Read Thangal Naga MARKA 3 Bible Online

MARKA 3 - Thangal Naga bible

MARKA 3

¹Tuachi`n kikhopna inn ah a lutkik a, huasan ah khutjeng mikhat a om hi.

²Tualeh mi pawlkhat in amah a hektheihna ding un khawlni-in a damsak leh damsaklouh adap-et ua.

³Jesu`n khut jengpa kiangah, “Mipi maiah ding in,” achi a,

⁴Tuachi`n Jesu`n amauhte kiang ah, “Khawlni a silhoih bawl maw asiang, silsia maw? Hundamna maw asiang, hihlup maw?” chi in adong hi. Hinanleh amauh a daidide ua.

⁵A lungtang uh atakjiak a lungkham leh hehkawm a amauhte a et kawikawi nung in, “Khut jengpa kiangah na khut jan in,” achi a. Aman a jankhia a, tuachi`n a langkhat bangin ahung damsiangta hi.

⁶Tuachi`n Pharisaite a pawtkhia ua Jesu thah ding dan Herod pawl a mite tawh a kikum uhi.

⁷Hinanleh Jesu a nungjuite tawh dil lam ah apaita ua; Galili gam a kipan mipi tamtak in anung ajui ua,

⁸a silbawl thupidan ajak un, Judea gam a kipan, Jerusalem khua a kipan, Idumai gam a kipan, Jordan gal a kipan Tura leh Sidon khuakim a kipan in, mipi tamtak a kiangah a hungpai ua.

⁹Mipite jiakin amah a ding a gunkuang neu khat mansa a koih ding in a nungjuite thu ahilh a, atuachih keileh ahung nehgawp ding uh, achi hi.

¹⁰Aman mi tampi ana damsakta a, tuachi`n natna nei jousiahin amah a khoihkhak theihna ding un abawh lutlut uhi.

¹¹Kha giloute`n amah amuhtak un amai a puk in, “Nang Pasian Tapa nahi chi in a kikoujel uhi!”

¹²Hinanleh aman amah kua hihiam chih gendoklou dingin khauhtak in akham hi.

¹³Jesu mualtung lam ah a kahtou a, adeihtuamte a sam a, amau a kiangah avapai ua.

¹⁴“Tualeh a kiang a om ding leh a thupuak gen a asawl ding in sawmlehnihte a namdet a,

¹⁵tualeh damloute damsak theihna leh, dawite nohdok theihna thuneihna nei ding in.”

¹⁶Ama seh sawnlehnihte hihte ahi uh: Simon (Peter chia amin aphuak pa);

¹⁷Zebedi tapa Jakob leh a sanggampa Johan, (Aman Bonerges a sa, “Huapen van ging tapa chihna ahi”);

¹⁸Tualeh Andru, Philip, Bartholomai, Mathai, Thoma, Alphai tapa Jakob, Thaddai, Kananmi Simon,

¹⁹tualeh a mansakpa Juda Iskariot zong ahi uh; Tuachi`n amauhte innsung ah alut uhi.

²⁰Tualeh amauhte an na-ngawn netheilou khop in mipi ahung kikhawm kik ua.

²¹A inkuanpihte`n hihthu ajaktak un, “A lungsim venglou ahita chi in pummat asawm uhi.”

²²Tualeh Laigelhmite Jerusalem a pat a hungpaisukte`n, “Beelzebul pai ahi, dawimangpa jiakin ahi dawite adelhdok achi ua.”

²³Tuachi`n Jesu`n amauhte asam a akiang uah gentehna in thu agen a, “Bangchi`n Setan in Setan adelhdok diai?

²⁴Gamkhat kilangkhen in kidouleh agam ading thei kei ding.

²⁵Tualeh innsung khat kilangkhen in kidouleh, hua inkuan zong adingdok kei ding hi.

²⁶Setan zong amah leh amah kidou in kilangkhen leh adingdok jou kei ding a, a mangthang jaw ding hi.

²⁷“Mi kuaman mihatpa ka`n masa loupi in mihatpa inn a lut in avan a hihsiatsak ngaikei, a ka`ntawm jawh chiangin ahihsiatsak thei pan ding hi.

²⁸“Adiktak in kung hilh ahi, mihing tate akhialhna jousiah uh leh Pasian gensiatna lam a a gensiatna jousiahte uh ngaihdam ahi ding ua.

²⁹Hinanleh kuapeuh khasiangthou gensia bangchiktan in ngaihdam ahikei ding a, tangtawn khialhna a lauhhuai ah aomjaw ding,” achi hi.

³⁰“Dawinin-pai ahi achihjiak ua hihthu agen ahi.”

³¹Tuanung in anu leh a sanggamte a hungpai ua, inn Pualam a dingin amah sam dingin mi asawl uhi.

³²Tualeh akim ah mipi atou diamduam ua, a kiangah, “Inn pualam ah nanu leh na sanggamte`n ahung jong uh,” achi ua.

³³Tualeh aman akiang uah, “Ka nu leh ka sanggamte kuate ahia?” achi a.

³⁴Tuachi`n akim a toute a en kawikawi a, “En un! Ka nu leh ka sanggamte! achi hi.

³⁵Kuapeuh Pasian deihlam bawl taphot ka sanggampa, ka sanggamnu leh kanu ahi,” achi hi.