Read Thangal Naga MARKA 4 Bible Online

MARKA 4 - Thangal Naga bible

MARKA 4

¹Tualeh aman tuipi piau ah thuhilh apan kik a, tualeh mipi tamtak a kiangah ahung kikhawm ua, tuachi`n tuipi tung a gunkuang sungah alut a, atou a, tualeh mipi jousiah tuipilam nga in tuipi piau ah leitak ah aom uhi.

²Tuachi`n aman gentehna zang in thu tampi amauhte ahilh a:

³“Ngaikhia unla! En un, khaichithehpa khaichi theh ding in a kuan a.

⁴Tualeh hichi ahung hi a, athehlai in, khenkhat lamsik ah atu a; tungleng vasate hungpaiin anejouta uhi.

⁵Khenkhat suangsilei, lei tamlouhna lak ah atu a; lei asahlouh jiakin a poupai a.

⁶Hinanleh ni ahungsan in ahaivul a; tualeh jung aneihlouh jiakin a gawsiangta hi.

⁷Tualeh khenkhat ling lak ah atu a; alingte hung khang in adepmangta a, gah aneikei uhi.

⁸Hinanleh khenkhat leihoihlak ah atu a, apou a, hungkhang in gah anei a, aleh sawmthum, aleh sawm guk tualeh jakhat bang in ahung pungta hi,” achi hi.

⁹Tualeh aman akiang uah, “Jakna ding bilnei jousiahin ja hen!” achi hi.

¹⁰Hinanleh amah guak a a omlai in, Sawm leh nihte tawh akiang a omten gentehna thu adongchian ua.

¹¹Tualeh aman akiang uah, “Nou kiangah Pasian gam thugu`k piak ahi a, hinanleh pualam mite a ding in pen, bangkim gentehna a gen ahi,

¹²tuachi`n, ‘Muh jaw a muthei ua, a theisiam kei ding uh; ja jaw ajathei ua, angaihna a theikei ding uh. Ahuachih keileh denchiah ahung kiheikik kha ding ua, a khialhnate uh ngaihdam ahi kha ding uh,’ ” achi hi.

¹³Tualeh aman akiang uah, “Hih gentehna thu theisiamlou nahi uh maw? A tuachih leh bangchi`n gentehna thudang tengteng na theisiamta ding uale?

¹⁴Buhchithehpa`n thu atheh ahi.

¹⁵Tualeh lamgei a thu athehte hichibang ahi, thu ajaktak un manlang takin Setan hung paiin a lungtangte ua thute a laksakpai hi.

¹⁶Tualeh tuachimah bang in suangsilei a thehte hihte ahi uh; amau`n thu ajaktak un kipaktak in a sangpai uhi.

¹⁷Hinanleh a mauh ah jung aneikei ua, tomnou khat sung a om uhi. Tuanung in thu jiak a gimthuakna hiam, vuakna hiam ahung om chiangin akipuk pai uhi.

¹⁸Tualeh ling lak a kithehte hihte ahi uh, amau`n thu aja ua,

¹⁹leitung hinkhua ngaihsutnate, hauhsak utna khemnate, leh sil dangdang deihgohnate hunglut in thu adep a, gahtheilou in a omta hi.

²⁰Hinanleh leihoihlak a thehte hihte ahi uhi. Thu ja a, sa`ng a, aleh sowmthum bang, aleh sawmguk bang tualeh jakhat bang in agah uhi,” achi hi.

²¹Aman akiang uah a genkik a, “Meivak akoihna a koihlou a, lawhnuai hiam, lupna nuai hiam a koihding in kuan a hungtawi ngai a?

²²Thanglou ding a im bangmah a omngai kei a, langlou ding a phual bangmah a omngai kei.

²³Kuapeuh jakna ding a bilnei jousiahin ja uhen!”

²⁴Tuachi`n aman akiang uah, bang ahia najak uh pilvang un; natehna ngaimah un ahung tehsak ding ua, tualeh nou a ngaikhiate kiang ah, ahung piak behlap ding uh atamjaw piak in na om ding uhi.

²⁵“Kuapeuh anei kiangah piakbeh ahi ding a; hinanleh kuapeuh aneilou kiangah aneihsun zong laksak ahi ding,” achi hi.

²⁶Tualeh aman, “Pasian gam pen min lei a khaichi atuh tawhbang ahi;

²⁷Janchiah a ihmu a, sunchiah athoujel a, khaichi anapou in, anakhang a, hinanleh bangchi a pou a, bangchi a khang ahia chih a theikei.

²⁸Leiin amah in gah ahung suahjel a; amasan anah tuazohchiah avui, tuazohchiah avui a atang.

²⁹Hinanleh agah ahungmin chiangin buhlak ahuntak man in Kawite in a at paita hi, achi hi.”

³⁰Tuachi`n aman, “Pasian gam bang tawh itehkak tadiai?” Ahihkeileh “Bangtawh tehkhin a gen ding ita ua?

³¹Ankam chi tangkhat leia akituh chiang, lei a khaichitang tengteng sang in neupen nanleh.

³²Atuhkhit nung un a hungpou a, Loupa jousiah sang in ahung lianjaw a, ba lianpipi a hungnei a, tuachi`n tungleng vasate alim ah agiak uhi, huachibang mah ahi,” achi hi.

³³Tualeh hichibang gentehna thu tampi in a jaktheih khomkhom un, thu akiang uah agen jel hi.

³⁴Hinanleh aman gentehna louin akiang uah thu agenngai kei. Tualeh amauh guak a aom chiang un a nungjuite kiangah sil bangkim a hilhchian jel hi.

³⁵Tuani mah in, nitaklam a hunghih in, aman akiang uah, “Galkhat lam ah igalkah ding uh,” achi a,

³⁶Amau`n mipite a paisan zoh un, gunkuang a aom bangbang in amah a paipihta ua. Tualeh akiang uah gunkuang neu dang zong aom hi.

³⁷Tualeh huihpi hattak ahunglang a, tui kihotte, gunkuang sung ah a hunglut juajua a; tuachi`n gunkuang a hungdim phialta hi.

³⁸Hinanleh amah gunkuang mawng langkhat lam ah tangkham kham in ihmu in a om a. Tualeh a phong ua, a kiangah, “Siapa, ka manthai ding uh khawk salou nahi maw?” achi ua.

³⁹Tuachi`n amah ahungthou a, huih atai a, tualeh tuipi kiangah, “Dai in! Om khinkhian in!” achi a. Tuachi`n huih a tawpta a, a sipdideta hi.

⁴⁰Hinanleh aman a kiang uah, “Bangding a hichilau nahi ua? Ginna himhim na neihlouh uh bang chidan ahia?” achi hi.

⁴¹Tualeh amauh lau chihtak in alauta ua, “Hihpa bang chibang mi ahia? Huih leh tuipi nangawn in athu aman uh!” chi in khat leh khat a kichituah uhi.