Read Thangal Naga MARKA 10 Bible Online

MARKA 10 - Thangal Naga bible

MARKA 10

¹Tuachi`n hua a kipan ading a Judea gam ah Jordan gal lam ah apaita hi. Tualeh a kiangah mipite ahung kikhawm kik ua, tuachi`n a bawl ngaina mah bangin amauhte thu a hilhkikta hi.

²Pharisaite hungpai in a kiangah, amah ze-et nan, “Mi`n azi akhul asiang diam?” chi`n adong ua.

³Tuachi`n aman akiang uah, “Mosi in bangchi`n thu ahungpia a?” achi hi.

⁴Amau`n, “Mosi in kikhulna lai gelh a khul aphaljel hi,” achi ua.

⁵Jesu`n a kiang uah, “Na lungtang uh atakjiak aveleh hih thupiak noua ding a ahung gelhsak.

⁶Hinanleh sil kisiamchil a pan in, ‘Pasian in aman numei leh pasal in asiam hi.’

⁷‘Hih thu jiakin pasal in anu leh apa apaisan ding a, azi atu tinten ding,

⁸tualeh anih un taksa khat ahung hita ding uh.’ Tuachi`n nih ahi nawn takei ua, taksa khat ahung hijawta uhi.

⁹Tuajiakin Pasian in agawmsa mihing in khen kei hen,” chi`n a dawng hi.

¹⁰Innsung ah a nungjuite`n hih thu mah ana dongkik ua.

¹¹Tuachi`n aman akiang uah, “Kuapeuh azi khul a, midang neiin azi ang akawmsan ahi.

¹²Tualeh numei in zong a pasal khen a midang tawh a kiteng leh, angkawm ahi,” achi hi.

¹³Tuachi`n a tham dingin naupang neute a kiangah ahung zohpih ua, hinanleh nungjuite`n a hung paipihte ana tai ua.

¹⁴Hinanleh Jesu`n hua amuhtak in, alung nuammoh mahmah a akiang uah, “Naupang neute ka kiangah hung paisak unla, amauhte kham kei un, van gam pen hichibang mite a ahi.

¹⁵Adiktak in, kung hilh ahi, mi kuapeuh naupang neute bang a Pasian gam sanglou pen asung ah alut kei ding hi,” achi hi.

¹⁶Tuachi`n amauhte a ang ah atawi a, atung uah akhut nga in gual azawlta hi.

¹⁷Tualeh lampia pai ding a apawtkhiat laiin, mi khat a kiang ah hungtai in, a maiah khupdin in, akiang ah, “Siapa hoih aw, tangtawn hinna ka tantheihna ding in bang ahia ka bawl ding?” chi`n adong a.

¹⁸Tuachi`n Jesu`n akiang ah, “Bangding a hoih hungchi nahia? Mi khat guak loungal kuamah a hoih a omkei, hua pen Pasian ahi,” achi hi.

¹⁹Thupiakte nathei vele; angkawm ken, tualthat ken, gu ken, theihpihtu taklou in pangken, mi khemken, na nu leh na pa zahtak in, chihte achi hi.

²⁰Tuachi`n aman a kiangah, “Siapa aw, hihte tengteng ka naupan laia pan kajuih ahita,” achi hi.

²¹Tuachi`n Jesu`n amah a en a, a itta a, a kiangah, “sil khat na tasamlai hi, achi a; pai inla, naneih jousiah juak inla migentheite kiangah pia in, tuachi`n van ah gou nanei ding, tuakhit chiang in hungpai inla kross pua in hungjui in,” achi hi.

²²Hinanleh hih thute jiakin adah mahmah a, lungkham takin a paimangta siltampi nei ahihjiak in.

²³Tuachi`n Jesu`n a enkual a a nungjuite kiangah, “Mi hausate a dingin Pasian gam a lutding bangzahta a haksa a tazen a!” achi hi.

²⁴Tuachi`n nungjuite`n a thugen lamdang asa mahmah ua. Hinanleh Jesu`n adawng kik a akiang uah, “Tate aw, dangka muangte a dingin Pasian gam a lut bangzahta a haksa ahia!

²⁵Mihausa Pasian gam a lut sangin, sangawngsau phin bilvang a lutpaisuak abaihjaw” achi hi.

²⁶Tuachi`n amau`n a thugen lamdang asa mahmah ua, “A tuachihleh kua Hundam in a omjou dia?” chi`n akihou ua.

²⁷Hinanleh Jesu`n amauh a en a akiang uah, “Huapen mihing a dingin sil hitheilou ahi a, hinanleh Pasian a dingin ahi kei; Pasian a dingin sil jousiah ahithei hi,” achi hi.

²⁸Tuachi`n Peter in a kiangah, “En in, kou sil bangkim paisan in kungjui ua,” chi`n ahung gen pan a.

²⁹Tuachiah Jesu`n “a dawng a, adiktak in kung hilh ahi, kuapeuh keimah jiak leh tangthupha jiak a inn hiam, sanggampa hiam, Sanggamnu hiam, apa hiam, anu hiam, azi hiam, atate hiam, gamte hiam nusia tuh,

³⁰tu damsung mahmah in, Tu hun mahmah in innte, sanggampate sanggamnute, nute, tate, gamte, bawl gentheihnate tawh alehja a mukiklou ding a om kei, tualeh hun hungtung ding a tangtawn hinna tawh.

³¹Hinanleh mi tampi a masapente a nunungpen ahung hi ding ua, a nunungpente a masapen ding uh,” achi hi.

³²Jerusalem khua a hawhtou ding a, lampia apailai un, Jesu amai uah apai a; amau`n lamdang asa mahmah ua. Tualeh ajuih pum un alau uh a. Tuachi`n aman sawm lehnihte a tuam in apaipih kik a atung a sil hungtung dingte ahilh panta hi.

³³“Ngaiun, Jerusalem khua ah hawhtou ding ihi ua, mihing Tapa siampite leh laigelhmite kiang a matsak in aom ding. Tualeh amah siding in siamlouh atangsak ding ua, tuateh Jentelte kiangah apia ding uhi,

³⁴chiamnuih bawlnan ajang ding ua, ajep ding ua, chil asiatkhum ding ua tualeh athat ding uh; tuachi`n nithum nin a thoukik ding,” achi hi.

³⁵Tualeh Zebedi tapate Jakob leh Johan, a hungpai ua a kiangah, “Siapa aw, na kiang a kung nget taphot uh nung bawlsak ka deih uhi,” achi ua.

³⁶Tuachiah aman a kiang uah, “Nou a dingin bang hung bawlsak leng na ut ua?” achi a.

³⁷Amau`n a kiangah, “Na thupina ah na jiatlam ah khat na veilam ah khat hung tousak in,” achi ua.

³⁸Hinanleh Jesu`n akiang uah, “Na nget uh na theikei ua ahi. Ka nou dawn ding na dawnthei ding uai? Ka baptisma tan ding na tangthei ding uai?” achi a.

³⁹Amau`n a kiangah, “thei e,” achi ua. Tuachi`n Jesu`n akiang uah, “Ka nou dawn ding na dawnthei ngut ding uh, ka baptisma tan ding zong na tangthei ding uh.

⁴⁰Hinanleh ka jiatlam leh ka veilam a tou ding pen kei hungpiak ding ahikei a, Pasian in a bawlsakte uh a ding ahijaw ding hi,” achi hi.

⁴¹Tualeh sawmte`n hihthu ajaktak un Jakob leh Johan tung ah a lungkim takei ua.

⁴²Hinanleh Jesu`n amauhte a kiangah asam a akiang uah “Jentelte tung a vaihawm ding a aguatte uh atung uah a lal mahmah uh, tualeh a miliante un atung uah a thunei mahmah uh, chih nathei uhi.

⁴³Hinanleh nou lak ah jaw hichibang ahikei ding. Hinanleh kuapeuh nalak ua milian hih utte na sila un a pangjaw ding hi.

⁴⁴Tualeh kuapeuh nalak ua masapen hih ut tuh mi tengteng silain apang ding hi.

⁴⁵Mihing Tapa hial zong na sepsak a om dingin a hungpai kei a, hinanleh nna sem ding leh mi tampi tatna ding a ahinna pia ding in hungpai ahijaw hi,” achi hi.

⁴⁶Tualeh Jeriko khua a hungtung ua; Jesu Jeriko a kipan in a nungjuite leh mipi tampitak tawh apawt laiun, Timai tapa mittaw Bartimai khutdoh in lamgei ah atou a.

⁴⁷Tualeh aman Nazareth Jesu ahi chih ajaktak in, “Jesu! David Tapa! ka tungah zahngai in!” chi`n a kikou panta a.

⁴⁸Tuachi`n mi tampite`n dai ding in ataihilh ua. Hinanleh aman, “David Tapa, ka tungah zahngai in!” chi`n aki hahkou semsem a.

⁴⁹Tuachi`n Jesu adinkhawl a, “amah sam ding in thu apia a.” “Tuachi`n amau`n mittawpa asam ua, a kiangah, Thou in, aman a hungsam hi,” achi ua.

⁵⁰Aman zong apuan silhpaiin a dingkhia a, Jesu kiangah a hungpai hi.

⁵¹Tuachi`n Jesu`n amah ana houpih a, “Nang a ding in bang hung bawlsak leng na ut ei?” achi a. Mittawpa`n a kiangah, “Rabboni, muhtheih ka ut,” achi hi. [4]

⁵²Tuachi`n Jesu`n a kiang ah, “Paita in, na ginna dampih hiteh,” achi a. Tuachi`n a mutheipai a, lampi ah Jesu ajuita hi.