Read Thangal Naga MARKA 15 Bible Online

MARKA 15 - Thangal Naga bible

MARKA 15

¹Jingsang ahung hih takin siampite`n upate, laigelhmite leh vaihawm pawlte jousiah tawh kihoukhawm na anei ua, tualeh Jesu ahen ua, apaipih ua, Pilat kiangah apiata uhi.

²Tuachi`n Pilat in akiang ah, “Nang Judate kumpipa nahi hiam?” chi`n adong a. Tua khit in aman a kiangah, “Ahi nachih bang in” chi`n adawng hi.

³Tuachi`n siampite`n sil tampi in a ngawh ua, hinanleh aman bangmah in adawng kei hi.

⁴Tuachi`n Pilat in a dong kik a akiang ah, “Bangmah a dawnglou maw? En-in, ahung hekna tengpi uh!”

⁵Hinanleh Jesu`n bangmah in a dawng tuan kei lai hi, tuatak in Pilat in lamdang asa mahmah hi.

⁶Tualeh Pilat in kut ankuang luini chiangin thongkia khat anget penpen uh a pawtsakjel hi.

⁷Tualeh amin Barabba kichi, a gitlouhna lam a tualthat agitlouh pihte tawh thong tangkhawm khat aom a.

⁸Tuachi`n mipite`n, ngaihtak a kikou in, nidang a amau ding a a bawlsak ngaina bang a bawl dingin a ngen panta ua.

⁹Hinanleh Pilat in akiang uah, “Judate kumpipa na kiang ua kung khah na ut uh hiam?” achi a.

¹⁰Siampite`n engsiatna tawh Jesu amah kianga a piak uh ahi chih atheihjiak in.

¹¹Hinanleh siampite`n aman Barabba akiang ua a khahtheih nangin mipite atokthou ua.

¹²Pilat in adawng a akiang uah, “Achihleh Judate kumpipa nachihpa uh bang lawh leng na ut ua?” a chikik a.

¹³Tuachiang in amauhte`n “Kross ah kilhden in!” chi`n ahung kikou kik ua.

¹⁴Tuachi`n Pilat in akiang uah, “Bangjiak in, aman bang khialhna nei ahia?” achi a. Hinanleh amauhte`n, “Kilhden in!” chi`n ngaih sem in akikou uhi.

¹⁵Tuakhit in Pilat in, mipite lungdam sak a ut man in, Barabba a pawtsak a; tualeh Jesu ajep zoh in kross a kilhden dingin apiata hi.

¹⁶Tuachi`n galkapte`n amah kikhopna innsung Praitoriam achih uah apaipih ua, tualeh galkap jousiah a samkhawm ua.

¹⁷Tuachi`n amah puan sandup asilhsak ua, linglukhu aphan ua, a lutung ah akhusak ua,

¹⁸“Chibai Judate kumpipa!” chi`n zahna apia uhi.

¹⁹Tuachi`n alu pumpeng in asat ua; chil asiat khum ua, tualeh khupdin in abia uhi.

²⁰Chiamnuih bawlna a azakzoh un, puan sandup amah a pat a lakhia ua, ama puanmah asilhsak ua, Kross a kilden dingin apaipihta uhi.

²¹Tuachi`n amau`n mikhat, Kurini gam a mi, Aleksander leh Rafa pa, gam lam a kipan a hungpai, kross pua ding in a pummat ua.

²²Tuachi`n amau`n Golgotha mun ah amah ahung paipih ua, “Hih pen Luguh mun chihna ahi.”

²³Tuakhit in murah tawh kihel uain adawn dingin apia ua, hinanleh aman asang nuam kei hi.

²⁴Tualeh kross a amah a kilhden zoh un, atan ding chiat uh theihna dingin ai asan ua, a puansilhte a kihawmta uhi.

²⁵Tualeh amah a kilhden hun uh ahihleh dak thumna tuamlak ahi a.

²⁶Tualeh a ngawhna uh atung ah, “JUDATE KUMPIPA,” chi`n laimal in akigelh hi.

²⁷Amah tawh guta suamhat nih akilhkhawm ua; khat ajiat lam ah, adang khat aveilam ah.

²⁸Tuachi`n Laisiangthou in, “Amah mikhialte tawh simkhawm ahita hi,” chih a tangtungta hi.

²⁹Tualeh ageia mi sukvak touvakte`n alu uh lohkhum in, “Ehe! Nang tempul hihsia a nithum ni a lamkik ding pa!

³⁰Nang leh Nang kihunkhia inla kross a pan hung kumsuk tanla,” achi ua.

³¹Tuachimah bangin siampite`n zong, laigelhmite tawh a enghou ua, “Aman midangte a hundam a, amahleh amah aki hundamthei kei a.

³²Israelte kumpipa Krist tuin kross a pan hung kumsukleh atave, imuh a igintat theihna ding un!” achi ua. Kross a akilhden khawmpihte`n zong amah ahousia uhi.

³³Tuachi`n dakguk a hunghih in gam pumpi ah dak kuana dongin khimpi ajing hi.

³⁴Dak kuana a hunghih in Jesu ngaihtak in ahung kikoukhia a, “ELOI ELOI LAMA SABAK THANI?” chi in, tuapen, “Ka Pasian, ka Pasian, bangding a hung taisan na hiam?” chihna ahi.

³⁵A kiang a ding mi khenkhatte`n azaktak un, “En un, aman Elijah asam!” achi ua.

³⁶Tuachi`n kuahiam khat vatai in sponzi uain thuk in adiah dim a, pumpeng dawn ah akoih a, adawn dingin apia a, “Amah guak in omsak un! Amah lakhia dingin Elijah a hungpai ei i en ding uh!” achi ua.

³⁷Tuachi`n Jesu aw ngaihtak in a kikoukhia a, a kha akhahta hi.

³⁸Tuachi`n tempul puanjak atunglam a pat atawtan phelnih kisuahin ahung keksuk a.

³⁹Tualeh amailam a ding galkap zalamkai pa in, hihbang a akikou leh akha akhahte amuhtak in, “Hihpa Pasian Tapa taktak ahi!” achi hi.

⁴⁰Gamlapi a pan agal et numei khenkhat zong aom ua, tuate lak ah Mari Magdalini, Jakob naupangjaw leh Jos nu Mari tualeh Salomi ajau uhi.

⁴¹Amauhte Galili gam a aom laia anungjuia a nna sepsakte ahi ua, tualeh numei dang tampi Jerusalem a amah tawh kitontoute zong aom uhi.

⁴²Tualeh nitak lam ahung hih in, kisakkholhni ahihjiak in, huapen khawlni ma-a ni ahi a.

⁴³Joseph Arimathai khua mi, vaihawmtu zah omtak, Pasian gam ngak jing a om, a hungpai a, hangsan takin Pilat kiangah alut a, Jesu luang ava ngenta a.

⁴⁴Tualeh Pilat in asihpai lamdang asa mahmah a, tuachi`n galkap zalamkai asam a, akiang ah, asihna asawtta hiam, chi`n adong a.

⁴⁵Tualeh galkap jalamkaipa a pat atheihchian takin Pilat in aluang Joseph apiata hi.

⁴⁶Tuachi`n aman puannem alei a, amah a lakhia a, puannem in atuam hi. Tualeh suang khuakkuaksa han khat ah asialta a, tuachi`n suang khat hankot ah a likkhumta hi.

⁴⁷Tualeh Mari Magdalini leh Jos nu Mari-in asialna a en uh hi.