Read Thangal Naga LUKA 12 Bible Online

LUKA 12 - Thangal Naga bible

LUKA 12

¹Huachih laiin mipi simsenglouh khat leh khat kituanpai hial a ahung kikhop tak un, aman a masapen in a nungjuite kiangah, “Pharisaite tol, lepchiahna lak ah kiveng un.

²Ajiak kilanglou ding a khuh bangmah aom kei a, tualeh theihlouh ding a kiphual zong bangmah aom kei.

³Tuajiakin, mial a nagen taphot uh vak ah jak in aom ding a; tualeh innsung tawng a bilkawm a nagen uh inntungvum ah tangkoupih in aom ding hi.

⁴“Tualeh nou ka lawmte aw, kung hilh ahi, taksa sisak thei a, tuazoh chiang a bangmah dang bawltheih neinawnloute lau kei un.

⁵Hinanleh kua ahia nalau ding uh kung hilhkholh ding: Athah nung a zong gawtmun a paihtheihna thuneihna neipa amah lau un; ahi, kung hilh ahi, amah lau un!

⁶“Vatou nga daan dangkasik nih in ajuak jel uh hilou maw? Tualeh alak ua khat zong Pasian maiah manghilh in a om kei hi.

⁷Hinanleh nalu ua samzangte nangawn simsiang ahi. Tuajiakin lau kei un; vatou tampi sang in na manpha jaw uhi!

⁸“Kunghilh ahi, kuapeuh mi mai a kei hung gum taphot mihing Tapa in zong Pasian vantungmite mai ah agum ding hi.

⁹Hinanleh mi mai a kei hung kitheihmoh bawl tuh Pasian vantungmite mai ah kitheihmoh bawl in a om ding.

¹⁰“Kuapeuh mihing Tapa kalh a thugen tuh a gensiatna ngaihdam ahi ding a, hinanleh Khasiangthou kalh a thu gen tuh agensiatna ngaihdam ahi kei ding hi.

¹¹“Tualeh nou kikhopna innte, thukhentute, tualeh thuneitute mai a ahung paipih chiang un bang chi in, bang thu in ka dawng dia, ahih kei leh bang ka gen dia chi`n lungkham kei un.

¹²Ajiak Khasiangthou in ahuntak in nagen ding uh ahung hilh ding hi,” achi hi.

¹³Tualeh mihon lak a khat in, “Siapa, ka sanggam kiangah kapa un hung nutsiat gou hung kihawmpih dingin gen in,” achi a.

¹⁴A man akiang ah, “Mi, kua in ahia kei natung ua vaihawmtu hiam, tan hawmtu hiam a hungbawl?” achi hi.

¹⁵Tualeh aman akiang uah, “Pilvang unla, enna lak ah kiveng un; ajiak hauhsak mihing hinpih hilou hi,” achi hi.

¹⁶Tualeh aman gentehna thu khat agen a, “Mi hausa kuahiam khat alou a piang ahung tam mahmah ta a.

¹⁷Tuachi`n a lungsim in aki ngaihtuah a, ‘Ka buh leh balte koihna ding lah ka neikei a, bang lawh ding kadiam aw? chi`n aki ngaihtuah a.

¹⁸Tualeh hichi`n bawlning, Ka anbukte kaphel ding a, alianjaw kalam ding; tuachi`n hua-ah ka buh leh balte leh kavan jousiah kakoih ding, achi hi.

¹⁹Tualeh ka kha kiangah ka kha aw, kum tampi sung a dingin sil tampi naneita a; tawldam inla ne in, dawn in tualeh nuamtakin om in!’ Ka chi ding, achi hi.

²⁰Hinanleh Pasian in akiang ah, ‘Nang mimaw, tujan chiah na hinna hung ki laksak ding ahi, hua nasil kholkhawmte kua a ding ahita diai?’ ” achi hi.

²¹“Amah guak ding a gou kikhol a, Pasian lam a hausa lou tuh hichi bang ahijel hi,” achi hi.

²²Tuachi`n aman a nungjuite kiangah, “Tuajiakin kung hilh ahi, bang ahia ka nek ding, chi`n na hinna thu uleh, bang ahia ka silh ding chi`n nataksa ding un lungkham kei un.

²³Hinna nek ding sang in athupi jaw a, tualeh taksa zong puansilh sang in athupi jaw hi.

²⁴Va-akte ngaihsun un, buh atuh kei ua at zong a atkei uh; hinanleh Pasian in amauhte avak hi! Nou vasate sang a bang zahta a manphajaw na hi ua?

²⁵Tualeh nalak ua kua in ahia lungkham jiak a adin tongkhat abehlap thei?

²⁶Tuachia nou hua sil neupen bawn na bawltheih kei uleh bang ding a adangte lungkhampih nahi ua?

²⁷Lili pak khandan ngaihtuah un, na asem kei ua khau a khek kei uh; hinanleh kung hilh ahi, Solomon zong a thupina tengteng a akijep in zong hih lilipakte lak a khat bang a zep in aom kei hi.

²⁸Tuachia gam a hampa tunia hing a ajing a meikhuk a paihmai ding bawn Pasian in huachituk a ajepleh. Aw nou ginna tawmte, bangzah takin silhsak in na om ding uai?

²⁹“Tualeh nanek ding uhiam, nadawn ding uhiam, zong kei un.

³⁰Ajiak leitung a namte`n hihte jousiah azong uh; tualeh na Pa un hih silte napoimoh uh chih athei hi.

³¹Hinanleh nou Pasian gam zongjaw un, tuachi`n hih silte piakbeh in na om ding uhi.

³²“Pawltawmte aw, laukei un; ajiak na kiang uah kumpi gam piak na Pa uh kipak na lamtak ahi.

³³Na neih jousiah uh juak unla, migentheite kiangah pia un; van ah guta pailouhna leh samek neksiat louhna ah dangka-ip luitheilou leh gou setheilou kikholjaw un.

³⁴Ajiak nagou uh omna ah na lungtang uh zong a om ding hi.

³⁵“Na kawng uh gak unla, na meivak uh zong kuangsak jing un,

³⁶mi apu kitenna ankuang luina a pat a hungpai a kongkhak ahung kiuh chiang a na honsakpai thei ding a na ngakjing bangin om un.

³⁷Apu a hungpai chiang a amah nangak jing a amuh silate a hampha uhi! Adiktak in kung hilh ahi, akawng uh agak ding a, amauhte ankuang ah a tousak ding a, anek uh a bawlsakta ding.

³⁸Tualeh janlai in hiam, thawh hun in hiam, a hungpai a, hua chibang a amuh hua silate ahampha uhi!

³⁹Hinanleh hih thei un, guta hungpai ding hun inn nei pa`n thei henla hileh aveng ding a a inn aphetvang sak kei ding.

⁴⁰Tuajiakin nou zong kiging jingin om un, ajiak na gintaklouh laitak un Mihing Tapa ahung pai ding hi,” achi hi.

⁴¹Tuachi`n Peter in a kiangah, “Toupa, hih gentehna koukiang guak a nagen ahia, ahihkeileh mi jousiah kiangah zong?” achi a.

⁴²Toupa`n, “Dangka kemtu gin-om leh piltak, apu in ahun teng a atan ding uh hawmsak ding a a innkuan pihte tung a vaihawmtu ding a abawl ding kuapen ahita diam le?

⁴³Apu a hungpai chiang a sila huachibang a bawl ahung muh ding pa pen ahampha hi!”

⁴⁴Diktakin kung hilh ahi, amah aneih jousiah tung a vaihawmtu in abawl ding hi.

⁴⁵Hinanleh hua sila pa`n kapu hung paizok kenteh chi`n asilanu asilapa navua taleh, tualeh ne in dawn in nakham taleh,

⁴⁶Hua silapa pu pen a gintalouh ni khat in atheihlouh kal in a hungpai ding a, tunnih asuah ding a, gingloumite tan bang a tangsak ding hi.

⁴⁷“Tualeh sila apu deihlam theigige napi a na kiging lou leh apu deihlam a zong gamtang lou pa, tamvei vuak ahi ding.

⁴⁸Hinanleh theilou pi a vuakna thamching a silbawlpa tawmnou khat a vuak ahi ding. Ajiak kuapeuh tampi kipiakna kiangah tampi akiphut ding a, tualeh mi`n tampi akepsak kiangah atamjawsem aphut ding uhi.

⁴⁹“Leitung a mei khiasuk ding a hungpai ka hi, tu in zong kangpaileh chi na ing e!

⁵⁰Hinanleh baptisma tan ding ka nei, hua ka tangtun masiah ka om nuamlou hina e!

⁵¹Leitung a lemna lengsak ding a hungpai in nung ngaihtuah uh maw? Hibaih lou, kung hilh ahi, kikhenna omsak ding a hungpai ka hijaw hi.

⁵²Ajiak tu a kipan in innsung khat a om mi nga a kikhen ding ua, nih in thum adou ding a, thum in nih adou ding.

⁵³Pa in tapa, tualeh tapa in pa, nu in tanu, tualeh tanu in nu, innpinu in amounu, amounu in innpinu adou ding,” achi hi.

⁵⁴Tualeh aman mipite kiangah zong, “Nou tum lam a meikai namuh chiang un guah ju ding ahi nachi pai ua, huachi`n ahung om ngei a.

⁵⁵Tualeh sim huih a hunglan natheih chiang un khualum ding ahi nachi ua; tuachi`n a hung lum hi.

⁵⁶Nou milepchiahte aw! Van leh lei omjia lah na theisiam ngal ua, bangding a tulai hun omdan theisiam lou nahi ua?”

⁵⁷“Tualeh bangdin nouman thu adik a kikhen lou nahi ua?

⁵⁸Hung hekpa tawh thukhentu kiang nazot lai un, lampi ah kilep theihna khat zong teitei in, atuachih keileh vaihawmtu maiah ahung tut ding a, vaihawmtu in miman lamkaipa kiang ah ahung pekhia ding a, tualeh miman lamkaipa`n thong ah ahung khumkha ding hi.

⁵⁹Kung hilh ahi, paisasan khat nangawn na piakkim masiah hua a kipan in napawt ngai kei ding hi,” achi hi.