh kuapeuh khulsa numei kitenpihte zong angkawm ahi, ka chi hi.

³³“Tanglai mite kiangah, ‘Juauthu in kichiam kenla, hinanleh Toupa kiangah na kichiamnate tangtung sakjaw in, a kichi chih zong najata uhi.’

³⁴Hinanleh Ken na kiang uah kung hilh ahi: Kichiam mawng mawng kei un. Van louin kichiam kei un, Pasian Laltouna ahihjiak in;

³⁵leitung louin zong kichiam kei un, akeng koihna ahihjiak in; Jerusalem lou in zong kichiam kei un, kumpi liantak khuapi ahihjiak in.

³⁶Na lutang louin zong kichiam kei un, ajiak samzang khat zong na kangsakthei kei a, zong na vomsakthei kei hi.

³⁷Hinanleh, ‘Ahi’ nachih uleh ahi hihenla, ‘Hilou’ nachih uh ahilou hilel hen, aka`n avalpen gitlouhna a kipan ahi.

³⁸“ ‘Mit tang in mit, ha tang in ha, aki chi chia kigen na jangaita uhi.’

³⁹Hinanleh Ken na kiang uah kung hilh ahi: migiloute dal kenla, hinanleh kuahiam in na pheta jiatlam ahung bek leh alangkhat zong dawh in.

⁴⁰Kuahiam khat in hung hek a na puan-ak a lakmang utleh na puantual zong lasakvet in.

⁴¹Tualeh mi kuahiam in melkhat pai ding a nang ahung phutleh, amah toh melnih pai in.

⁴²Na kiang a hungngen kiangah pia inla, tualeh na kiang a leitawi nuamte a pan kihem mang ken.

⁴³“Na vengte na it ding a, ‘Na melmate na huading chia kigen na ja-ngaita uhi.’

⁴⁴Hinanleh Ken na kiang uah kung hilh ahi: na melmate it inla, nang hung gensiate thupha pia inla, nang hung huate kiang ah silhoih bawl inla, tualeh nang hung gawtte leh nang hung nuaisiahte thumsak jaw in,

⁴⁵van a om na Pa uh tate na hung hihtheihna ding un. Aman migiloute tung leh mihoihte ni suaksak a, tualeh midikte tung leh midikloute tungah guah a jusak hi.

⁴⁶Nou hung itte guak na it uleh, nuamman bang ahia namuh ding uh? Siah dongmite nangawn in zong tuabang in a bawljel uh hilou maw!

⁴⁷Tualeh na sanggamte guak na pahtak uleh, midangte sangin bang na bawltamjaw tuan a? Siah dongmite nangawn in zong tuabang in a bawljel uh hilou maw!

⁴⁸Tuajiakin van a om na Pa uh a hoihkim sipsip mah bangin nou zong na hoihkim sipsip ding uhi.”