Read Thangal Naga MARKA 1 Bible Online

MARKA 1 - Thangal Naga bible

MARKA 1

¹Pasian Tapa Jesu Krist tangthupha kipatna;

²Jawlnei Isaiah laibu ah: “Ngaiin, ‘ka sawltak na maiah ka sawl a, aman na lampi abawl ding.’

³Gamdaia kikou aw khat in, ‘Toupa lamlian sial unla; a lampite tangsak un!’ ” achi, chia gelh bang in.

⁴Johan in gamdai ah a baptis a, “sil bawlkhialhte ngaihdamna ding a kisikna baptis thu gen in a hungpawt hi.”

⁵Tualeh Judea gam a mi jousiah leh Jerusalem a omte a pawt ua, a kiangah apai ua, a khialhna uh phuangkhia in, Jordan luiah akiang ah baptisma atangchiat uhi.

⁶Tualeh Johan in sangawngsau mul puan in asilh a savun kawng-gak in akawng a gak a, kauphe leh khuaiju ane hi.

⁷Tualeh, “Ka nung a hungpaipa kei sang a hatjaw ahi. Kun-a ama khedap khau sutding nangawn chinlou ka hi.

⁸Ken tuiin nou kung baptis a, hinanleh aman Khasiangthou in noute a hung baptis ding chi`n thu agen hi.”

⁹Tualeh huahun laiin hichi ahi a, Jesu Galili gam Nazareth khua a kipan in a hungpai a, Johan kiangah Jordan luiah baptisma a tangta a.

¹⁰Tualeh tui a pat ahung pawttak in, van akihong a, Khasiangthou vakhu bang a hung kumsuk, atung a tuang amu a.

¹¹Tualeh van a pan aw khat a hungging a; “Nang ka Tapa deihtak na hi, na tungah ka kipak mahmah hi,” achi hi.

¹²Tuakhit phet in kha-in amah gamdai ah a-sawl khia pai a,

¹³Tuachi`n Setan khem a om in gamdai ah ni sawmli a om a. Gamsa gilou lak ah a om a, vantungmite`n a nna a sepsak uhi.

¹⁴Johan thong a akhum nung un, Jesu Pasian gam tangthupha gen in Galili gam ah a hungpai a.

¹⁵“Ahun a tungta, Pasian gam anaita hi! kisik unla tangthupha gingta un!” chi-in.

¹⁶Tualeh Jesu Galili tuipi piau a avak na ah, Simon leh a sanggampa Andru dil a ngenkhuh a mu a, amauhte ngamanmi ahi uhi.

¹⁷Tuachi`n Jesu`n a kiang uah, “Kei hungjui un, mihing man dingin nou kungbawl ding hi,” achi hi.

¹⁸Tuatakin amau`n a ngente uh nusia in amah ajuipai uhi.

¹⁹Hua a kipan themkhat a paibehlaileh, Zebedi tapa Jakob leh a sanggampa Johan amu a, amau a ngen uh phawh a gunkuang sung a om ahi ua.

²⁰Tualeh aman amauhte a sam pai a; amauh tegel in zong apa uh Zebedi pen a migoihte utawh gunkuang sungah nusia in ajuita uhi.

²¹Tuachi`n Kapernaum khua ah avalut ua; khawlni-in kikhopna inn ah alutpai a, thu ahilh hi.

²²Tualeh laigelhmite banglou a, thuneihna neimi bang a amauh thu ahilhjiak in, a thuhilh lamdang asa mah mah uhi.

²³Tualeh a kikhopna inn uah dawinin pai pasal khat a om a; a kikoukhia a,

²⁴ka tang un hung omsak in, “Nazareth Jesu nang tawh kou bang bawl ding nei ihia? Koute hih mangthang ding a hungpai nahi maw? Nang kua nahia chih kungthei hi. Pasian Misiangthou nahi!” achi hi.

²⁵Hinanleh Jesu`n a phawk a, “Dai inla, asung a kipan in hungpawt in!” achi a.

²⁶Dawinin in amah engbawl a ngaihtak a kikou in asung a kipan ahung pawtkhia hi.

²⁷Tualeh aun un lamdang asa mahmah ua, tuachi`n, “Hih bang ahia? Bang chibang thuhilhna thak ahia? Aman thuneitakin dawininte nasan thu apia a, athu amangjel uh!” chi in, a kidong tuah uhi.

²⁸Tualeh Galili gam kim tengah gamchin ah atanchin a thangsuak pai hi.

²⁹Tualeh kikhopna inn a pan ahung pawtkhiat khit un Simon leh Andru inn ah, Jakob leh Johan tawh alutpai ua.

³⁰Simon sungnu nattun a damlou in lupna ah ana lum a, tuathu Jesu ahilhpai uhi.

³¹Tuachi`n amah hungpai in, akhut a tuin a phongtou a, tuachi`n a nattun adamta a, a nna uh a sepsakta hi.

³²Tualeh nitaklam nitum nung in damlou jousiah leh dawimatte a kiangah ahung paipih uhi.

³³Tualeh khuapi sung a mi jousiah kotpi bul ah ahung ki khawmkhawm ua.

³⁴Aman mi tampi natna tuamtuam a nate a damsak a, dawite tampi zong a hawlkhia a; hinanleh dawite`n amah kua hihiam chih thei ahihman in, aham uh aphalkei hi.

³⁵Jingsang baihtak in, khuavak ma in, Jesu athou a, a pawtkhia a, munsip ah apai a, huamun ah athumta ahi.

³⁶Tualeh Simon leh akiang a omten azong ua,

³⁷Amah amuhtak un a kiangah, “Mi jousiahin nang a hungjong uhi!” achi uhi.

³⁸Aman akiang uah, “Aban a khuate ah paini. Hualak ah zong ka thupuak ka phuankhiat theih nang in, tua mah kungpaina san ahi,” achi hi.

³⁹Tuachi`n a kikhopna inn uah a thupuak gen in Galili gam teng ah apai kawikawi a, dawite a hawlkhia hi.

⁴⁰Phak mi khat a kiangah a hungpai a, amai a khupdin in; “Na ut leh nung siangthousak thei hi, chi`n ahung ngen ngutngut a.”

⁴¹Tuachi`n Jesu`n amah a lainat mahmah a, akhut ajan a, akhoih a, “Ka ut hi, na siangthouta in!” achi hi.

⁴²Hihthu agen khitkhit in, phak in amah a nusiapai a, ahung siangthouta hi.

⁴³Jesu`n khauhtak a khamna tawh amah a sawlkhiata hi.

⁴⁴“Kuamah kiang ah bangmah genlou dingin pilvang in. Hinanleh Siampu kiang ah vakilak inla, na kisiansuahna dingin Mosi-in sil a sehte lan in, a theihchet na ding un,” achi hi.

⁴⁵Hinanleh amah a paikhia a tua thu mipi lak ah a genjakta hi. Tuabang ahihman in Jesu a langtang in khuapi ah a lutthei takei a, gamdai kuamah omlouhna ah a omjawta hi. Hinapi`n munteng a pat in a kiangah mite a hungpaijel uhi.