Read Thangal Naga MATHAI 8 Bible Online

MATHAI 8 - Thangal Naga bible

MATHAI 8

¹Mual a kipan a amah ahung kumsuk zoh in, mipi thupitak in anung ajui uhi.

²Tualeh ngaiin, miphak khat a hungpai a, Toupa nang na utleh nung siangthousak thei hi chi`n amah abia a.

³Tuatakin Jesu`n akhut ajankhia a, amahpa a khoih a, “Ka ut hi, Siangthouta in!” achi a, manlangtak in aphakte ahung siangthouta hi.

⁴Tuachi`n Jesu`n akiang ah, “Kuamah hilhlou dingin pilvang in, hinanleh pai inla siampu kiang ah vakilak inla; Mosi in sil piak ding achihte valan in, atheihchian na ding un,” achi hi.

⁵Tualeh Jesu Kapernaum khua alut khit takin, galkap zalamkai khat hungpai in a kiangah ahung ngetsak a:

⁶“Toupa, ka silapa jengin inn ah alum a, lauhuaitak in a thuakgim mahmah hi,” achi a,

⁷Tualeh Jesu`n akiang ah, “Kungpai ding a kung damsak ding,” achi a,

⁸Galkap zalamkaipa`n, “Toupa ka inn nang hungpaina ta`k ahikei, hinanleh thu tengkhat genlechin ka suakpa adam ding hi.

⁹Kei zong, mi thuneihna nuai a om ka hi a, kanuai ah galkap a om ua, tualeh khat kiangah, ‘Paiin!’ ka chihleh amah apai a, tualeh adang khat kiangah, ‘Hungpaiin!’ kachihleh amah a hungpai a; tualeh ka silapa kiangah, ‘Hih bawlin!’ ka chihleh aman a bawljel hi,” achia, a dawng a.

¹⁰Tuachia Jesu`n azaktak in lamdang asa mahmah a a nungjuite kiangah, “Adiktak in kung hilh ahi, Israelte lak ah zong hihbang a ginna thupi ka mungai naikei, achi hi.

¹¹Tualeh na kiang uah kung hilh ahi, suahlam leh tumlam a kipan mi tampi a hungpai ding ua, van gam ah: Abraham, Isak leh Jakobte tawh a toukhawm ding uhi.

¹²Hinanleh gam tate pen pualam mial ah paihkhiat in a om ding uhi. Tua-ah kah leh hagawina aom ding,” achi hi.

¹³Tuachi`n Jesu`n galkap zalamkaipa kiangah, “Paita in, na ginta`k bangin nang a dingin bawl ahi ding,” achi hi. Tualeh hihhun mah in a silapa damsak in a om hi.

¹⁴Tualeh Jesu Peter inn a a hunglut tak in, asungnu nattun a damloua lum amu hi.

¹⁵Tualeh aman a khut atham a, tuachi`n a nattun pen adamta hi. Tuachi`n amahnu athou a, ana uh a sepsakta hi.

¹⁶Tualeh nitaklam ahung hih takin, dawimat mi tampi a kiangah ahung paipih ua, tualeh aman a kam a thu tawh dawite a delhpawt a, tualeh adamlou jousiah a damsaksiang hi.

¹⁷Jawlnei Isaiah in: “Amah in i hatlouhnate ala a, i natnate a puamang,” chia agenpen hung tuntheihna ding in.

¹⁸Tualeh Jesu`n a kimkawt a mipi tampite amuhtak in, galkhat lam a pai dingin thu apia a.

¹⁹Tuachi`n Laigelhmite khat a kiang a hungpai in, “Siapa, Na paina teng ah kungjui ding hi,” a chi a.

²⁰Tuachiah Jesu`n a kiangah, “Si-alte`n kua anei ua, tungleng vasate`n zong bu anei, hinanleh Mihing Tapa-in lu-ngaknang mun khoimah ah anei kei,” achi hi.

²¹Tuachi`n a nungjuite lak a khat in akiang ah, “Toupa vapai ningin kapa vavui masaphot ning,” achi hi.

²²Hinanleh Jesu`n a kiangah, “Hungjui in, misi in a misi uh ana kivui nading uhi,” achi hi.

²³Tualeh gunkuang sunga a lutkhit takin, a nungjuite`n amah ajui ua.

²⁴Thakhat in tuipi tung a kipan huihpi hattakin ahung la`ng a, tuachi`n gunkuang ahung kihotsakta a. Hinanleh amah pen a ihmu lai hi.

²⁵Tuachi`n a nungjuite a kiangah a hungpai ua, “Toupa koute hung hundam in! Mangthang ding ka hita uh!” chi`n amah ahung phong ua.

²⁶Hinanleh aman akiang uah, “Nou ginna tawmte aw! Bangding a lau nahi ua?” achi a, tuazoh in amah a thoukhia a, huihpi leh tuipi a atai a, tuachi`n ahung daisiang sipsipta hi.

²⁷Tualeh mite`n lamdang asa ua, “Hih mipa, bang chibang mi ahia? Huih leh tuipi nangawn in athu aman uh!” achi ua.

²⁸Tuachi a Gadara gam langkhat lam a a hungpai takin, dawimat pasal nih han a kipan hungpawt in ahung tuak ua, ahang mahmah ua, tualeh hih lampi ah kuamah a paithei kei uhi. [10]

²⁹Tualeh thakhat in ahung kikou khia ua, “Jesu, nang Pasian Tapa, nang leh kou bang kisaina nei ihi hiam? ahun tunma a koute bawlgenthei ding a hihteng a hungpai nahi maw?” achi uhi.

³⁰Tualeh a kiang ua kipan gamlalou ah vok-hon tampi aom ua.

³¹Tuachi`n dawite`n, “Koute nung delhpawt ding a ahihleh vok-honte sung a lutding hung phalsak in,” chi`n a kiangah a ngen ua.

³²Tualeh aman a kianguah, “Pai un,” achi a; tualeh ahung pawtkhiat tak un, vok-honte sungah alutpai ua. Thakhat in vok-hon jousiah ken a kipan ahung taisuk ua, tuipi sungah atailut ua, tuilak ah a mangthangta uhi.

³³Tuatakin ganchingte atai ua khuapi sungah apai ua, dawimat pasal nihte tungtang a sil omdan leh sil omdan bangkim a hilhta uhi.

³⁴Tuachi`n khua a pat mipite hung pawtkhia in Jesu kiangah a hungpai ua, amah amuhtak un, agam uh paisan dingin a ngenta uhi.