Read Thangal Naga MARKA 7 Bible Online

MARKA 7 - Thangal Naga bible

MARKA 7

¹Tuachi`n Jerusalem a kipan a hungpai Pharisaite leh Laigelhmi khenkhat akiang ah ahung paikhawm ua.

²Tualeh amauhte`n a nungjuite khenkhat in khut nin pum a tanghou a nek uh a muta ua, nin chih in, khut sillouh chihna ahi.

³Pharisaite leh Judate`n upate thugousiah apom tinten jiak un a khut uh hoihtak a asil kei uleh ane ngai kei uhi. Tuapen khanglui thugousiahte ajuihna uh ahi hi.

⁴Van juakna mun a kipan apaichiang un zong, a kisilphot kei uleh ane ngai kei uhi. Tualeh thugousiah dang tampi achi`n uh aom, nou, noupi bilnei, taubel, lupna sil chihte.

⁵Tuachi`n Pharisaite leh Laigelhmite`n, “Bangding a na nungjuite upate thugousiah bang a omlou a, khut sawplou a tanghou ne uh ahia?” chi`n adong ua.

⁶“Aman akiang uah, Isaiah in nou milepchiahte thu ana genkholh dik talua hi! Hih bangin ana gelh hi: ‘Hihte`n amuk un a hung zahtak ua, hinanleh a lungtang uh keia pan in a gamla hi.

⁷Tualeh a thuhilhna ua mihing thupiakte ahilh jiak un ahung biak uh athawn ahi, chih gelh bang in!’

⁸“Pasian thupiakte koihkhia in, mihing thugousiahte najuih tinten jiak uh ahive, noupi leh nou sil leh adang hichibang mah tampi na chiin uh,” achi hi.

⁹Aman akiang uah, “Na thugousiahte uh na zuihtheihna ding ua Pasian thupiakte nialdan na siam mahmah uhi.

¹⁰Mosi-in, ‘Na nu leh na pa zahtakin,’ tualeh ‘Anu leh apa samsia si heh,’ achi hi.

¹¹Hinanleh nou, ‘Mi`n anu hiam apa hiam kiangah nung phattuampihna ding korban ahita,’ achihleh, (Huapen, Pasian kiang a lat, chihna ahi),

¹²Tuazoh chiangin anu leh apa a ding bangmah sepsak naphal nawn kei uhi.

¹³Na thugousiah uh mi na piaksawn na un Pasian thu bangmahlou na suah uhi. Tuabang sil tampi nabawl uhi,” achi hi.

¹⁴Tuachi`n Jesu`n mipite sam in akiang uah, “Na un un ka thugen ngaikhia unla, theichian un.

¹⁵A pualam pan a mihing sung a lut in mi aninsakthei bangmah omlou hi. Hinanleh amah sung pan a hungpawt silte in mi aninsakjaw hi.”

¹⁶Jakna ding a bil neiin, ja hen! achi hi.

¹⁷Mipite nusia a inn sung a alutkhit in a nungjuite`n gentehna thu a dongchianta ua.

¹⁸Tuachi`n aman akiang uah, “Nou zong huachipi a theihsiamna neilou nahi uh maw? Bangpeuh pualam a kipan a mihing sung a lut in, amah aninsakthei kei, chih theilou nahi uhiam?

¹⁹Ajiak ahihleh, a lungtang sung a lut loua, a gilsung a lutjaw a, nek chiteng siangsak a dailenna a pawtkhia mai ahi chih theilou maw?” achi hi.

²⁰Tualeh aman, “Mihing sung pan a pawtkhiate in mihing ninsak hi.

²¹Sunglam a, mihingte lungtang a kipan in, ngaihtuahna giloute, angkawmnate, thanghuainate, tualthahnate,

²²Guktatnate, ennate, gitlouhnate, khemhatnate, huknate, mitsipnate, gensiatnate, kiletsaknate, mot-huainate,

²³Hih silgiloute jousiah sunglam a pat hungpawt in mihing aninsak jel hi,” achi hi.

²⁴Huamun pan in amah ding khia in Tura leh Sidon gam ah apaita a, inn khat sungah alut a, kuamah in a theihlouh ding a ut a, hinanleh a kiphualthei kei hi.

²⁵Numei khat, a tanu naupang khanin pai in, a tanchin anaja a, tuachi`n hung paiin a kengbul ah a ku`n a.

²⁶Numeinu Grik mi ahi a, Suria gam Phoinisia khua a piang ahi, pianna lam ah Siro-Phoiniki-mi ahi. Amahnu in a tanu sung a khanin nohkhiat sak dingin a kiangah a ngen hi.

²⁷Hinanleh Jesu`n a kiang ah, “Tate hungvah masa phot uheh, tate tanghou laksak a uite kiang a paih ahoihkei,” achi hi.

²⁸Tualeh amahnu`n a kiangah, “Toupa,” hih jaw ahi a, “hinanleh dohkan nuai a uite`n zong tate tanghou neng kia anejel uh hi!” chi`n a dawng hi.

²⁹Tuachi`n aman a kiangah, “Hihbang a nagen man in paita in, dawi na tanu sung a kipan in a pawtta hi!” achi hi.

³⁰Tualeh amahnu inn a hungpai takin, atanu dawiin a pawtkhiatsan, lupna a lum ahung muta hi.

³¹Tuachi`n Tura leh Sidon gam a pawtsan kik a, Dekapoli gam Galili tuipi a hungtungta hi.

³²Tuachi`n mikhat bilbing, ham zong ham chian theilou a kiangah ahung zohpih ua, atung a akhut ngading in a ngen ua.

³³Tualeh aman mipi lak a kipan apaipih tuam a, akhutjungte in a bilsung a khoihsak a, achil asiat a, tualeh alei a khoihsak a.

³⁴Tuachi`n vanlam a entou a, anak-huai a, “Ephatha,” achi a, “Hung kihong in!” chihna ahi.

³⁵Abil a hungvang pai a, aleigui akiphel a, ahung hamsiang theita hi.

³⁶Tuachi`n aman kuamah hilhlou dingin thu apia a, hinanleh a hahkham leh a hahgen jawsem uhi.

³⁷Tualeh genzohlouh khop in lamdang asa ua, “Aman sil jousiah a bawlhoih a! Bilbingte azasak a, hamtheiloute a hamsak thei jel!” achi uhi.