Read Thangal Naga LUKA 14 Bible Online

LUKA 14 - Thangal Naga bible

LUKA 14

¹Tualeh hichi ahung hi a, khawlni a Pharisai lamkai khat inn a an ne ding a apaiin a enkhia ua.

²Tualeh ngaiin, amaiah chibawk a damlou mi khat aom a,

³Jesu`n dansiamte leh Pharisaite ahoupih a akiang uah, “Khawlni-in sukdam asiang hiam sianglou?” achi a.

⁴Amauh adai chiat ua, tuachi`n aman damlou pen atu a, adamsak a, a paisakta hi.

⁵Tuachi`n akiang uah, “Na lak ua kuan ahia, na sabiltung uh hiam, na bawngtal uh hiam guamkhuk ah kiataleh, khawlni a zong kaikhialou ding,” achi hi.

⁶Tualeh amau`n hih thute a dawngthei kik takei uhi.

⁷Tualeh amisapte un munhoih pen ateljel uh amu a, akiang uah genteh thu in agen a:

⁸“Kitenna a kuahiam in ahung sap chiangin touna hoihpen ah toukei un, ahuachihkeh nang sang a mizah huaijaw ana sam kha ding a,

⁹nang hungsampa leh amah na kiang ah hung paiin, ‘hihpa tounang awn in, ahung chi ding a, nang jumtakin mun ngiam pen ah nava tou kha ding hi.’

¹⁰‘Hinanleh ahung kisap chiangin pai inla mun hoihlou pen ah vatou jaw in; tuachi`n a hung samtu ahung pai chiangin na kiangah lawm asang deuh ah hungtou in, ahung chithei ding a.’ tuatak chiangin na an nekpihte zahbawl in na om ding hi.

¹¹Kuapeuh amah kingaisang tuh angiam ding a, tualeh amah kingaingiam tuh tawisang in a om ding,” achi hi.

¹²Tuachiah aman ankuang luipa kiangah zong, “Sun ankuang hiam, jan ankuang hiam nalui chiangin, nalawmte, na sanggamte, na innkuanpihte tualeh naveng mihausate zong sam ken; a huachihkeh amau`n zong ahung sam kha ding ua a hungthuk kha ding uhi.

¹³Hinanleh ankuang nalui chiangin, tagahte, piangsualte kengbaite tualeh mittawte samjaw in.

¹⁴Tuachi`n na hampha ding hi; ajiak amau`n ahung thukjou kei ding ua, midiktatte thohkik chiangin thuk in na om ding hi,” achi hi.

¹⁵Tualeh a an nekpihte khat in hihthu ajak in akiang ah, “Pasian gam a an nedingte ahampha hi!” achi hi.

¹⁶Tuachi`n aman akiang ah, mi “Kuahiam khat in ankuang luina thupitak abawl a.

¹⁷Tualeh annek hun in mi achialte kiangah, ‘Hung paiun tuin bangkim amanta!’ vachi dingin a silapa asawl a.

¹⁸Tualeh amau`n ki thutuak in suanlam anei chiat ua, amasa pen in akiang ah, ‘Lou kaleita a a en ding a kapai poimoh hi, nung ngaihsiam kung ngen hi,’ achi hi.

¹⁹A dang in, ‘Bawngtal tuahnga kaleita a, asiat aphat en ding a kapai poimoh hi, nung ngaihsiam kung ngen hi,’ achi a.

²⁰Tualeh adang khat in, ‘Zi ka neita a, tuajiakin kung paithei kei hi,’ achi a.

²¹Tuachi`n hua silapa ahung paia, huathute apu a hunghilh a, tuachiah hua inn neipa heh in, a silapa kiangah, ‘Kongjing leh daining lak ah kintakin pai inla, tagahte, piangsualte, mittawte tualeh kengbaite hih teng ah hung puilut in,’ achi hi.

²²A silapa`n, ‘Nung thupiak bang in ka bawl jouta a, hinanleh mun a awng nalai hi,’ achi hi.

²³Tuachi`n apu in a silapa kiangah, ‘Lamlian leh daipam ah pai inla ka inn a dimtheihna dingin mi hung jawllut hamham in, achi hi.

²⁴Ajiak kung hilh ahi, ka misapte khat mah in zong ka ankuanglui a chiamkha kei ding uhi!’ ” achi hi.

²⁵Tualeh mipi thupitak tawh amah apaita ua, tualeh amah aki nunghei a, akiang uah

²⁶“Mi kuapeuh ka kiang a hungpai in, apa, anu, atate, a sanggamte, asanggamnu leh amah hinna nangawn tawh ahuat kei leh ka nungjui ahithei kei ding.

²⁷Tualeh kuapeuh a kross pua a hung juilou tuh ka nungjui ahithei kei ding.

²⁸Tualeh nou kuapeuhin innsang lam sawm in alamzohna ding aneih leh neihlouh ding tou masa phot a alut ding zah tuat masalou ding kua nahi ua?

²⁹A tuachih kei leh suangphum alepzoh nung in lamjou kei taleh amu jousiahin nuihsan in,

³⁰‘Hihpa`n innlam pan ngal a hinanleh a jouthei takei!’ achi kha ding uh.

³¹Ahihkeileh kumpipa kua ahiam kumpi dang dou ding a kuan ding in, tou masa phot a, amah dou ding a mi singnih tawh hung kuanpa mi singkhat tawh atuah ngam ding leh ngamlouh ding ngaihtuah masa lou ding?

³²Ahihkei vanglakleh kumpi khat pen gamlapia aom laiin kilemna thuchiam ngen dingin palai asawl ding hi.

³³Tuachimah bangin noulak ah aneih jousiah paisan lou tuh ka nungjui ahithei kei ding.”

³⁴“Chi ahoih a hinanleh alimna beitaleh bangchin a alkik thei dia?

³⁵Leia dingin ahoihkei ding a, ekvum dingin zong ahoih kei ding, mi`n apaikhia uh. Kuahileh jakna ding a bil nei jousiahin ja hen!” achi hi.