Read Thangal Naga MATHAI 6 Bible Online

MATHAI 6 - Thangal Naga bible

MATHAI 6

¹Mi mai a silhoih nabawlte uh amauhte mitmuh a bawllou dingin pilvang un, atuachih keileh van a om na Pa uh a pan nuamman na mukei ding uhi.

²“Tuajiakin silhoih na bawlchiang un milepchiahte`n mite maipha zong a kikhopna inn leh khualai lak a abawl bang un namai ah pengkul mut ken, adiktak in na kiangah kung hilh ahi, amauhte`n a nuamman uh amuta uhi.

³Hinanleh silhoih na bawlchiang in nakhut jiatlam in abawl nakhut veilam in theihdah hen.

⁴Na silhoih bawl pen agu`k in bawl in, tuahileh na Pa uh agu`k a mupa`n amah in langtangtak in nuamman nang a hungpia ding hi.”

⁵“Tualeh na thumchiang un milepchiahte bang kei un! Mi muh ding deih in amauhte`n kikhopna inn ah dinsa in a thum ua, tualeh kongjing ninglak ah athum nuam sese uhi. Adiktak in kung hilh ahi, amauhte`n a nuamman uh amuta uhi.

⁶Hinanleh nang na thumchiang in, na inndan sungah pai inla, kot nakhak zohchiah, agu`k a om na Pa kiang ah thum in. Tuahileh agu`k a hungmu na Pa in langtangtak in nuamman nang hung pia ding hi.

⁷“Hinanleh nathum chiang in, Lawkite bangin thulimlou pouh ngen kikkik kei un, amauhte`n tamveipi genlei ingetna ja`k in a om ding chi`n a ngaihsun uhi.

⁸Tuajiakin amauhte bang kei un. Na ngetma un na poimohte uh na Pa un a theikhin hi.

⁹Tuajiakin hihbang in thum un: ‘Ka pa uh van a om: Na min kizahtak hen;

¹⁰Na gam hungtung hen; Na deihlam van a akibawl bangin, leiah zong kibawl hen.

¹¹Nisial a ka nekkhop uh an hung pian.

¹²Ka tung ua khialte ka ngaihdam bang un, Kou khialhnate zong hung ngaidam in.

¹³Khemna ah hung kailut kenla, Gilou lak pan hung hunkhiajaw in.’ Gam leh sil bawltheihna leh thupina, tangtawn a Nang a ahihjiak in. Amen. chi-in. [7]

¹⁴“Mi tatkhialhna na ngaihdam uleh, van a om na Pa un ahung ngaidam ding hi.

¹⁵Hinanleh mi tatkhialhna na ngaihdam kei uleh, van a om na Pa un ahung ngaidam kei ding hi.”

¹⁶Tuaban ah, “An na ngawl chiang un milepchiahte bangin dahmel puakei un. Amauhte`n anngawl ahih uh mi mitmuh a akilat theihna dingin amai uh a nguisak uhi. Adiktak in kung hilh ahi, amauhte`n a nuamman uh a mukhinta uhi.

¹⁷Hinanleh nang an na ngawlchiang in, na lu sathau nuh inla, na mai phiat in,

¹⁸tuachi`n na Pa agu`k a om mitmuh ah loungal midangte mitmuh in anngawl na bangkei ding a, agu`k a hungmu na Pa in alangtang in nuamman a hungpia ding hi.

¹⁹“Leia leikha leh samek in a neksiat theihna leh, gutate`n a suksiat ua a guktheihna mun hih leitung ah, gou kikhol kei un.

²⁰Hinanleh, van ah leikha leh samek in aneksiat theihlouhna leh, gutate`n asuksiat ua aguk theihlouhna mun ah, Gou kikhol jaw un.

²¹Ajiak pen nagou omna peuh uah na lungsim uh zong a om hi.

²²“Taksapum a dingin mit pen meiva`k ahi a, tuajiakin namit ahoih leh na taksa pumpi va`k in a pumdim ding hi;

²³hinanleh na mit ahoih keileh, na taksa pumpi mialna in a pumdim ding. Tuajiakin na sung a om va`kpen mialna a a pumdimleh, tua mial pen thupi tazen nan chia!

²⁴“Kuamah in tounih nna a semkop thei kei; khat hua in khat a it ding; ahihkeileh khat ah agin-om ding a, adang khat a simmoh ding hi. Pasian leh dangka nna a semkop thei kei ding. [8]

²⁵“Tuajiakin na kiang ah kung hilh ahi: bang ahia ka nek ding bang ahia ka dawn ding chi`n na hinna thu uh leh, bang ahia ka silh ding bang ahia ka ten ding chi`n na sapum thu uah lungkham kei un. Na nek ding sang un hinna poimohjaw hilou maw? Nasilh naten ding sangun na pumpi uh poimohjaw hilou maw?

²⁶Tungleng vasate en un: amauhte`n buh atuhkei ua a atkei uh, anbuk ah a kholkhawm kei uh; hinanleh na Pa uh van a om in ava`k hi! Noute amauhte sangin manphajaw tham hilou nahi uh hiam?

²⁷Noute lak ah kuan ahia lungkham jiaka adunglam tongkhat behlap thei?

²⁸“Tuajiakin bangding a silh leh ten a lungkham na hi uh hiam? Gamlak a Lilipakte khandan ngaihsun un: nna asemkei ua, khau zong akhek kei uh.

²⁹Tualeh na kiang uah kung hilh ahi, Solomon hilhial zong athupina tengteng tawh a kizep in zong hih Lilipakte lak a khat bang a zep in a omzou kei hi.

³⁰Tuachia gamlak a hampa tunia hing a, ajingchiang a vul a meikhuk a paihmai ding bawn Pasian in huachitan a azep tazen leh! aw nou ginna tawmte silh leh ten tamjawin hungjem jawtham lou ding maw!

³¹“Tuajiakin: ‘Bang ne in, bang idawn dia? chi-in hiam, bang isilh dia? chi-in hiam lungkham kei un.’

³²(Jentelte`n hihte tengteng a zong uhi.) Hihte tengteng na poimoh uhi chih van a om na Pa un athei hi.

³³Hinanleh Pasian gam leh adiktatna pen zong masa phot un, tuahileh hihte tengteng zong na kiang uah piakbehlap ahi ding hi.

³⁴Tuajiakin jingchiang a dingin lunghimoh kei un; ajingchiang in amah a ding aki lunghihmoh nading hi. Nikhat a dingin nikhat buai ahun hi.