Read Thangal Naga LUKA 16 Bible Online

LUKA 16 - Thangal Naga bible

LUKA 16

¹Aman a nungjuite kiangah hihthu zong agen a, “Mi hausa kuahiam in dangka kemtu khat anei a, amahpa`n a dangka amok zakthang sak chi`n a kiang ah ahek uhi.

²Tuatakin amah asam a akiang ah, ‘Na tungthu kaja hi bangchi ahia? Na dangka kep thu hungpia in, tubansiah dangka kem in napang nawn kei ding,’ achi hi.

³Tuachi`n dangka kem pa`n a lungsim in, bang chi ding kata le? ‘Ka pu inlah ka dangka kep hung tawpsak ding ahita a, leitawh lah ngaplou ing a, khutdoh lah jum ing a.

⁴Dangka kem ahung tawpsak chiang a a inn ua ahung omsak theihna ding un ka bawldan ding ka theita!’ chi hi.

⁵Tuachi`n apu dangka bate asam khawm a, a masapen kiangah, ‘Ka pu a bangzah ahia nabat?’ achi hi.

⁶‘Aman sathau tehna jakhat,’ achi a. Tuachi`n aman a kiang ah, ‘Nalai la inla, toukin inla, sawmnga gelh in,’ achi hi.

⁷Tuachi`n adang khat kiangah, ‘Nang bangzah ahia nabat?’ achi hi. ‘Aman buh tehna jakhat,’ achi a. ‘Nalai la inla sawmgiat gelh in,’ achi hi.

⁸Hua dangka kemtu diktatlou pa apu in alemsiam jiakin aphat ta hi, ajiak vak tate sang in hih leitung tate atulai thu ua apil jawk jiak un.”

⁹“Tualeh kung hilh ahi, na dangka un nalawm ding uh kibawl un; hua abei hun chiang a tangtawn a omna a nou zong a hung omsak theihna ding un.

¹⁰Kuapeuh tawm nou khat tung a gin-om tuh tampi tungah zong agin-om hi; tualeh kuapeuh tawmnou khat tung a gin-om lou tuh tampi tungah zong a gin-om kei ding hi.

¹¹Huajiakin diktatlouhna dangka tung a na gin-om kei uleh, kuan ahia nou dangka tak hung kemsak ding?

¹²Tualeh midang a tung a bawn na gin-om kei uleh, kuan ahia nou atak hung pia ngam ding?

¹³“Sila khat in pu nih nna a semkop thei kei; khat hua in khat a it ding a; ahihkeileh khat gum in khat ahua ding hi. Pasian nna leh dangka nna na semkop thei kei ding uh,” achi hi.

¹⁴Tualeh dangka ngaina Pharisaite`n zong hihthu aja ua, amah anuihsan ua.

¹⁵Aman akiang uah, “Mi mitmuh a siamtan tumte nahi uh; hinanleh Pasian in na lungtang uh athei hi; ajiak mihing lak a pahtawi a om Pasian mit muh in kihdakhuai tak ahi.

¹⁶“Dan leh Jawlneite thu baptispa Johan hung om tan chiang aom a; huabansiah Pasian gam tangthupha akigen a, tualeh mijousiahin hua-ah lut asawm chiat uhi.

¹⁷Tualeh danthu neunou khat aman sang in van leh lei aman abaihlam jaw hi.

¹⁸“Kuapeuh azi khul a adang kiten pih tuh angkawm ahi; tualeh a pasal in akhulsa kitenpih tuh angkawm ahi.

¹⁹“Mi hausa kuahiam khat a om a, puan sandup leh puan malngat asilh a, niteng in nuamsatak in a om hi.

²⁰Tualeh Lazar kichi apumtang a meima a dim a kawngkhak bul a alupsak jel uh khut doh khat a om a,

²¹mi hausapa dohkan a pat khateh neng kia pouh nek a ut a, uite ahung pai a ameima aliahsak jel uhi.

²²Tualeh hichi a hung hi a, tua khutdohpa asi a, vantungmite`n Abraham angsung ah apaipih ua. Tualeh mi hausapa zong asi a, vui in a omta a,

²³tualeh gawtmun ah gimthuak in aom a, adaktou a, gamlapi a om Abraham leh a angsung a Lazar om amuta hi.

²⁴Tuachi`n a kikou a, ‘Pa, Abraham! Ka tungah zahngai inla, Lazar akhut muk tuia diahkawt a ka lei hung votsak dingin hung sawl in, hih meikuang ah kagim mahmah hi!’ achi hi.

²⁵Hinanleh Abraham in, ‘Tapa, nang na damlaiin silhoihte na kimuh a, tuachi bang in Lazar in sil hoihloute amu chih gelkhia in; hinanleh tu`n amah khamuan in aom a, nang gimthuak in na om ahi.

²⁶Tualeh hihtelou zong kou leh nou kikal ah guam thukpitak koih in aom hi; hihlam a kipan noulam a paisawmte paitheihlouh nang in leh noulam a pat a hihlam a hung paisawmte paitheihlouh nang in achi hi.’

²⁷Tualeh aman, ‘Ahihleh Pa, amah ka pa inn a sawl dingin kung ngen hi,

²⁸sanggam pasal nga kanei a, amauh vahilh hen. Ahuachih keileh amauh zong hih gimthuakna mun ah a hungpai kha ding uh, achi hi.’

²⁹Abraham in a kiang ah, ‘Amau`n Mosi leh Jawlneite anei uh; huate thu ngaikhia uheh,’ achi hi.

³⁰Tuachi`n aman, ‘Hilou e, Pa Abraham! Misi lak a mi khat akiang uah vapaileh akisik ding uh,’ achi hi.

³¹Aman, ‘Mosi leh Jawlneite thu a ngaihkhiat nuam kei uleh misi lak a kipat mi khat thoukik nanleh zong a taksan tuan kei ding uhi,’ ” achi hi.