Read Thangal Naga MATHAI 7 Bible Online

MATHAI 7 - Thangal Naga bible

MATHAI 7

¹“Thu khen kei un, tuahileh thu khen in na omkei ding uhi,

²thukhenna nabawl bangbang in nang zong thu khensak in na om ding; tualeh tehna nazak bangbang in na kiang ah teh in na om ding hi.

³Tualeh, bangding a, nangma mit a om singtun ngaihtuahlou a na sanggampa mit a om ninthem mu nahia?

⁴Ahihkeileh bang chi`n na sanggampa kiang ah, ‘Namit a nintang pen hung lakkhiatsak ning na chithei dia,’ Tualeh en in, nangma mit ah singtun om hilou maw? [9]

⁵Milepchiah! nangma mit a om singtun lakhia masa in, tuahileh na sanggampa mit a kipan ninthem lakkhiat ding a om pen siangtak in namu ding hi.

⁶“Uite kiang ah sil siangthou piakei un, vokpi maiah na tuikepsuang uh zong paikei un, amau`n akeng un atuanchil ding ua, tualeh kiheiin nou ahung balnen khading uhi.

⁷“Ngen un, tuachi`n piakin na om ding uhi; zong un, tuachi`n na mu ding uhi; kiu-un, tuachi`n hon in na om ding uhi.

⁸Kuapeuh a ngen taphot in a ngah ua, kuapeuh azong taphot in amu ua; tualeh kuapeuh akiu taphot honsakin a om ding uhi.

⁹Ahihkeileh kua in ahia a tapa in tanghou ngentaleh suang pia ding?

¹⁰Ahihkeileh ngasa ngentaleh gul pia ding?

¹¹Ahihleh nou migiloute`n bawn, na tate uh kiang a silhoih piak nadan natheih uleh, na Pa uh van a om in a kiang a ngente kiangah silhoih piak nadan theisiam zawsem lou ding maw!

¹²“Tuajiakin sil bangkim mi`n na tung ua bawl ding a na deih bang uh, amauh tungah zong bawl un: tuapen da`n bangtak leh Jawlneite thu mawng ahi.

¹³“Kong kawchi`k ah lut un, manthaina lutna kong a jaia, tualeh a lampi zong alian hi, hihlam a pai mi atam hi.

¹⁴Ajiak hinna a paina kong a kawchi`k a, alampi zong aneu hi. Tualeh amute zong tawmnou khat ahi uhi.

¹⁵“Jawlnei takloute a pan pilvang un; belam vun silh in na kiang uah ahung paijel ua, hinanleh asunggil uah ngia duhgawl bang ahi uhi.

¹⁶Amauhte pen agah in akithei ding uhi. Mi`n lingbawk a pan grepgah a loungai uh maw, Ahihkeileh pakkung a pan thei a loungai uh maw?

¹⁷Tuachimah bangin singkung hoihte agah zong ahoih a, hinanleh singkung siate agah zong asia hi.

¹⁸Singkung hoih in gahhoihlou a suangngai kei a, singkung hoihlou in zong gahhoih a suangngai kei hi.

¹⁹Singkung gahhoih suanglou jousiah aphuk ua, meilak ah apai uhi.

²⁰Tuajiakin, agah ua panin amauhte nathei ding uhi.

²¹“ ‘Toupa, Toupa,’ hung chi jousiah van gam ah alut kei ding uh, hinanleh kuapeuh van a om ka Pa deihlam bawlte bek alut ding uhi.

²²Tuani chiangin mi tampi`n, ‘Toupa! na min in thu ka gen uh hilou maw, Na min in dawite ka hawlkhia uh hilou maw, Tualeh na min in sillamdang tampi ka bawl uh hilou maw!’ achi ding uh hi.

²³Tuachiang in ken, ‘Nou sil gilou bawlte aw, ka kiang a pan paimang un. Ken noute kung theingai kei!’ ka chi ding hi.

²⁴“Tuajiakin Ka thugen ja a ajui mite pen, mipil suangpi tung a innlam mite tawh kateh ding hi.

²⁵Tuachi`n guah ahung ju a, tui ahung khang a, huih ahung la`ng a tua inn ahung mutgawp a, suangpi tung a kiptak a lam ahihjiak in apuk kei hi.

²⁶“Hinanleh kuapeuh hih ka thugen ja a, juiloute pen, mimaw sehnel tung a innlam tetawh kateh kak ding hi.

²⁷Tualeh guah ahung ju a, tui ahung khang a, tualeh huih ahung la`ng a, tua inn ahung mutgawp a; apuk a, achimjan dimdem hi!”

²⁸Tualeh Jesu`n hih thute tengteng a genzoh in mipite`n a thuhilhte lamdang asa mahmah uhi.

²⁹Laigelhmite banglou a, thuneihna nei khat bangtak a amauhte thu a hilhjiak in.