Read Thangal Naga MARKA 14 Bible Online

MARKA 14 - Thangal Naga bible

MARKA 14

¹Tuachi`n ninih nung in paikan kut leh Tanghou tol sohlouh kut aom a; tualeh siampite leh laigelhmite`n amah khembawl a, mat a, thahtheihna ding dan a zongzong uhi.

²“Hinanleh kut ni in hihdah hen, atuachih keileh mipi lak ah buaina aom kha ding,” achi uhi.

³Tualeh Bethani khua a phak Simon inn a aomlai a, ankuang im a atoulai in, numei khat alabaster bawm a spaiknard thau namtui mantamtak tawiin a hungpai a; tuachi`n amahnu in abawm atatkek a, alutung ah asungta hi.

⁴Hinanleh alak uah lungkim lou khenkhat aom ua, “Bangding a hih thau namtui amawk a hihbei ahia?

⁵Hih makhai zathum sang a tamjaw a zuak a mijawngte kiang a piaktheih ding hi a!” achi ua; tuachi`n amahnu tung ah aphunta uhi.

⁶Tuachi`n Jesu`n, “Amahnu aom om in omsak un! Bangding a vahihbuai nahi ua? Aman keia dingin silhoih asem hi.

⁷Ajiak pen mijawngte na kiang uah a omjing ua, na ut hun teng un na panpihthei uh, hinanleh keipen na kiang uah ka omjing kei hi.

⁸Amahnu`n a bawltheih tawp a bawlta ahi, ka sapum vuiding a thau hung nuhkhawlh ahi.

⁹Adiktak in kung hilh ahi, Leitung pumpi a hih tangthupha akigenna phot ah hihnu silbawl zong amahnu theihzingna dingin akigen ding hi,” achi hi.

¹⁰Tuachi`n sawmlehnihte lak a khat, Juda Iskariot pen amah mansak dingin siampite kiangah avapai a.

¹¹Hihthu azak tak un amauh a kipak mahmah ua, tuachi`n amah dangka piak ding a chiamta uhi. Tuachi`n aman amatsakna ding lemtang a zongta hi.

¹²Tualeh Tanghou tol sohlouh kut ni masapen, paikan kut Belamnou agoh ni un, a nungjuite`n a kiangah, “Paikan kut ankuang na nektheih na dingin khoiah vabawl le ung na ut a?” achi ua.

¹³Tuachi`n aman a nungjuite nih asawlkhia a, akiang uah, “Khuapi sung ah valut unla, tuachi`n pasal tuibel pua khat tawh na kituak ding ua, amah jui un.

¹⁴A lutna penpen, hua inn neipa kiangah, ‘Siapa`n ka nungjuite tawh paikan ankuang ka nekna ding uh mikhual inndan khoitak ahia?’ achi, chi un.

¹⁵Tuachi`n aman inndan tungnung liantak, van omsa leh guatsa diam ahung ensak ding; huamun ah ei a ding bawl un,” achi hi.

¹⁶Tuachi`n a nungjuite apai ua, khuapi sung ah alut ua, tualeh akiang ua agen bangbang in amuta ua, tuachi`n paikan ankuang abawlta uhi.

¹⁷Nitak lam ahunghih takin amah sawmlehnihte tawh a hungpai ua.

¹⁸Tualeh toua anek laiun Jesu`n, “Adiktak in kung hilh ahi, an ka nekkhawmpih nalak ua mikhat in ahung mansak ding hi,” achi hi.

¹⁹Tuachi`n a lungkham panta ua, a kiangah, khat khat in, “Kei kahi maw?” achi ua, abanban in adongta uhi.

²⁰Tuachi`n aman adawng a, a kiang uah, “sawmlehnihte lak a khat, kuang a ka an sawkkhawmpih ahi.

²¹Mihing Tapa ahihleh a tanchin kigelh bangbang a pai ding ahi a; hinanleh mihing Tapa mansak dingpa tung agik hi! Huapa pianglou hivetleh amah a dingin ahoihjaw ding hi!” achi hi.

²²Tuachi`n anek laiun Jesu`n tanghou ala a, a gualjawl a, tuachi`n a balkek a, akiang uah apia a, “la unla ne un,” “Hih ka taksa ahi,” achi a.

²³Tuachi`n nou ala a, kipahthu agenzoh in, a kiang uah apia a; aun un adawn chiat uhi.

²⁴Tuachi`n aman akiang uah, “Hih ka sisan a thukhunthak mi tampi a ding a luang pen ahi.

²⁵Adiktak in kung hilh ahi, Pasian gam a athak ka dawnni atun masiah greptui ka dawnnawn kei ding,” achi hi.

²⁶Tuachi`n amau`n la-khat asakzoh un, apawt khia ua, Olive mual ah apaita uhi.

²⁷Tuachi`n Jesu`n akiang uah, “Tuja`n chiangin na un un lungkia in nung taisansiang ding uhi, ajiak, ‘Belampu ka jep ding a, Belam honteng aki thehjak ding uh,’ chih gelh ahi.

²⁸Hinanleh ka thohkik nung chiangin Galili ah namai uah ka pai ding,” achi hi.

²⁹Peter in akiang ah, “A un un Lungkia in hung taisan nanle uh, ken kung taisanngai kei ding!” achi hi.

³⁰Jesu`n akiang ah, “Adiktak in kung hilh ahi, tuni`n, tujan chiangin ak nihvei akhuan ma-in thumvei nung kitheihmoh bawl ding,” achi hi.

³¹Hinanleh aman khauhtakin, “Nang tawh sikhawm ding hinanleh zong, kung kitheihmoh bawl kei ding!” achi hi. Tuachimah bang in aun un achi chiat uhi.

³²Tuachi`n amau Gethsemani kichi mun khat a hungtungta ua; tualeh aman a nungjuite kiangah, “Ka thum sungteng hihsan ah anatou un,” achi a.

³³Tualeh Peter, Jakob leh Johan apui a, lung kham sengseng in ahung mangbangta a.

³⁴Tuachi`n akiang uah, “Ka kha sihna khop hial in a lungkham hi; hihsan ah ana om unla, kiging gige un,” achi hi.

³⁵Amah themkhat avapai gamla deuh a, tual ah apuksuk a, ahihtheihleh hua hun in amah apelhtheihna dingin athum hi.

³⁶Tualeh aman, “Abba-Pa,” sil zousiah Nang a dingin ahithei hi; hih nou kei a pat in lamang in; hinanleh, kei thu hilouin, Nang thu hijaw hen, achi hi. [6]

³⁷Tuachi`n a hungpai a, amauh ihmusa in amu a, tuatakin Peter kiangah, “Simon, ihmu nahi uh maw? Dakkal khat zong kiging a omzoulou nahi uh maw?”

³⁸“Khem a na omlouhna ding un kiging jing unla thum un. Kha injaw angap a, hinanleh taksa in azoukei,” achi hi.

³⁹Tuazoh in paikhia in ava thumkik a, agenngai mah ava genkik a.

⁴⁰Tuachi`n ahung paikik a, amauh ihmu in ahung mu jel a, a ihmut uh asuak mahmah jiakin; amau`n adawn dingdan uh athei kei uhi.

⁴¹Tuachi`n a thumveina in ahung pai a, akiang uah, “Ihmu leh tawldam a om lailai nahi uh maw? Ahunta hi! Ahun zong a tungta! Ngaiun, mihing Tapa mikhialte khut a piakkhiat ahita.

⁴²Thou un, ipai ding uh. En un, kei hung mansak dingpa anaita hi!” achi hi.

⁴³Tuachia thu agen laiin, sawmlehnihte lak a khat, Juda pen siampite leh laigelhmite leh upate a kipan in namsau leh khetbuk tawiin mipi tampitak tawh a hungtung pai a.

⁴⁴Tualeh amah mansakpa in: “Ka tawp penpen, amah ahi, man unla, hoihtakin paimangpih un,” chi`n chiamtehna ape masa khinta hi.

⁴⁵Tualeh a hungtun takin avanaihpai a, “ Rabbi Rabbi!” chi`n avatawpta a.

⁴⁶Tuachi`n amau`n atung ah khut akha ua, amanta uhi.

⁴⁷Tuachiah akiang ua dingte lak a khat in namsau adok a, siampi suakpa asat a, abil a satkhia hi.

⁴⁸Tuachi`n Jesu`n amauh adawng a akiang uah, “Guta manding bang hial in namsaute leh khetbukte keng in kei man dingin nung kuan uh maw?

⁴⁹Niteng in noute tawh tempul ah thuhilh in ka om jing a, nungman kei ua, hinanleh Pasian Laisiangthou thu a tangtun ngei ding ahi,” achi hi.

⁵⁰Tuachi`n aun un anusia ua, ataita uhi.

⁵¹Tualeh tangval kuahiam khat in puannem khat silh in amah a jui a, tuachi`n tangvalte`n ana man ua;

⁵²tuateh a puannem nusia in a saguak in ataita hi.

⁵³Tuachi`n Jesu siampi mai ah apaipih ua; tuachi`n amah tawh siampite, upate leh Laigelhmite jousiah ahung kikhawm ua.

⁵⁴Tualeh Peter in gamlapi ah, siampi innsung tan dongin ajui a; tuachi`n silate tawh a toukhawm a, mei a awi hi.

⁵⁵Tuachi`n siampite leh vaihawmna inn a om jousiahin Jesu a thahtheihna ding un ahekna ding ajong ua; hinanleh amukei uhi.

⁵⁶Mi tamtak in juau thuin ahek ua, hinanleh ahekna te uh a kituak kei hi.

⁵⁷Tuachi`n mi kuate hiam a dingkhia ua juauthu in ahek ua:

⁵⁸“Hih khut a bawl tempul ‘Ka hihsia ding a, nithum sung in khut a bawllouh adang khat ka lam ding, aman achih kaja uh, achi ua.’”

⁵⁹Hinanleh huachi`n zong a kituakthei tuan kei uhi.

⁶⁰Tuachi`n siampi alaiah ading dok a, Jesu kiangah, “Bangmah a dawnglou maw? Hihte hung hekna bang chidan ahia?” chi`n adong hi.

⁶¹Hinanleh amah a daidide a, bangmah in a dawng kei hi. Tuachiah siampi in a kiangah, “Nang Hampha Tapa Krist na hi hiam?” chi`n a dong kik a.

⁶²Tuachi`n aman, “Ka hi,” tualeh “mihing Tapa sil bawltheihna jiatlam a tou a, van meipi lak a hungpai na mu ding uhi!” achi hi.

⁶³Tuatakin siampi-in a puante a bawtkek a, “Theihpihtu dang bang ding i chilai dia!

⁶⁴Pasian a gensiat na jata uh, bangchi nasa ua?” achi a. Tuatakin aun un amah siatak in siamlouh atanta uhi.

⁶⁵Tuachi`n khenkhat in achil asiat panta ua, amai atuamsak ua, khut in atum ua, tuachi`n a kiangah “Gen in achi ua!” Tualeh silate`n zong a khutpek un abeng uhi.

⁶⁶Tualeh Peter nuailam a innpi huang sung a aom laiin, siampi sila nungakte lak a khat a hungpai a.

⁶⁷Tuachi`n amahnu`n Peter mei awi a om amuh in, a en a, “Nang zong Nazareth Jesu tawh kilawi nahi,” achi hi.

⁶⁸Hinanleh aman kitheihmoh bawl in, “Ka theikha kei,” achi a. Tuachi`n innlim ah ava pawtkhia a, tuachi`n ak a khuangta hi.

⁶⁹Tualeh nungak khat in amah a mukik a, a kiang a dingte kiangah, “Hihpa alak ua khat ahi,” a chijel a.

⁷⁰Hinanleh aman a kitheihmohbawl kik a, tomkhat zoh in a kiang a dingten Peter kiangah, “Alak ua khat hijenteh: ajiak Galili mi nahi a, naham in zong a kithei hi,” achi ua.

⁷¹Hinanleh aman, “Tua na migenpa uh ka theikha kei! chi`n hamsia lawh in a kichiamta hi!”

⁷²Tuachi`n a nihveina in ak ahung khuangta a, tuatak in Peter in Jesu`n a kiang a, “Ak nihvei khuan ma-in thumvei nung kitheih mawh bawl ding hi,” achih thu a theikhia thak a, tuachi`n huathu a ngaihtuah a akapta hi.