Read Thangal Naga MARKA 11 Bible Online

MARKA 11 - Thangal Naga bible

MARKA 11

¹Tualeh Jerusalem khua tung ding a akisak uh, Olive mual a Bethphage leh Bethani khuagei atun un, aman a nungjuite minih a masawl a.

²Akiang uah, “Na mai ua khua ah pai unla; khuasung na lutphet chiang un sabiltung nou khau a kikhih kuamah tuanngailouhna na muding uhi. Sut unla hungkai un.

³Tualeh kuapeuhin, bangding a hih nabawl? a chih uleh, Toupa`n a deih hi, hiah a hung koihkikpai na ding,” chi un, achi hi.

⁴Tuachi`n a paita ua, kongjing a kongkhak pualam ah sabiltung nou kikhih avamu ua, tuachi`n asut uhi.

⁵Hinanleh huasan a ding kuate hiam in, akiang uah, “Bangding a sabiltungnou sut nahi ua?” achi ua.

⁶Tuachi`n amau`n Jesu thupiak bangin a kiang uah agen ua. Tuachi`n a paisakta uhi.

⁷Tuachi`n sabiltungnou Jesu kiangah a hungkai ua, atung ah apuante uh aphah ua; amah atung ah a tuangta hi.

⁸Tualeh mi tampi in lampi ah apuante uh aphah ua, tualeh adangte`n gam a sawlpang sat in lampi ah aphah ua.

⁹Tuachi`n amai lam a paite leh anung lam a hung juite`n: “Hosanna! Toupa min a hungpai ahampha hi!

¹⁰Toupa min a hungtung ding Ipa David lalgam ahampha hi! Tungnung pen ah Hosanna!” achi ua.

¹¹Tualeh Jesu Jerusalem khua ah apai a, Tempul sung ah alut a. Tuachi`n siljousiah a et kawikawi khit in nitaklam a hunghita a, sawmlehnihte tawh Bethani khua ah a paita uhi.

¹²A jingni`n, Bethani khua pan a ahung pawt nung un, agil ahung kialta a.

¹³Theipi kung tehnei gamlapi ah amu a, banghiam agah ka muh khakleh chi`n avapai a. Avatun takin, atehguak chihlou bangmah avamuta kei a; theipi gah hun ahihlouh jiak in.

¹⁴Jesu`n ahoupih a sing kiangah, “Bangchiklai peuh in kuaman nang a kipat gah nenawn takei hen!” achi a. A nungjuite`n hih aja uhi.

¹⁵Tuachi`n Jerusalem khua atung ua; Jesu tempul sung ah avalut a, tempul sung a vanjuak leh leite a notkhia panta a, tualeh dangka khekte dohkan leh palva juakte tounate a khuhlek sak hi.

¹⁶Tualeh kuamah in tempul sung a van alut paisuakpih uh a phal kei hi.

¹⁷“Tuachi`n aman akiang uah, ‘Ka inn nam jousiah a ding in thumna inn achi ding uh chia kigelh hilou maw.’ Hinanleh nou gutate khukpi in nabawl uhi!” chi`n ahilh hi.

¹⁸Laigelhmite leh siampite`n hih ajaktak un amah a thahtheihna ding uh azongta ua; mipi teng in a thuhilh lamdang asak jiak un, amah a lauta uhi.

¹⁹Nitaklam ahunghih in, khuapi a pat a pawtkhiata hi.

²⁰Jingsang a apailai un theipi kung a tung a pat ajungtan a gaw amu ua.

²¹Tualeh Peter in, theikhia in a kiangah, “Rabbi, En in, theipi kung na samsiat pen avulta!” achi hi.

²²Tuachi`n Jesu`n a dawng a akiang ah, “Pasian gingta un.

²³Adiktak in na kiang uah kung hilh ahi, Kuapeuhin hih mual kiangah, na kisuan inla tuipi ah na kipai in, chia a lungtang a ginlahna neilou a, tualeh agen bang in ahung tangtung ngeingei ding hi chih gingta jousiahin, agen bangbang in amu ding uhi.

²⁴Tuajiakin kung hilh ahi: Sil bangkim nathum ua na nget chiang un, amusa in kingai un, tuachi`n namu ding uhi, achi hi.

²⁵Tualeh thum a na din chiang un, kua tung hiam a thubuai banghiam naneih uleh, amah ngaidam un, na Pa uh van a om in nou tatkhialhnate zong ahung ngaihdam theihna ding in.”

²⁶Hinanleh na ngaihdam kei uleh, na Pa uh van a om in zong nou tatkhialhnate ahung ngaidam kei ding hi.

²⁷Tuachi`n amauhte Jerusalem khua ah atungkik uhi. Tempul sung a avak kawikawi laiin, siampite, laigelhmite leh vantang upate akiang ah a hungpai ua

²⁸amau`n akiang ah, “Bang thuneihna in ahia hih sillamdangte nabawl? Na kiangah hihbang sillamdang bawltheihna thuneihna kua`n hungpia ahia?” chi`n adong uhi.

²⁹Hinanleh Jesu`n adawng a akiang uah, “Ken zong noute thu khat kung dong ding, hung dawng un, tuachiah ken zong bang thuneihna tawh hih silte bawl ka hia chih noute kung hilh ding.

³⁰Johan baptisma, van a hung kipan maw: ahihkeh mihing a hung kipan? Hung dawng un?” achi a.

³¹“Tualeh amauh leh amauh a kingaihtuah ua, ‘van a kipan,’ chilei la, ‘Bangding a athu gingtalou nahi ua?’ hung chi ding a.

³²‘Mihing a pat chileila, mipite a laujel ua,’ ” (Mi zousiah in Johan Jawlnei taktak in asim ua.)

³³Tuachi`n amauhte`n adawng ua Jesu kiangah, “Ka theikei uh,” achi ua. Tualeh Jesu`n a dawng a akiang uah, “Ken zong kua thuneihna tawh ahia hih silte ka bawl chih kung hilh kei ding,” achi hi.