Read Thangal Naga MATHAI 9 Bible Online

MATHAI 9 - Thangal Naga bible

MATHAI 9

¹Tuachi`n Jesu gunkuang khat ah alut a, agalkai a, ama khuapi ah a hungtungta hi, [11]

²tualeh ngaiin, lupna tung a lum jeng khat a kiang ah a hungpua uhi. Jesu`n a ginna uh amuhtak in a jengpa kiangah, “Tapa, kipak in om in! na khialhnate ngaihdam ahita,” achi hi.

³Tualeh laigelhmi amau sung a kuahiam khat in, “Hihpa in Pasian agensia!” achi a.

⁴Hinanleh Jesu`n a ngaihsutte uh athei a, “Bangding a na lungsim ua gilou ngaihtuah nahi ua? achi hi.

⁵‘Na khialhna ngaihdam hihen,’ chihleh, ‘Thou inla nakeng in paiin chih khoipen agen baihlam pen dia’?

⁶Hinanleh mihing Tapa in leitung ah khialhnate ngaihdam theihna thuneihna anei chih na theihna ding un.” Tuachi`n aman a jengpa kiangah, “Thou inla, na lupna la inla na inn ah paita in!” achi hi.

⁷Tuachi`n amah athou a a inn ah apaita hi.

⁸Mipite`n hih amuhtak un, lamdang asa ua, huachibang bawltheihna mihingte kiang a piapa, Pasian aphatta uhi.

⁹Tualeh huamun a pan Jesu apaijom jel laiin, siah piakna zum a tou mikhat amin Mathai kichi amu a, aman akiang ah, “Hung juiin,” achi a. Tuachi`n amah zong adingkhia a ajuipaita hi. [12]

¹⁰Tualeh hichi ahi a, Jesu a innsung a dohkan geia atoulai in, ngaiin, siahdong mite leh mikhialte a hungpai ua, amah leh a nungjuite kiangah a hungtou ua.

¹¹Pharisaite`n tua amuhtak un, a nungjuite kiangah, “Bangding a na siapa un siah dongmite leh mikhialte tawh an nekhawm ahia?” achi ua.

¹²Hinanleh Jesu`n tuabang a jaktak in, aman akiang uah, “Mi chidamte`n daktor a poimoh kei ua, hinanleh damloute`n apoimoh uhi, achi hi.

¹³Hinanleh kithoihna deihlou in zahngaihna ka deih hi, bang chihna hiam chih pai unla vazil un; ‘midikte sam ding a hungpai ka hikei a, mikhialte sam ding a hungpai ka hijaw,’ ” achi hi.

¹⁴Tuachi`n Johan nungjuite a kiangah a hungpai ua, “Bangding a koute leh Pharisaite`n anngawl jel ung a, hinanleh na nungjuite`n ngawllou uh ahia?” achi ua.

¹⁵Tuachi`n Jesu`n akiang uah, “Mouneipa amauh toh a omkhawm laiin alawmte`n Mouneipa a su`nngai uh maw? Hinanleh Mouneipa amauh kiangpan lakmang a aom hun a hungtung ding a, tuahun chiangin amauhte`n zong angawl ding uhi, achi hi.

¹⁶“Kuaman puanlui puan thak toh aphawh ngaikei, a phawhna puanthem in ahung kaikek beh ding a, ahung keksia semsem jaw khading hi.

¹⁷Kuaman uain thak savun uain thawl lui sungah a thunngai kei uh, atuachih keileh savun thawlte ahung pokkek ding a, a uainte akibua ding a, savun thawl zong ahung sia ding hi. Hinanleh amau`n uain savun thawl thak sungah uain thak athunjaw uh a, tuachi`n anih in a kemhoih tuaktuak uhi,” achi hi.

¹⁸Hihthute akiang ua agen laitak in, ngaiin, vaihawmpa khat hungpaiin amah chibai ahungbuk a, “Ka tanu tutakin asi a; hungpai inla amahnu tungah nakhut hungkoih lechin ahing ding,” achi a.

¹⁹Tuachi`n Jesu a dingkhia a anung ajuita a, a nungjuite`n zong ajuichiat ua.

²⁰Tualeh thakhat in, kum sawmlehnih sipawt numei khat a nungah hungpai in a puanmong ahung khoih a.

²¹Numeinu`n, “A puan vakhoihkha maimai lengzong, kadam ding hi chi`n amah leh amah a kichi hi.”

²²Hinanleh Jesu akihei a, amahnu a muhtak in, “Tanu aw, kipaktak in om in! Na ginna in ahung damsakta,” achi a. Tuahun a pat in numeinu ahung damta hi.

²³Tualeh Jesu vaihawmpa inn ah alut a. Theile mutte leh sisu`n a mipi au vengvungte a vamuh in,

²⁴“Pawt un, numei naupangnu asi ahi kei-a ihmu ahi!” chi`n aman akiang uah achi a. Tualeh amauhte`n simmoh takin amah anuihsan ua.

²⁵Tuachia mipite a pualam a a nohkhiat khit tak un, amah asung ah alut a, akhut ah atu a, tuatak in numei naupangnu ahung thouta hi.

²⁶Tuachi`n hihthu tua gam tengteng ah ahung thangkhiata hi.

²⁷Tuachia Jesu tuamun a pat a apawtkhiat laiin, mittaw nih in, “David Tapa, ka tung uah zahngaiin!” chia kikou in anung ajui ua.

²⁸Tualeh inn a alut leh mittaw nihte a kiang ah a hungpai ua, Jesu`n akiang uah, “Hihte bawlthei dingin kei nunggingta uh hiam?” achi a. Amau`n a kiang ah, “Hi, Toupa!” kung gingta uh! achi ua.

²⁹Tuachi`n aman amitte uh atham a, “Na gintak bang un, na tung uah tunghen!” achi a,

³⁰Tuachi`n amit uh ahung vakta a, tualeh Jesu`n akiang uah, “Kuamah theihlouh dingin pilvang un!” chi`n hahtak in a taihilh a.

³¹Hinanleh amauh a pawtkhia ua, tuagam tengteng ah atanchin a thangsakta uhi.

³²A pawtkhiat laitak un, ngaiin, dawimat hamtheilou mikhat a kiangah ahung paipih ua.

³³Tualeh dawipen adelh khiat takin, a hamtheiloupa ahung hamtheita a, tuatak in mipite`n lamdang asa mahmah ua, “Israelte lak ah hihbang a kimu ngaikei!” achi ua.

³⁴Hinanleh Pharisaite`n, “Dawite vaihawmpa jal in ahi dawite a hawlkhiat,” achi ua.

³⁵Tuachi`n Jesu`n a kikhopna innte uah thu hilh in, van gam tangthupha gen in, damloute tengteng damsak in, natna chiteng damsak in khuapi leh khuaneute ah avak kawikawi hi.

³⁶Hinanleh mipite a muhtak in, chingding neilou belamte bang a gimthuak leh kithehthang a aom jiak un amauhte a hehpih mahmah a.

³⁷Tuachi`n aman a nungjuite kiangah, “Buh lakding lah atam mahmah a, hinanleh asemmite atawm uhi.

³⁸Tuajiakin a buh lading a semdingte sawlding in buh neipa kiangah ngen un,” achi hi.