Read Thangal Naga MARKA 12 Bible Online

MARKA 12 - Thangal Naga bible

MARKA 12

¹Tuachi`n aman gentehna in akiang uah thu agen panta a, “Mi khat in grep huan abawl a, daiin a umkual a, grep suknang khuk atou a, innsang alam hi. Tualeh grephuan bawlmite kiangah asan in apia a, gam dang ah khual azinta hi.

²Huan a agah atanding grep huanbawlmite kiangpan a vala ding in grep huanbawlmite kiangah a silate khat asawl hi.

³Tualeh amauhte`n ana man ua, avua ua, tuachi`n khut guak in asawl mangta uhi.

⁴A sila dang khat akiang uah a sawlkik a amauhte`n suang in ana deng ua, alutang aliam sak ua, zahlaktak in anabawl ua a sawlmangta uhi.

⁵Tuachi`n aman adang khat a sawlkik a, amah anathat ua; adang tampi zong, khenkhat avua ua, khenkhat athat uhi.

⁶Tuajiakin Tapa khat aneilai a, a it mahmah, ‘Ka Tapa ana zahtak ding uh chi`n atawp in a Tapa akiang uah a sawlta hi.’

⁷Hinanleh grep huanbawlmite`n, ‘Hihpa a gouluah dingpa ahi, hungpai un, amah ithat ding uh, tuachi`n a gouteng ei a ahimai ding!’ a kichi ua.

⁸Tuachi`n aman ua, amah athat ua, grep huan pualam ah apaikhia uhi.”

⁹“Tuajiakin grep huan neipa`n bang abawl tadia le?” chi`n adong a, “Amah hungpai in ahih mangthang ding a, grep huan midangte kiangah apia ding hi.

¹⁰Hih Laisiangthou simkha ngailou nahi uh maw? ‘Inn lam mite suang deihlouh huam ah aning a suang poimoh pen ahung suak hi.

¹¹Hihpen Toupa bawl ahi; Tualeh hihpen imit muh in a lamdang hi!’ ” chih, achi hi.

¹²Tualeh hih gentehna thu amauh demna a agen ahi chih atheih jiak un atung ah khut akhak sawm ua, hinanleh mipite alau uhi; tuachi`n amah anusia ua, a paisanta uhi

¹³Tuachi`n amau`n a kam a thute a amah amattheih nang un, Pharisaite leh Herod pawl a mi khenkhat a kiangah a hungsawl ua.

¹⁴Akiang a hungtun un amau`n a kiangah, “Siapa, midik na hi a, mi kuamah na laukei hi. Ajiak mi maizah tuam na neikei a, diktakin Pasian lampi thute na hilhjel chih ka thei uhi. Kaisar kiang a siah piak asiang hiam? siang lou? Ka pia ding uam, ka piakdah ding uam?” achi ua.

¹⁵Hinanleh aman a lepchiah dan uh athei a, akiang uah, “Bangding a hung ze-et nahi ua? Makhai khat hungtawi un ka en ding,” achi a.

¹⁶Tuachi`n amau`n ahung tawi ua, tuachi`n aman akiang uah, “Hih kua lim leh kua laigelh ahia?” achi a, Amau`n akiang ah, “Kaisar a,” achi ua.

¹⁷Tuachi`n aman adawng a akiang uah, “Kaisar silte Kaisar kiangah pia unla, Pasian silte Pasian kiangah pia un,” achi hi. Tuatakin amau`n lamdang asa mahmah uhi.

¹⁸Tuachi`n Sadukaite misi thohkikna aom kei chite akiang ah a hungpai ua,

¹⁹“Siapa, Mosi in, ‘Mi khat a sanggampa sita henla, azi taneilou in nusia taleh azi aluah ding a a sanggampa dingin chi akhahsak ding chi`n ahung gelhsak hi.’

²⁰Tuin sanggam pasal sagih a om ua, a masapa in zi anei a, asi a, chikhah beiin a nusiata hi.

²¹Tualeh anihna in amahnu ala a, chikhak neilou in asi a, tualeh athumna zong hua chimah bang in a om a,

²²tuachi`n a sagihna pa`n aluah a, asi a, chikhak neilou in a nusia hi. A tawp khakna in numeinu zong asita hi.

²³Tuajiakin, thohkikni chiangin, amauh a thohkik chiang un, numeinu kuapen zi ata diai le? Asagih un zi in aneichiat ua” chi`n adong ua.

²⁴Jesu`n amauh adawng a akiang uah; “Laisiangthou leh Pasian silbawltheihna natheih jawsam uh a omlouh jiak tak a bawlkhial hilou nahi umaw?

²⁵Misi lak a kipan a thohkikni chiang un zi leh pasal a kitengkik ding a hinawn kei ua, van a vanmite bang ahijawta ding uhi.

²⁶Hinanleh misite kaihthoh a aom ding uh thu tawh kisai Mosi laibu ah, loubawk kuang a pan Pasian in, ‘Kei Abraham Pasian, Isak Pasian leh Jakob Pasian ka hi chia a houpih dan simkhalou nahi uh maw?’

²⁷Amah asite Pasian a hikei a, ahingte Pasian ahijaw hi. Tuajiakin nou na theikhial mah mah uhi!”

²⁸Tuachi`n laigelhmite lak a khat a hungpai a, akisellai uh aja a, Jesu`n amauh hoihtak in adawng chih athei a, akiang ah, “Thupiak jousiah lak ah thupiak masapen bang ahi diai?” chi`n adong a.

²⁹Jesu`n adawng a, “Thupiak jousiah lak a masa ahihleh: ‘Ngai un, aw Israel! Toupa I Pasian, Toupa khat ahi a.

³⁰Tuajiakin Toupa na Pasian uh na lungtang tengteng in, na kha tengteng in, na lungsim tengteng in, tualeh na hatna tengteng in na it ding ahi.’ Hih thupiak masapen ahi.

³¹Tualeh anihna ahihleh, hihbang ahi: ‘Nangmah na ki it bang in na innvengte na it ding ahi.’ Hihte sang a thupiak lianjaw dang a omkei, achi hi.”

³²Tuachi`n laigelhmipa`n a kiangah, “Na gendik, Siapa! Thudik nagen ngut Pasian khat guak a om, amah chihlouh Pasian dang a om kei.

³³Tualeh amah lungtang tengteng, theihna tengteng, kha tengteng tualeh hatna tengteng a it a, tualeh eimah i ki it bang a ivengte it sillat leh kithoihna jousiah sang in thupijaw a ahoihjaw hi,” achi hi. Hua nungsang kuaman thu mawng mawng a dongngam nawn kei uhi.

³⁴Tualeh aman piltak a adawn Jesu`n a muh takin, a kiangah, “Pasian gam a pan na gamla kei hi,” achi hi.

³⁵Tuachi`n Jesu`n tempul a thu ahilhlai in, amauhte a houpih a, “Bang chidan a laigelhmite`n Jesu David Tapa ahi, chi uh ahia?

³⁶David amah mah-in khasiangthou in: ‘Toupa`n ka Toupa kiang ah: Na galte uh nakeng totphah a kabawl masiah, ka jiat lam ah touin,’ achi, chih ahi ngal a.

³⁷Tuajiakin David amah mah in zong ‘Toupa’; a chih leh; bangchi`n amah a Tapa ahithei dia?” Tualeh mipi vantang in kipaktak in athu a ngaikhia uhi.

³⁸Tuachi`n aman akiang ua a thuhilhna ah, “Laigelhmite lak ah pilvang un, amauh puantual silh a vak a ut ua, van juakna mun lak a chibaibuk a ut uhi,

³⁹kikhopna inn sung ah touna hoih adeih ua, tualeh nekkhawm nate ah munhoih adeih uhi.

⁴⁰Meithaite innsung a negam ua, mi khemna ding in sawtpipi thumna anei uhi. Hihte`n siamlouh tansakna thupitak amu ding uhi!” achi hi.

⁴¹Tuachi`n Jesu dangka kholna bawm maiah atou a, tualeh mipite`n dangka khawlna ah dangka a khiat uh amu a. Tuachi`n mi hausa tampite`n tampi pi-in a khia ua;

⁴²tuachi`n mijawng meithai khat hungpai in daan dangka makhai nih a hungkhia a, guadran khat tawh kikim ahi. [5]

⁴³Tuachi`n aman a nungjuite asam a akiang uah, “Adiktak in na kiang uah kung hilh ahi, mijawng meithainu`n midang tengteng sang in akhia tampen hi.

⁴⁴Amau`n aneihsa val uh akhia ua, hinanleh amahnu`n aneih jousiah a hinna ding teng akhia hi,” achi hi.