Read Thangal Naga LUKA 11 Bible Online

LUKA 11 - Thangal Naga bible

LUKA 11

¹Tualeh hichi ahung hi a, mun khat a athum laiin, tualeh athum zoh in a nungjuite khat in a kiang ah, “Toupa, Johan in a nungjuite ahilh bangin ka kiang uah thumdan hunghilh in,” achi a.

²Aman akiang uah, “Na thum chiang un: ‘Ka Pa uh van a om: Na min kizahtak hen; Na gam hungtung hen. Na deihlam van a a kibawl bangin, Leiah zong kibawl hen.

³Nisial a ka nekkhop uh an hung pian

⁴Ka tung ua khialte ka ngaihdam bang un, Kou khialhnate zong hung ngaidam in. khemna ah hung kailut kenla Gilou lakpan hung hunkhiajaw in,’ ” chi un, achi hi.

⁵Tualeh aman akiang uah, “Na lak ua kuahiam in lawm khat nei henla, jankim laiin a kiangah vapai henla, ‘Lawm aw, tanghou beuthum hung batlaksak in.

⁶Ajiak ka lawm khat khualjin ka kiangah ahung paia, amai a lui ding bangmah ka neikei chi henla!’

⁷Tualeh aman innsung panin dawng henla, ‘Hung hihbuai ken! Kot khak ahita a, tualeh ka tate zong ka kiangah lupna ah a ihmuta uh, hung thouin kung piathei kei na chileh.’

⁸Kunghilh ahi, alawm ahihjiak a vathouin vapia kei mah leh zong, anget teitei jiakin vathou in adeih zahzah avapia ding hi.

⁹Kunghilh ahi: Ngen un, tuachi`n piak in na om ding uh; zong un, na mu ding uh; tualeh kiu un, honsak in na om ding uhi.

¹⁰Ajiak kuapeuh a ngen in a ngah a, kuapeuh azong in amu a, kuapeuh akiu tuh honsak in a om ding hi.

¹¹Na lak ua pate kuahiam khat a tapa in tanghou ngen leh kuan suang apia dia? Ahihkeileh ngasa ngen leh kuan ahia nga tang a gul pia ding?

¹²Ahihkeileh aktui ngen leh kuan ahia mom-ai piading?

¹³Tualeh nou migiloute`n bawn na tate uh silhoih piakdan na theih uleh na Pa uh van a om in a ngente kiangah Khasiangthou piakdan hahtheih tazen lou ding maw!”

¹⁴Tualeh Jesu`n dawi hamtheilou khat ahawlkhia a, tualeh hichi ahi a, dawi apawttak in hamtheilou pen ahung hamtheita a; tuachi`n mipi`n lamdang asa mahmah ua,

¹⁵hinanleh alak ua khenkhat in, “Dawimangpa Beelzebul jal a dawite a hawlkhiat ahi,” achi ua.

¹⁶Adangte`n amah ze-etna in van a pan a chiamtehna a ngen ua.

¹⁷Hinanleh aman angaihtuah uh ana thei a, akiang uah, “Gam amah leh amah kidou taphot a mangthang jel hi; tualeh innsung khat zong a kidou leh apukjel hi.

¹⁸Setan zong amah leh amah akidou leh bang chi`n agam a dingthei dia? Beelzebul jal a dawite hawlkhia nung chi ua.

¹⁹Tualeh ken Beelzebul jal a dawite hawlkhia ka hihleh na tapate un kua jal a hawlkhia ahia le? Tuajiakin amauhte noute hung vaihawmsak dingte ahi uhi!

²⁰Hilehzong ken Pasian khutzung vang a dawite ka hawlkhiat leh Pasian gam na kiang uah a hungtung taktak ahita hi.”

²¹“Mihat in galvan kim a a inn aveng chiangin a inn abit a.

²²Hinanleh amah sang a hatjaw khat ahung paia, a hungzoh chiangin a kivonna galvan jousiah alaksak a, aneih leh lam alaksakte ahawmjak jel hi.

²³“Kuapeuh keilam a pangloute kei hung dou ahi ua; tualeh kuapeuh ahung lak khawmpih lou tuh athehjak ahi.

²⁴“Dawinin pen mi sung a kipan a pawtkhiat in khawlna ding zongin gamgaw mun lak ah avak kawikawi a, hinanleh amukei a; ‘Ka pawtna inn mah ah ka paikik mai ding,’ achi a.

²⁵Tualeh ahung pai takin phiatsiang a zephoihsa in amuta hi.

²⁶Tuatakin apai a, amah sang a giloujaw dawi adang sagih ahung puia, asung ah alut ua, atengta uhi. Tualeh huapa omdan nunung pen amasa sang in ahung siajawsemta hi,” achi hi.

²⁷Tualeh hichi ahung hi a, hih thute agen laiin, mipi lak a pat numei kuahiam khat ahung kikou khia a, “Nang hung kipaina gil ahampha hi, tualeh nanawi tepte tawh!” achi a.

²⁸Hinanleh aman, “Ahi, hinanleh Pasian thu ja a juite ahampha jaw uh!” achi hi.

²⁹Tualeh mipi ahung kikhop khawm laiun, aman akiang uah, “Tulai khangthakte khang giloutak ahi uh! Chiamtehna azong ua, hinanleh Jawlnei Jona chiamtehna loungal chiamtehna dang piak ahikei ding uh.

³⁰Ajiak Jona Ninevi khua a mite a ding a chiamtehna ahih bang in Mihing Tapa zong tulai khangthakte dingin chiamtehna ahi ding.

³¹Simlam kumpinu vaihawmni chiangin tulai khangthakte tawh ahung thou ding a, siamlouh atangsak ding hi; ajiak Solomon pilna ngaikhia dingin leitawp a pan ahung pai hi; Solomon sang a thupijaw hiah a om hi.

³²Ninevi khua mite vaihawmni chiangin tulai khangthakte tawh athou ding ua, siamlouh atangsak ding uh, ajiak Jona thugen jiakin amauh a khialhnate uh akisik uh; ngaiin Jona sang a thupijaw hiah a om hi!

³³“Mi kuamah in meivak adet chiangin bemkawm ah akoih ngai kei; lawh nuaiah zong akoih ngai kei, ahung lutte`n avak a muhtheihna ding un meivak tunna ah akoihjaw hi.

³⁴Taksa vakna mit ahi a, tuajiakin namit achim chiangin na taksa zong aun in avak suak hi, hinanleh namit ahoihlouh chiangin na taksa zong amial hi.

³⁵Tuajiakin nasung a vak om pen mial ahihlouhna dingin pilvang in.

³⁶Tuajiakin na taksa apumpia avak a, amialna mun a om kei leh meivak vakphatak in a hung tanvak bang in avaksuak siang ding,” achi hi.

³⁷Tualeh a thugen laiin Pharisai kuahiam khat in akiang ah an ne dingin amah achial a; tuachi`n an ne dingin alut a atouta hi.

³⁸Tua Pharisaipa`n annekma a akhut asillouh amuh in lamdang asa mahmah hi.

³⁹Toupa`n akiang ah, “Nou Pharisaite`n nou leh kuang a pualam na silsiang gut ua; hinanleh na sunglam uh duhgawlna leh gitlouhna in adim hi.

⁴⁰Nou mimawte, apualam siamtu in asunglam zong siam lou ahi maw?

⁴¹Hinanleh nasil neihte uh migentheite kiangah piajaw un; tualeh ngaiun, sil jousiah nou dingin asiang hi.

⁴²“Hinanleh Pharisaite aw, natung uh agik hi! Ajiak nou lengmaselte, lounamsiate tualeh anteh louhingte sawm a khat napia ua, vaihawmna dik leh Pasian lungsiatna lah na thudon kei uh. Hihte ahi na bawlding uh, adangte bawllou tuan lou in.

⁴³“Nou Pharisaite aw, natung uh agik hi! Ajiak nou kikhopna inn ah touna hoih penpente leh van juakna mun a min chibai ahung buk ding nadeih uhi.

⁴⁴Nou laigelhmite leh Pharisai lepchiahte aw natung uh agik hi! Ajiak nou hankhuk, min ahihlam theiloua atunga ava paikhakjel nate bang nahi uh,” achi hi.

⁴⁵Tuachi`n dansiammite lak a khat in adawng a, akiang ah, “Siapa, hihbang a na thugen in kou zong hungtai na hi!” achi hi.

⁴⁶“Nou dan siammite zong natung uh agik hi! Nou van-gik puakhak taktak mi na puasak ua, noulah hua van-gikte nakhut mengleng khat un zong nakhoih nuam kei uhi.

⁴⁷Na tung uh agik hi! Ajiak nou Jawlneite han nalam ua, amauhlah napu napate uh thah ahi hi.

⁴⁸Na pu napate uh ahoih hi chi`n na theihpih uhi, ajiak amau`n Jawlneite ana that ua, nou ahan uh nalamsak uhi.

⁴⁹Tuajiakin Pasian pilna in zong akiang uah, ‘Jawlneite leh sawltakte kasawl ding a, alak ua khenkhat ana that ding ua, khenkhat abawl genthei ding uhi.’

⁵⁰Leitung siamchil a kipan a kisuah Jawlnei jousiah sisan phu tulai khangthakte tungah a kilathei ding hi,

⁵¹Abel sisan kisuah a pat maitam leh Pasian tempul kikal a si Zakariah sisan tan in; achi hi. Adiktak in kung hilh ahi, hih phuba pen tulai khangthakte tungah akila ding hi!

⁵²“Nou dansiammite aw, natung uh agik hi! Ajiak nou pilna chabi na lamang ua, nou lah na lut kei ua, mi alut dingte zong nakham uhi!” achi hi.

⁵³Tualeh aman hihthute agen laiin laigelhmite leh Pharisaite`n amauh thu tampi gensak tum in hahtok in atawng panta ua,

⁵⁴siamlouh atansak theihna ding un a hamkhelh na mat tum in atang gige uhi.