Read Thangal Naga MARKA 13 Bible Online

MARKA 13 - Thangal Naga bible

MARKA 13

¹Tualeh Tempul a pat a pawtkhiat khit takin, a nungjuite khat in a kiangah, “Siapa, en-in! Hih a suangte omdan leh a innte omdan bang chibang ahia!” achi hi.

²Tualeh Jesu`n adawng a akiang ah, “Hih inn thupitakte na mu maw? Sukchip louh a suang khat tung a khat kichiang mawng mawng hihsan ah namu kei ding hi,” achi hi.

³Olive mualtung a tempul tawh ki galsaina mun a atoulai in, Peter, Jakob, Johan leh Andrute`n atuam in ahoupih ua, hihte bang hunchiang a hung hi ding ahiam?

⁴“Tualeh hihte hung tangtunna ding chiamtehna bang ahi ding a, koute hunghilh in,” achi uhi.

⁵Tuachiah Jesu`n, a dawng a akiang uah, “Kuaman ahung khemlouhna dingin pilvang un.

⁶Mi tampi, ‘Keimah Jesu ka hi!’ chi`n ka min in a hungpai ding ua, mi tampi a khemjou ding uhi.

⁷Hinanleh kidou leh kidou thuthang na jakchiang un, lungbuai kei un; hihbang silte ahung om ding mawng ahi, hinanleh atawpna ahinai kei ding.

⁸Namtuam leh Namtuam ahung kidou ding ua, tualeh gam tuam leh gam tuam a kidou ding uhi. Tualeh mun tuamtuam ah zin aling ding a, kial leh buaina hung om inchin. Hihte nauvei kipatna ahi uhi.

⁹“Hinanleh noumah kipilvang un, vaihawmmite kiang ah ahung piakhia ding ua, kikhopna insung bang ah ahung jep ding ua, keimah jiakin gam ukte leh kumpipate maiah amauh theihpihtu ding in hung paipih ding uhi.

¹⁰Tangthupha nam zousiah kiangah gen masak ahi ding hi.

¹¹Hinanleh ahung mat ua ahung piakdok hun chiang un lungkham masa kei unla, bang ka gen tadia chi`n ngaihtuah masa kei un. Hinanleh huahun a nang hung kipia thute bek gen in; ajiak agentu nang na hikei a, Khasiangthou in agenjaw ding hi.

¹²A sanggampa`n a sanggampa thah ding in a mansak ding a, Pa in a tate a mansak ding a; tualeh tate`n nu leh pate adou ding ua a thatsak ding uhi.

¹³Ka min jiakin mi jousiah huat na hung hi ding ua. Hinanleh kuapeuh atawptan a thuakjoute hundam in aom ding uhi.”

¹⁴Jawlnei Daniel in anagen, “Hihmangtu kihdak om a dinlouhna ding a ding namuh chiang un” (asim jousiahin a omjia thei heh!) “Huahun chiangin Judea gam a omte mualte ah tai uhen.

¹⁵Inntung a omte innsung a van omte lading in lutdah hen.

¹⁶Tualeh lou a omte apuante lading in kikdah hen.

¹⁷Hinanleh hihni chiangin agaite leh naungek neite tung agik hi!

¹⁸Tuajiakin hih hunte phalbilai ahihlouhna dingin thum un!

¹⁹Ajiak hih nite chiangin gimthuakna thupitak ahung om ding a, hihbang Pasian in sil asiam tung a pat tunitan in ana omngai naikei a; tunung chiangin zong a omngai nawn kei ding hi.

²⁰Tualeh Pasian in hihnite tomsak kei henla hileh, mihing kuamah mawng mawng a suakta aom kei ding a; hinanleh a mitelte jiakin hihnite a tomsakta hi.

²¹“Tuachi`n mi kuahiam in na kiang a, ‘En in, Krist hiah a om!’ ahihkeh, ‘En in, amah huah a om!’ achihleh taksan kei in.

²²Ajiak Krist taklou leh jawlnei taklou ahung pawt ding a, tualeh ahung khemna dingin chiamtehna lamdang taktakte ahung ensakding a, hitheileh houh atelte na-ngawn a khemkhia ding hi.

²³Hinanleh, ki pilvang un! En un, siljousiah kung hilhkhinta hi.

²⁴“Hinanleh hua nite tua gimthuakna tunzoh chiangin, ni amialta ding a, tualeh kha zong avak nawn kei ding,

²⁵van a aksite ahung kia ding a, van a aom van sil bawltheihnate akiling ding hi.

²⁶Tuatak chiangin Mihing Tapa sil bawltheihna leh thupina lianpi tawh meipi lak a hungpai amu ding uhi.

²⁷Tuachi`n aman vantungmite asawlkhia ding a, atelte lei ningli a kipan, leitawp a kipan in vantawp dong in a khawmkhawm ding uhi.

²⁸“Tualeh theipi kung a pat gentehna zil un. Aba ahung meng a atehte ahung sel chiangin doupi anaita chih nathei uhi.

²⁹Huachimah bang in hih silte ahungtun namuh chiang un, amah ahung naita kongkhak bul ahung geita, chih thei un.

³⁰Adiktak in kung hilh ahi, hih sil jousiah a tunkim masiah tulai khangthakte amang kei ding uhi.

³¹Van leh lei a mang ding a, hinanleh ka thu amang kei ding hi.

³²“Hinanleh huani leh hun Pa loungal, kuamah in, van a om vantungmite`n zong Tapa in zong, athei kei hi.

³³Ahun ding na theihlouh jiak un pilvang unla, kiging zing a om in thum un.

³⁴Ajiak pen mihing Tapa ahihleh mi khat a inn nusia a, asila kiang a thuneihna pia a, tualeh a nasep ding uh piachiat a, khual gamlapi a vazin tawh kibang ahi.

³⁵Tuajiakin kigingjing un; inn neipa hungpai ding hun nitak lam hiam, jankimlai hiam, akkhuan in hiam, ahihkeileh jingsang in hiam chih nathei kei uhi.

³⁶A tuachih keileh thakhat a hungpai in, ihmu in ahung mukha ding hi.

³⁷Tualeh na kiang ua ka gen mijousiah kiang a ka gen ahi!”