Read Thangal Naga LUKA 13 Bible Online

LUKA 13 - Thangal Naga bible

LUKA 13

¹Huachih hun laiin, Galili gam a mite Pilat in athah a, a sisan uh a Pasian biakna sa tawh ahal khawmsak uh thu Jesu kiangah hunghilh mi bangzah hiam a om ua.

²Jesu`n adawng a akiang uah, “Huachibang sil athuak jiak un hua Galilimite Galili gam a mijousiah sang a khialjaw diak in na ngaihsun uh hiam?

³Kunghilh ahi! Hilou e, nou zong na kisik kei uleh huachibang mah in na mangthang siang ding uhi, achi hi.

⁴Ahihkeileh siloam innsang in apukkhum a anetlup mi sawmlehgiatte zong Jerusalem khua a tengte jousiah sang a khialjaw a ngaihtuah nahi uhiam?

⁵Kunghilh ahi, hilou e, nou zong na kisik kei uleh huachibang mah in na mangthang ding uhi,” achi hi.

⁶Aman hih gentehna zong agen a, “Mi kuahiam khat in agrep huan ah theipi kung suan khat anei a, tualeh agah ahung zong a, khat zong amukei a.

⁷Tuatakin aman grep huanbawlte kiangah, ‘Ngaiin, kum thum sung hih theipi kung agah kung zong a, khat zong ka mukei hi. Phuk maiin! Bangding a mun dal a om ahia?’ achi a.

⁸Hinanleh aman adawng a akiang ah, ‘Toupa tukum zong omsak nalai in, akimkawt in katou ding a, leihoih in ka phungvuk ding.

⁹A hung gah leh ahoih ahi ding a; ahung gah kei a ahihleh, tuachiang in na phuk na ding,’ ” achi hi.

¹⁰Tualeh aman khawlni-in kikhopna inn khat ah thu ahilh a.

¹¹Tualeh ngaiin, kum sawm leh giat hatlouhna dawi in amat numei khat aom a, a ngum akul a, a dingtang thei mawng mawng kei hi.

¹²Jesu`n amah amuhtak in asam a, “Numei, na hatlouhna a pat khahkhiat na hita!” achi hi.

¹³Atung ah akhut a nga a, tuachi`n thakhat in ahung tangpai a, Pasian a phatta hi.

¹⁴Tualeh khawlni a Jesu`n mi a damsak jiakin kikhopna inn vaihawmpa ahehta a, mipite kiangah, “Mihing nasepna ding niguk sung aom hilou maw; hua sung in hungpai unla hung ki hihdamsak ta unla, khawlni a hilou in!” achi hi.

¹⁵Tuatakin Toupa`n amah adawng a, “Nang milepchiah! Khawlni-in na bawng uh hiam na sabiltung uh hiam akhihna a pat sut in tui dawnsak dingin na kaikhia jel uh hilou maw.

¹⁶Hih numei Abraham tanu ahih tawh, ngaiin, setan in kum sawm leh giat sung amat khawlni a agakna sutsaklou ding maw?” achi hi.

¹⁷Tualeh aman hihthute agentak in, a melmate jousiah ajumta ua; mipite pen a silthupi bawlte jiakin akipak chiat uhi.

¹⁸Tuachi`n aman, “Pasian gam bang chibang ahia? Bang tawh tehkak ding ka hia?

¹⁹Hih pen mi`n ankam tang khat alak a, ahuan a apaihlut bang ahi; huapen ahung pou a, akhang a, sing lianpi ahung hi a, tualeh tungleng vasate`n aba giahna in anei uh,” achi hi.

²⁰Tualeh, “Pasian gam pen bang tawh genteh ding ka hia? achi kik a.

²¹Hih pen tol, numei in alak a, tehna thum dim annel ahel a athoh masiah aphum bang ahi,” achi hi.

²²Tualeh aman thu hilhkawm in Jerusalem lam juanin khuapi leh khuaneute tuan in apaijel a.

²³Tuachi`n mi khat in akiang ah, “Hundam a om dingte tawm noukhat hi uh maw?” achi a. Jesu`n akiang uah,

²⁴“Kong kawchik ah lut sawm teitei un; ajiak kung hilh ahi, mi tampi`n lut asawm ding ua, alutthei kei ding uhi.

²⁵Inn neitu khatvei athoh a kot akhak zohchiah, nou inn pualam a ding in, ‘Toupa, Toupa, kong hung honin chia kong nakiuh chiang un, aman na kiang uah, Khoilammi nahi ua, kung theingai kei!’ chi`n ahung dawng ding hi.

²⁶Tuatakchiah nou, ‘Na maiah kane un ka dawn ua, tualeh ka kongjing uah thu nahilh hi; nachi ding uh!’

²⁷Hinanleh aman, ‘Kunghilh ahi, khoilammi nahi ua kung theikha kei. Nou silgilou bawlte jousiah, ka kiang a pat paimang un, ahung chi ding hi!’

²⁸Abraham leh, Isak leh, Jakob leh Jawlneite jousiah Pasian gam a om namuh ua, nou pualam a paihkhiat a om nahih uh nung kitheih chiang un, huasan ah kahleh hagawina aom ding!

²⁹Tualeh suahlam leh, tumlam leh, simlam leh, mallam a pat in mi ahung pai ding ua, Pasian gam ah atou ding uhi.

³⁰Tualeh ngaiun, a nunungpente amasapen a pang ding aom ua, tualeh amasapente zong a nunungpen a pang ding aom uhi,” achi hi.

³¹Huani mah in Pharisai kuate hiam ahung pai ua, a kiangah, “Pawt inla hihmun a pat paimang in, ajiak Herod in thah hungsawm hi,” achi ua.

³²Aman akiang uah, pai unla, hua si-al kiangah hihthu vagen un, ngaiin, tuni leh jingchiang dawite notkhia in natnate damsak in nithum ni-in kajou ding hi.

³³Bangteng hileh tuni tawh, jingchiang tawh, ajingkik tawh ka paijel ding hi, ajiak Jerusalem ah Jawlnei sih ngaina hilou ahi, achi hi.

³⁴“Aw Jerusalem, Jerusalem! Jawlneite that leh na kiang ua hung kisawlte suang a na denglum! Akpi-in anoute a khanuaia a opkhum bangin bangzah vei na tate opkhum kasawm a, hinanleh na ut kei uhi!

³⁵Ngaiun, na inn uh ahawm a nutsiat in a omta hi; tualeh adiktak in kung hilh ahi, ‘Toupa min a hungpai ahampha hi, nachih masiah uh nung mukei ding uh,’ ” achi hi.