Read Thangal Naga LUKA 17 Bible Online

LUKA 17 - Thangal Naga bible

LUKA 17

¹Tuachi`n aman nungjuite kiangah, “Puknate omlou thei ahikei, hinanleh pukna omsaktu tung agik hi!

²Hih mineute lak a khat apuksak sang in, a ngawng ah buhgawina suang awhsak in tuipi ah kipai leh amah a dingin ahoihjaw ding hi.”

³Pilvang un! “Na sanggam pa`n natung a sil a bawlkhial leh phawk in, tualeh akisik leh ngaidam in.

⁴Nikhat sung a natung a sil sagihvei abawl khial a sagihvei na kiang a, ‘Ka kisik hi,’ chia nanglam ahung kihei kikleh na ngaihdam ding ahi,” achi hi.

⁵Tualeh sawltakte`n Toupa kiangah, “Ka ginna uh khangsak in,” achi ua.

⁶Toupa`n, “Ankam tang khat bang ginna naneih uleh hih kawl sathau kung kiangah, ‘Na kibawtkhia inla tuipi ah na kisuan in nachi ding ua!’ na thu uh amang ding hi.

⁷“Nou lak a kua nahi ua, loukai hiam, belam ching ahiam a sila khat nei a, lou a pat a hungtun chiang a pai inla an neding in toungal in ana chi ding?

⁸‘Ka nek ding hung bawlsak inla, nakawng gak inla, ka nek a ka dawnzoh masiah ka nek ding bawl in, huazoh chiangin nang ne-in nadawn ding, chijaw lou ding maw?’

⁹Aman hua silapa kiangah thu kipia bang a abawl jiakin apakta ei le?

¹⁰Huachi mahbang in nou zong na kiang ua thupiak jousiah na bawlzoh chiang un, ‘Sila phatuam lou ka hi uh ka bawl ding mawng uh ahi ka bawl uh, chi un,’ ” achi hi.

¹¹Tualeh hichi ahung hi a, Jerusalem juan a apai in Samaria leh Galili gam atuan paisuak a.

¹²Tuachia khuakhat a alut leh phak sawm in ana lamdawn ua, amauh gamlapi ah ading ua

¹³tualeh aw ngaihtak in akikou ua, “Jesu! Siapa! Ka tung uah zahngaiin!” achi ua.

¹⁴Tualeh aman amauh amuhtak in akiang uah, “Pai unla siampute va ki-ensak un,” achi a. Tualeh hichi ahung hi a, apai lai un ahung siangthouta uhi.

¹⁵Tualeh alak ua khat in adamta chih ahung kitheih takin akik kik a, aw ngaihtak in Pasian a phat a.

¹⁶Jesu kengbul ah a khupbok a, kipahthu agen hi, amah Samaria mi ahi.

¹⁷Tuachi`n Jesu`n adawng a, “Sawm hilou maw suksiangthou a om; kuate khoia om ta ula?

¹⁸Hih gamdangmipa chihlouh Pasian phat ding a hung kik kik kuamah akimu kei,” achi hi.

¹⁹Tuachi`n aman a kiang ah, “Thou inla, paita in, na ginna in ahun damsakta hi,” achi hi.

²⁰Tualeh Pharisaite`n Pasian gam hungtun hun ding adok uleh aman adawng a akiang uah, “Pasian gam muhtheih in a hungtung kei hi.

²¹Tualeh, ‘En un, hihtak ah!’ ahihkeileh, ‘En un, huatak ah!’; zong achi kei ding uh, bangjiakin ahia ichihleh, ngaiun, Pasian gam pen nalak uah aom hi,” achi hi.

²²Tuachi`n aman a nungjuite kiangah, “Mihing Tapa damlainite nikhat bek na muhnuam ni uh ahung om ding, hinanleh na mukei ding uhi.

²³Tualeh amau`n na kiang uah, ‘En un, hihteng ah!’ ahihkeileh, ‘En un, huatak ah!’ ahung chi ding ua, pai kei unla, anung uh zong juikei un.

²⁴Tunphe van mong langkhat a aphet a, van mong langkhat lam tanpha asalhvak mahbang in mihing Tapa zong ahung paini in ahi ding.

²⁵Hinanleh hua masang in sil tampi athuak ding a, tulai khangthakte deihouh in aom ding hi.

²⁶Noah damlai a sil omdan bang in Mihing Tapa hung paikik ni chiangin zong ahi ding hi.

²⁷Noah gunkuang a alut a tui ahung let a, aun ua a hihlupni atun masiah ane un, adawn ua, zi anei ua, tualeh zi-leh ta in akipia tuah uhi.

²⁸Tuachimah bang in Lot damlai in zong aom ua, ane un adawn ua, alei un ajuak ua, asuan un alam uhi.

²⁹Hinanleh Sodom khua a pat Lot apawt ni-in van a pat in mei leh kat aju a, aun un a kanglumta hi.

³⁰Tuachimah bang in Mihing Tapa hung kilakni chiangin ahi ding hi.

³¹“Tuani chiangin kuahileh inn tung a om innsung ah a dangka omte lading in kum kei hen; tualeh huachi mahbang in kuapeuh lou a om zong hungkik kik kei hen.

³²Lot zi theijing un!

³³Mi kuapeuh a hinna humbitna zong in ata`n ding a, tualeh kuapeuh ahinna ta`n in ahumbit ding uhi.

³⁴Kunghilh ahi, huazan in lupna khat ah minih alum ding a: khat lakmang in aom ding a, khat nutsiat in a om ding.

³⁵Numei nih ansu in a om ding a, khat lakmang in a om ding a, khat nutsiat in a om ding.”

³⁶Lou ah minih aom ding ua, khat lakmang in aom ding a, khat nutsiat in aom ding, achi hi.

³⁷Tualeh amau`n adawng ua akiang ah, “Toupa, khoi ah la?” achi ua, Aman akiang uah, “Saluang omna phot ah langta zong a omkhawm ding uh,” achi hi.