Read Thangal Naga MARKA 5 Bible Online

MARKA 5 - Thangal Naga bible

MARKA 5

¹Tuachi`n tuipi gal Garasin mite gam a hungtung ua.

²Tualeh gunkuang a pat ahung pawtkhiattak in, mi khat han a pat a hungpawt in amah anatuak pai a.

³Amah hanlak a teng ahi a; tualeh kuaman sikkhau nangawn in a hentheikei uhi.

⁴Kol bulh in sikkhau in anakanta ua; hinanleh sikkhaute a bottan a, kolte a botsia jel a, kuamah in a thujohkei uhi.

⁵Tualeh sun leh jan in mualte leh hante ah omjing in akikou a, suang in aki-at jel hi.

⁶Aman gamla tak a pat Jesu amuh tak in, tai in, a vabiata a,

⁷tualeh amah aw ngaihtak in a kikou a, “Jesu Pasian tungnung pen Tapa! nang leh ken bang ahia bawlding kaneih? Hung gimsak lou dingin Pasian min in kung ngen hi!” achi hi.

⁸Aman a kiangah, “Nang kha-nin, hihpa sung a pan hungpawt in!” ana chita a.

⁹Tuachi`n aman, “Na min bang ahia?” chi in adong a. Tualeh aman a kiangah, “Ka min ahihleh ‘Nuai ahi,’ tampi ka hihjiak un!” achi a.

¹⁰Hua gam a kipan amauh sawlmanglou dingin a kiangah angen ngutngut a.

¹¹Tualeh huasan ah mual pang ah vok tampi a om a.

¹²Tuachi`n dawininte jousiahin, “Vok sungah hungsawl in asung ua ka luttheihna ding un,” chi in a kiangah a ngen ua.

¹³Tuachi`n Jesu`n amauh thu apia a, tuachi`n Dawininte a pawtkhia ua, vok sungah alut ua; tualeh vokhonte sangnih bang ahi ua, vokhonte ken a pat in tuipilam juan in hahtai in a hungtai ua; tuilak ah a kialumta uhi.

¹⁴Tuachi`n vok chingte atai ua, hihthu khuapi leh gam teng ah ahilhta uhi. Tualeh bang sil hungtung ata chia en ding in mipite ahung taikhawm uhi.

¹⁵Tuachi`n amauhte Jesu kiang ah a hungpai ua, dawi-mat nuai khat paipa puan silh a, lungsim ngaina pua a anatou ahung mu ua; tuatakin alauta uhi.

¹⁶Tualeh amauhte`n dawimatpa tung a sil tundan leh vok omtan amauh anahilh ua.

¹⁷Tuachi`n amah tawh agam ua pat a pawtkhia dingin a ngenta uhi.

¹⁸Tualeh amah gunkuang sung a aluttak in, dawinin paipa in, “Nang tawh pai ka ut!” chi in a kianga om dingin a ngen a.

¹⁹Hinanleh Jesu`n a phalkei a, a kiangah, “Na inn ah, na lawite kiangah pai inla, Toupa`n nang a ding a silthupi ahung bawlsak dante leh, nang ahung hehpih dante vahilh in,” a chijawta hi.

²⁰Tuachi`n a pai a, Jesu`n amah a ding a sil thupi a bawlsak dante Dekapoli khua ah a tangkoupih ta a, mi jousiahin lamdang asa mahmah uhi.

²¹Jesu gunkuang a galkhat lam ahung tunkik takin mipi tamtak akiang ah ahung paikhawm ua, tualeh amah tuipi gei ah a om a.

²²Tualeh ngaiin, kikhopna inn a vaihawmte lak a mikhat amin Jaira kichi a hungpai a, Jesu amuh takin a kengbul ah akhupbok a.

²³“Ka tanu naupang nou asi dekdek a, ahung dam a, a hintheihna dingin, hungpai a atung a nakhut nga ding in kungngen hi!” chi`n, chitaktak in a ngen hi.

²⁴Tuachi`n Jesu amah tawh apaita a, mipi tampi in ajui ua, aboh lutlut uhi.

²⁵Tualeh Numei khat kum sawmlehnih sipawt a damlou aom a,

²⁶Daktor tampi lak a pan sil tampi a nathuak in, aneih jousiah ana jangjouta a, hinanleh bangmah a phatuamkei a, a khawk jawsem a.

²⁷Aman Jesu tanchin ajaktak in, anung ah mipi lak ah a hungpai a, apuan a khoih a.

²⁸“Apuan maimai khoihkha lengzong ka dam ding hi,” chi`n a ngaihsun hi.

²⁹Thakhat in asipawt pen akangta a; anatna adamta hi chih ataksa tungah akithei hi.

³⁰Tualeh Jesu`n a sung a kipan in silbawltheihna apawt chih atheipai a, mipilak ah akihei kawikawi a, “Kua ahia ka puan khoih?” achi a.

³¹Hinanleh a nungjuite`n a kiangah, mipi in ahung phuk lutlut na mu vele, kua ahia hung khoih nachih, achi ua.

³²Tualeh aman hua sil bawlnu muh sawm in adak kawikawi a.

³³Hinanleh numeinu in atung a sil kibawl athei a, lau leh chitun kawm in a hungpai a, a maiah khupbok in, a kiangah thudik jousiah ahilhta hi.

³⁴Tualeh aman amahnu kiang ah, “Tanu, na ginna in ahung damsakta hi, pai inla, na natna a kipan na dam tawntungta in,” achi hi.

³⁵Aman hihbang a thu agen laiin, kikhopna inn a vaihawmpa inn a kipan mi a hungpai ua, “Na tanu asita ve, bangding a siapa buaisak nalai nahia?” a hungchi ua.

³⁶Jesu`n hih thu ajaktak in, kikhopna inn a vaihawmpa kiang ah, “Lauken gingta mai in,” achi hi.

³⁷Tualeh aman Peter leh Jakob leh Jakob sanggampa Johan chihlouh in amah ajuih uh aphal kei.

³⁸Tuachi`n amah kikhopna inn a vaihawmpa inn ah a hungtung a, ana buai vengvung leh kap a na mau vengvungte amu a.

³⁹A valut a akiang uah, “Bangding a kap a mau vengvung nahi ua? Naupangnu asi ahikei, a ihmu ahi!” achi hi.

⁴⁰Tualeh amauhte`n amah a nuihsan ua, ahihhang in aman aun un a notkhia a, naupangnu nu leh pa leh a jawhpihte a paipih a, naupangnu omna ah alut ua.

⁴¹Tuachi`n aman naupang akhut in akai a akiang ah, “Talitha kumi,” achi a. Tuapen, “Nungaknou, thouin, kungchi hi!” chihna ahi.

⁴²Tuachi`n Numei naupang a thoua a paipai ngal a, (amahnu kum sawmlehnih mi ahita a), tuatakin a mau`n lamdang asa mahmah uhi.

⁴³Hinanleh aman akiang uah, hih kuamah in theikei heh achi tinten a, “Tualeh nek ding banghiam pia ding in, thu apia hi.”