Read Thangal Naga LUKA 10 Bible Online

LUKA 10 - Thangal Naga bible

LUKA 10

¹Hih silte nung in Toupa`n midang sawmsagih zong aguat a, ama painang khuachin leh munchin ah amai ah nih nih in asawl hi.

²Tuachi`n aman akiang uah, “Buh lak ding atam mahmah a, hinanleh asemtute atawm uhi; tuajiakin abuh lading a nasem dingte hung sawlkhia dingin buh neipa kiangah ngen un.

³Pai un! ngai un, ngia hon lak a belamnou bang in kungsawl ahi.

⁴Dangka-ip hiam, thungpi hiam, khedap hiam keng kei un; tualeh lampi ah kuamah chibai buk kei un.

⁵Tualeh inn na lutna phot uah, amasa pen in, ‘Hih inn ah khamuanna tung hen,’ chi un.

⁶Tualeh hua-ah khamuanna ta aom leh na khamuanna uh atung ah aom ding a; a om keileh na khamuanna uh noukiang ah ahung kinungleh kik ding.

⁷Tualeh hua inn ah omjing unla, a hungpiak bang un ne unla dawn un; ajiak nasemtu thaman mutak ahi. Inn khat a pat inn khat ah kisuan lehleh kei un.

⁸Khua na lutna phot uah ahung na kipahpih uleh namai ua alui taphot uh ne un,

⁹hua-ah adamlou omte hihdam unla, akiang uah, ‘Pasian gam na kiang uah a hungtungta,’ chijel un.

¹⁰Hinanleh khua na lutna phot uah ahung na kipahpih kei uleh akhua kongjing ah pai unla,

¹¹‘Na khua leivui uh ka kengphang ua bang nasan natung uah ka tatsiang uh; ahihhangin Pasian gam na kiang uah a hungtungta chih thei un!’ chi un.

¹²Hinanleh kung hilh ahi, huani chiangin hua khuate thuak ding sang in Sodom khua thuak ding adan a omjaw ding!

¹³“Korazin natung agik hi! Bethesda natung agik hi! Na kianga sil thupi kibawlte Sidon leh Tura a kibawl hileh sawtpi a pan la-ip silh a vut lak ah touin a kisikkhin ta ding uhi!

¹⁴Hinanleh vaihawmni chiangin nou thuak ding sang in Tura leh Sidon thuak ding adan a omjaw ding hi.

¹⁵Tualeh, Nang Kapernaum! Vantan a tawisang, misi khua ah puaksuk in na om ding hi!”

¹⁶“Kuapeuh na thugen uh ngaikhia tuh kei hung ngaikhia ahi uh; tualeh kuapeuh nou hungnial tuh kei hungnial ahi uh; kei hungnial tuh a hungsawlpa nial ahi uh,” achi hi.

¹⁷Tualeh sawmsagihte kipaktak in ahung tungkik ua, “Toupa, namin jiakin dawite nangawn ka thu-un a om uh!” achi ua.

¹⁸Aman akiang uah, “Setan van a kipan-a tunphe bang a hungkia kamu hi, achi a.

¹⁹Ngai un gulte leh mom-aite totden theihna leh melma silbawltheihna jousiah tung a thuneihna kungpia hi. Bangmah in ahung hihna kei ding hi.

²⁰Hinanleh dawite na thuthu ua aom jiakin kipak kei unla, van a namin uh gelh ahihjiak in kipakjaw un,” achi hi.

²¹Huahun laitak in Jesu Khasiangthou in akipak a, “Pa aw, van leh lei Toupa! Nang, mipilte leh misiamte kiangah hihthute na im a, naungekte kiang a naphuan jiakin kung pahtawi hi; ahi, Pa, huachibang bawl nang ngaih in ahoih hi.

²²“Siljousiah kapa`n kei ahung piakhiata hi. Tapa kua ahia chih Pa loungal kuaman athei kei; tualeh Pa kua ahia chih Tapa leh akiang a atheihsak nuamnate loungal kuaman athei kei,” achi hi.

²³Tuachi`n a nungjuite lam anga a, aguk in, “Na silmuhte uh amu mitte ahampha hi!

²⁴Ajiak kung hilh ahi, Jawlnei tampite leh kumpi tampite`n na silmuhte uh muh a ut ua, hinanleh amu kei uh, tualeh najakte uh zong jak a ut ua, ajakei uh,” achi hi.

²⁵Tualeh ngaiin dansiam mi khat a dingkhia a amah ze-etna in, “Siapa, tangtawn hinna ka neihtheihna dingin bang ka bawl dia?” achi a.

²⁶Aman a kiang ah, “Dan laibu ah bang akigel ei? Bang nachi sim ei?” achi a.

²⁷Aman adawng a, “ ‘Toupa na Pasian tuh na lungtang tengteng in, nakha tengteng in, na hatna tengteng in tualeh na lungsim tengteng in na it ding ahi; tualeh nangmah na ki it mahbang in na innvengte zong na it ding ahi,’ ” chi`n, achi a.

²⁸Tuachi`n Jesu`n akiang ah, “Na dawng dik ngel hi, hichi`n bawl in, na hing ding hi,” achi hi.

²⁹Hinanleh amah siam kitan ut in Jesu kiangah, “Ka innveng kua ahia?” achi a.

³⁰Tuachi`n Jesu`n adawng a, “Mi kuahiam khat Jerusalem a pat Jeriko ah apaisuk a, suamhatte atuakkha a, huate`n apuansilh asutsiang sak ua, avua ua, siloubep in anusiata uhi.

³¹Tuachi`n siampi khat tua lampi ah hung paisuk kha laizang a; amah amuhtak in lampi gei langkhat ah apelta hi.

³²Tuachibang mah in Levi mi khat huamun a hungtun in, a en a, lampi gei langkhat ah apelta hi.

³³Hinanleh Samaria mi khat khualjinlai huapa omna mun a hungtung a, amah amuhtak in ahehpih mahmah a.

³⁴A kiangah apai a, aliamnate sathau leh uain buak in atuamsak a, ama gantung a tuangsak in zinbuk ah apaipih a, a enkolta hi.

³⁵Tualeh ajingni a apai dingin makhai nih alakhia a, zinbuk neitu kiangah apia a, ‘Amah na enkol inla, hih ban a nasen zahzah kung paikik chiangin kung piakik ding,’ ” achi hi.

³⁶“Ahihleh hih mi thumte lak ah kuapen gutate tuakpa innveng hiding in na ngaihtuah a?” achi hi.

³⁷“Aman atung a khuatuahna neipa achi a.” Tuachi`n Jesu`n akiang ah, “Pai inla nang zong hihbang in vabawl in,” achi hi.

³⁸Tualeh hichi ahung hi a, apai laiun khuakhat ah alut ua, numei khat amin Martha in a inn ah atungsak hi.

³⁹Tualeh amahnu`n Mari kichi sanggamnu khat anei a, amah Jesu kengbul ah atou a, a thugen angai hi.

⁴⁰Hinanleh Martha pen nek bawlin abuai mahmah a, Jesu kiangah ahung pai a, “Toupa, ka sanggamnu`n kei guak nek bawl a ahung ngansiah khawk salou nahi maw? Hung huh dingin sawl in!” achi a.

⁴¹Jesu`n adawng a, a kiangah, “Martha, Martha! Sil tampi na ngaihtuah a buai nahi,

⁴²hinanleh sil khatguak apoimoh hi; Mari-in tanhoih atelta a, huapen laksak louh ding ahi,” achi hi.